ಬೈಕ್​​ ಸೀಟಿನ ಕೆಳಗೆ ದೈತ್ಯ ನಾಗರಹಾವು.. ಬೆಚ್ಚಿ ಬಿದ್ದ ಬೈಕ್​ ಸವಾರ!

ಬೃಹತ್​ ಗಾತ್ರದ ಹಾವೊಂದು ಪಾರ್ಕ್​ ಮಾಡಿದ್ದ ಬೈಕ್​ನ ಸೀಟಿನ ಕೆಳ ಭಾಗದಲ್ಲಿ ಕಾಣಿಸಿಕೊಂಡಿದ್ದು, ಅದರ ರಕ್ಷಣೆ ಮಾಡಿ ಕಾಡಿಗೆ ಬಿಡುವಲ್ಲಿ ಕೆಲ ಯುವಕರು ಯಶಸ್ವಿಯಾಗಿದ್ದಾರೆ.

ಹಲ್ದ್ವಾನಿ(ಉತ್ತರಾಖಂಡ): ದೇಶಾದ್ಯಂತ ಮಳೆಗಾಲ ಆರಂಭಗೊಂಡಿದೆ. ಹೀಗಾಗಿ ಕೆಲವೆಡೆ ಹಾವುಗಳ ಕಾಟ ಹೆಚ್ಚಾಗುತ್ತಿದೆ. ಈ ವೇಳೆ ಪಾರ್ಕ್​ ಮಾಡಿರುವ ವಾಹನಗಳ ಒಳಗೆ ಹಾವು ಸೇರಿಕೊಳ್ಳುವ ಸಾಧ್ಯತೆ ದಟ್ಟವಾಗಿದ್ದು, ಅವುಗಳನ್ನ ಹತ್ತುವ, ಹೊರತೆಗೆಯುವ ಮೊದಲು ಒಂದು ಸಲ ಪರಿಶೀಲನೆ ನಡೆಸುವುದು ಸೂಕ್ತ. ಸದ್ಯ ಅಂತಹದೊಂದು ಘಟನೆ ಉತ್ತರಾಖಂಡ್​ನಲ್ಲಿ ನಡೆದಿದೆ.

ಉತ್ತರಾಖಂಡನ ಹಲ್ದ್ವಾನಿಯಲ್ಲಿ ಪಾರ್ಕ್​ ಮಾಡಿದ್ದ ಬೈಕ್​ ಸೀಟಿನ ಕೆಳಗೆ ದೈತ್ಯ ಗಾತ್ರದ ನಾಗರಹಾವು ಕಾಣಿಸಿಕೊಂಡಿದೆ. ಅದೃಷ್ಟವಶಾತ್​ ಬೈಕ್ ಸವಾರ ಅದನ್ನ ನೋಡಿರುವ ಕಾರಣ ಯಾವುದೇ ರೀತಿಯ ಅಪಾಯ ನಡೆದಿಲ್ಲ. ರಾಂಪುರ ರಸ್ತೆಯ ಪಂಚಾಯತ್​ ಬಳಿ ಪಾರ್ಕ್ ಮಾಡಿದ್ದ ಬೈಕ್​ನಲ್ಲಿ ಈ ನಾಗರಹಾವು ಪತ್ತೆಯಾಗಿದೆ. ಸ್ಥಳದಲ್ಲಿ ಸೇರಿರುವ ಕೆಲ ಯುವಕರು ಅದರ ರಕ್ಷಣೆ ಮಾಡಿ ಕಾಡಿನೊಳಗೆ ಬಿಡುವಲ್ಲಿ ಯಶಸ್ವಿಯಾಗಿದ್ದಾರೆ.

ಲಭ್ಯವಾಗಿರುವ ಮಾಹಿತಿ ಪ್ರಕಾರ, ಯುವಕನೋರ್ವ ಹೊರಗಡೆ ಹೋಗಲು ಬೈಕ್​ ತೆಗೆಯಲು ಮುಂದಾಗಿದ್ದಾನೆ. ಈ ವೇಳೆ ಬೈಕ್​ ಸೀಟಿನ ಕೆಳ ಭಾಗದಲ್ಲಿ ಶಬ್ದ ಆಗಿದೆ. ಬೈಕ್​ ಸವಾರನ ಗಮನ ಸೀಟಿನ ಕೆಳಗೆ ಇದ್ದ ಹಾವಿನ ಮೇಲೆ ಬಿದ್ದಿದೆ. ತಕ್ಷಣವೇ ಅಲ್ಲಿಂದ ದೂರು ಸರಿದಿದ್ದಾನೆ. ಈ ಮಾಹಿತಿ ಸ್ಥಳದಲ್ಲಿದ್ದವರಿಗೂ ಹರಡಿದೆ. ಸ್ಥಳದಲ್ಲಿದ್ದ ಕೆಲವರು ಅದರ ರಕ್ಷಣೆ ಮಾಡಿ ಕಾಡಿಗೆ ಬಿಟ್ಟು ಬಂದಿದ್ದಾರೆ.