ಅಂತಾರಾಷ್ಟ್ರೀಯ ಪ್ರಯಾಣವನ್ನು ಇನ್ನಷ್ಟು ಸುಲಭವಾಗಿಸಲು ಹಾಗೂ ಪಾಸ್ಪೋರ್ಟ್ ಹೊಂದಿರುವವರ ಮಾಹಿತಿಯನ್ನು ಸುರಕ್ಷಿತವಾಗಿರಿಸಲು ಶೀಘ್ರದಲ್ಲೇ ಇ-ಪಾಸ್ಪೋರ್ಟ್ಗಳ ಜಾರಿಗೆ ಕೇಂದ್ರ ಸರ್ಕಾರ ಚಿಂತನೆ ನಡೆಸುತ್ತಿದೆ. ಕಳೆದ ವರ್ಷವೇ ಇ-ಪಾಸ್ಪೋರ್ಟ್ ಬಗ್ಗೆ ಕೇಂದ್ರ ಸರ್ಕಾರ ಹೇಳಿತ್ತಾದರೂ, ಈ ವರ್ಷಾಂತ್ಯಕ್ಕೆ ಇ-ಪಾಸ್ಪೋರ್ಟ್ ಯೋಜನೆ ಜಾರಿಯಾಗಲಿದೆ ಎಂದು ವಿದೇಶಾಂಗ ಸಚಿವ ಎಸ್. ಜೈಶಂಕರ್ ತಿಳಿಸಿದ್ದಾರೆ.
ಚಿಪ್ ಆಧಾರಿತ ಇ-ಪಾಸ್ಪೋರ್ಟ್ ಹೊಸ ಪರಿಕಲ್ಪನೆಯೇನಲ್ಲ. ನೂರಕ್ಕೂ ಹೆಚ್ಚು ದೇಶಗಳಲ್ಲಿ ಈ ರೀತಿಯ ಇ-ಪಾಸ್ಪೋರ್ಟ್ ಜಾರಿಯಲ್ಲಿವೆ. ಐರ್ಲೆಂಡ್, ಜಿಂಬಾಬ್ವೆ, ಮಲಾವಾಯ್, ಪಾಕಿಸ್ತಾನ, ನೇಪಾಳ, ಬಾಂಗ್ಲಾದೇಶ ಮುಂತಾದ ದೇಶಗಳು ಈಗಾಗಲೇ ಇ-ಪಾಸ್ಪೋರ್ಟ್ ಜಾರಿಗೊಳಿಸಿವೆ ಎಂದು ಇಂಟರ್ನ್ಯಾಷನಲ್ ಸಿವಿಲ್ ಏವಿಯೇಶನ್ ಆರ್ಗನೈಸೇಶನ್ ತಿಳಿಸಿದೆ.
ಹಾಗಾದ್ರೆ ಇ-ಪಾಸ್ಪೋರ್ಟ್ ಎಂದರೇನು? ಪ್ರಯಾಣಕ್ಕೆ ಇದರಿಂದಾಗುವ ಅನುಕೂಲಗಳೇನು? ಇದೆಷ್ಟು ಸುರಕ್ಷಿತ? ಎಲ್ಲ ಮಾಹಿತಿ ಇಲ್ಲಿದೆ.
ಏನಿದು ಇ-ಪಾಸ್ಪೋರ್ಟ್ : ಇ-ಪಾಸ್ಪೋರ್ಟ್ ಗಳು ಇತರ ಸಾಮಾನ್ಯ ಪಾಸ್ಪೋರ್ಟ್ ಮಾಡುವ ಕೆಲಸವನ್ನೇ ಮಾಡುತ್ತವೆ. ಇವು ನಿಮ್ಮ ಡಿಎಲ್ನಲ್ಲಿರುವ ಹಾಗೆ ಒಂದು ಚಿಪ್ ಒಳಗೊಂಡಿರುತ್ತವೆ. ಪಾಸ್ಪೋರ್ಟ್ ಹೊಂದಿರುವವರ ಎಲ್ಲ ಮಾಹಿತಿ ಚಿಪ್ನಲ್ಲಿರುತ್ತದೆ.
ಇ-ಪಾಸ್ಪೋರ್ಟ್ಗಳು ರೇಡಿಯೋ ಫ್ರಿಕ್ವೆನ್ಸಿ ಐಡೆಂಟಿಫಿಕೇಶನ್ (RFID) ಚಿಪ್ ಒಳಗೊಂಡಿರುತ್ತವೆ ಹಾಗೂ ಹಿಂಭಾಗದ ಕವರ್ನಲ್ಲಿ ಒಳಗಡೆ ಮುಚ್ಚಲ್ಪಟ್ಟ ಎಂಟೆನಾ ಇರುತ್ತದೆ. ಅಧಿಕಾರಿಗಳು ಪ್ರಯಾಣಿಕರ ಮಾಹಿತಿಯನ್ನು ಬಹುಬೇಗನೆ ಪರಿಶೀಲಿಸಲು ಚಿಪ್ ಬಹಳ ಸಹಕಾರಿ. ನಕಲಿ ಪಾಸ್ಪೋರ್ಟ್ ತಡೆಗಟ್ಟಲು, ಪಾಸ್ಪೋರ್ಟ್ ಸುರಕ್ಷತೆ ಹೆಚ್ಚಿಸಲು ಮತ್ತು ಮಾಹಿತಿಯ ಪುನರಾವರ್ತನೆ ಹಾಗೂ ತಿದ್ದುವಿಕೆಯನ್ನು ತಡೆಗಟ್ಟಲು ಇ-ಪಾಸ್ಪೋರ್ಟ್ ಜಾರಿಗೊಳಿಸಲಾಗುತ್ತದೆ.
ಇ-ಪಾಸ್ಪೋರ್ಟ್ ತಂತ್ರಜ್ಞಾನ ತಯಾರಿಸುವವರು ಯಾರು? : ತಂತ್ರಜ್ಞಾನ ಕ್ಷೇತ್ರದ ದೈತ್ಯ ಕಂಪನಿ ಟಾಟಾ ಕನ್ಸಲ್ಟನ್ಸಿ ಸರ್ವಿಸಸ್ ಇ-ಪಾಸ್ಪೋರ್ಟ್ ಗಳ ಮೇಲೆ ಈಗಾಗಲೇ ಕೆಲಸ ಮಾಡುತ್ತಿದ್ದು, ವರ್ಷಾಂತ್ಯದ ವೇಳೆಗೆ ಯೋಜನೆ ಪೂರ್ಣವಾಗಲಿದೆ. ಬ್ಯಾಕೆಂಡ್ನಲ್ಲಿ ಡೇಟಾ ನಿರ್ವಹಣೆ ಮಾಡಲು ವಿದೇಶಾಂಗ ಸಚಿವಾಲಯದ ಸಹಯೋಗದಲ್ಲಿ ಟಿಸಿಎಸ್ ಹೊಸ ಕಮಾಂಡ್ ಸೆಂಟರ್ ಆರಂಭಿಸಿದೆ.
ಯಾವಾಗ ಸಿಗಬಹುದು ಇ-ಪಾಸ್ಪೋರ್ಟ್? : ವರ್ಷಾಂತ್ಯಕ್ಕೆ ಇ-ಪಾಸ್ಪೋರ್ಟ್ ಬರಲಿವೆ ಎಂದು ಕೇಂದ್ರ ಸರ್ಕಾರ ಹೇಳಿದ್ದರೂ ನಿಖರ ದಿನಾಂಕವನ್ನು ಈವರೆಗೂ ಪ್ರಕಟಿಸಿಲ್ಲ.
ಈಗ ಪಾಸ್ಪೋರ್ಟ್ ಹೊಂದಿರುವವರು ಏನು ಮಾಡಬೇಕು?: ಯೋಜನೆ ಜಾರಿಯ ನಂತರ ಈಗಾಗಲೇ ಪಾಸ್ಪೋರ್ಟ್ ಹೊಂದಿರುವವರು ಇ-ಪಾಸ್ಪೋರ್ಟ್ ಗೆ ಬದಲಾಯಿಸಿಕೊಳ್ಳಬೇಕಾ, ಅವರ ಪಾಸ್ಪೋರ್ಟ್ ಅವಧಿ ಮುಗಿಯುವವರೆಗೂ ಸುಮ್ಮನಿರಬೇಕಾ ಅಥವಾ ಏನೂ ಮಾಡದೆ ಸುಮ್ಮನಿರಬೇಕಾ ಎಂಬುದರ ಬಗ್ಗೆ ಸರ್ಕಾರ ಏನನ್ನೂ ಹೇಳಿಲ್ಲ. ಇದರ ಬಗ್ಗೆ ಕಾಯಬೇಕಿದೆ.
