ಸೂರತ್(ಗುಜರಾತ್): ವಿವಾಹಿತ ವ್ಯಕ್ತಿಯೊಬ್ಬ ಇನ್ನೊಂದು ಮದುವೆಗೆ ಮಂಟಪದಲ್ಲಿ ಕುಳಿತಿದ್ದ. ಇನ್ನೇನು ವಧುವಿಗೆ ತಾಳಿ ಕಟ್ಟಬೇಕು ಎನ್ನುವಷ್ಟರಲ್ಲಿ ಪೊಲೀಸರು ದಾಳಿ ನಡೆಸಿ ಆತನನ್ನು ಬಂಧಿಸಿದ್ದಾರೆ. ವಿಚಿತ್ರ ಅಂದ್ರೆ ವಿವಾಹಿತನ ಮತ್ತೊಂದು ವಿವಾಹದ ಬಗ್ಗೆ ಮಾಹಿತಿ ನೀಡಿದ್ದು, ಬೇರಾರೂ ಅಲ್ಲ ಸ್ವತಃ ಆತನ ತಂದೆ.!
ಸಿನಿಮಾ ಕತೆಯಂತಿರುವ ಈ ಘಟನೆ ನಡೆದಿದ್ದು, ಗುಜರಾತ್ನ ಸೂರತ್ ಜಿಲ್ಲೆಯ ಮಹುವಾದಲ್ಲಿ. ಯಾರಿಗೂ ತಿಳಿಸದೇ ಎರಡನೇ ಮದುವೆಗೆ ಸಿದ್ಧವಾಗಿದ್ದ ವ್ಯಕ್ತಿಯನ್ನು ತಡೆಯುವ ಮೂಲಕ ಪೊಲೀಸರು ಇಬ್ಬರು ಯುವತಿಯರ ಬದುಕು ರಕ್ಷಿಸಿದ್ದಾರೆ. ಪೊಲೀಸ್ ಠಾಣೆಗೆ ಕರೆದೊಯ್ದು ವಿಚಾರಣೆ ನಡೆಸಿದಾಗ, ಈಗಾಗಲೇ ತಾನು ಮದುವೆಯಾಗಿದ್ದನ್ನು ಆತ ಒಪ್ಪಿಕೊಂಡಿದ್ದಾನೆ.
ಘಟನೆಯ ವಿವರ: ಮಹುವಾದಲ್ಲಿ ಇಬ್ಬರು ಸಹೋದರರ ಮದುವೆ ನಿಶ್ಚಯ ಮಾಡಲಾಗಿತ್ತು. ಮದುವೆಯ ಮಂಟಪದಲ್ಲಿ ಎಲ್ಲ ಸಿದ್ಧತೆಗಳು ಪೂರ್ಣಗೊಂಡು ಇನ್ನೇನು ತಾಳಿ ಕಟ್ಟುವುದೊಂದೇ ಬಾಕಿ ಇತ್ತು. ಅದಾಗಲೇ ನೋಡಿ ಘಟನೆಗೆ ತಿರುವು ಸಿಕ್ಕಿದ್ದು. ಮದುವೆಗೆ ಎಂದು ಬಂದಿದ್ದ ವರನ ತಂದೆ ಮದುವೆಯ ಕರೆಯೋಲೆ ನೋಡಿ ದಂಗಾಗಿದ್ದ. ಕಾರಣ ಹೆತ್ತ ತಂದೆಗೇ ಮಗನ ಮದುವೆ ಬಗ್ಗೆ ಗೊತ್ತಿರಲಿಲ್ಲ.
ಮಂಟಪದಲ್ಲಿ ನಡೆಯುತ್ತಿರುವುದು ತನ್ನ ಮಗನ ವಿವಾಹ. ಆತನಿಗೆ ಈಗಾಗಲೇ ಕಲ್ಯಾಣವಾಗಿ ಮಗವೂ ಇದೆ. 2ನೇ ಮದುವೆಯಾದರೆ, ಇಬ್ಬರು ಹೆಣ್ಣುಮಕ್ಕಳ ಬಾಳು ಹಾಳಾಗುತ್ತದೆ ಎಂದು ತಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡಿದ್ದಾನೆ.
ಮಾರುವೇಷದಲ್ಲಿ ಬಂದ ಖಾಕಿ ಪಡೆ: ವಿಷಯ ತಿಳಿದ ಪೊಲೀಸರು ತಕ್ಷಣವೇ ಕಾರ್ಯಪ್ರವೃತ್ತರಾಗಿ ಮದುವೆ ಮನೆಗೆ ಬಂದಿದ್ದಾರೆ. ಅವರು ಪೊಲೀಸ್ ವೇಷದಲ್ಲಿರದೇ ಮಾರುವೇಷದಲ್ಲಿ ಯಾರಿಗೂ ತಿಳಿಯದ ಹಾಗೇ ಮನೆ ಪ್ರವೇಶಿಸಿದ್ದಾರೆ. ಎಲ್ಲರನ್ನೂ ಸುತ್ತಿವರೆದಿದ್ದ ಪೊಲೀಸರು ನಿಧಾನವಾಗಿ ವಧುವಿನ ಬಳಿಗೆ ಹೋಗಿ ವಶಕ್ಕೆ ಪಡೆದಿದ್ದಾರೆ. ಬಳಿಕ ಆತನ ಬಗ್ಗೆ ಮದುವೆಗೆ ಬಂದಿದ್ದ ಬಂಧುಗಳಿಗೆ ತಿಳಿಸಿ ಸಮಾಧಾನಿಸಿದ್ದಾರೆ.
ನಕಲಿ ಪೋಷಕರ ಸೃಷ್ಟಿ: 2ನೇ ವಿವಾಹವಾಗಲು ಕಿರಾತಕ ಮೋಸದ ಜಾಲವನ್ನೇ ಹೆಣೆದಿದ್ದ. ಅದೆಂತಾ ಪ್ಲಾನ್ ಅಂದ್ರೆ ತನ್ನ ಹೆತ್ತವರನ್ನೇ ಬದಲಿಸಿ, ನಕಲಿ ತಂದೆ ತಾಯಿಯನ್ನು ತೋರಿಸಿ ವಧುವಿನ ಮನೆಯವರನ್ನು ಒಪ್ಪಿಸಿದ್ದನಂತೆ. ಅನಾರೋಗ್ಯಪೀಡಿತರಾಗಿದ್ದ ನಿಜವಾದ ಪೋಷಕರಿಗೆ ಇದ್ಯಾವುದೂ ತಿಳಿದಿರಲಿಲ್ಲ ಎಂಬುದು ವಿಚಿತ್ರ ಸಂಗತಿ.
ಬಾಣಸಿಗನಾಗಿರುವ ಆರೋಪಿ ಸಂಜಯ್ ನಕಲಿ ಪೋಷಕರು ಮತ್ತು ಸ್ನೇಹಿತರ ನೆರವಿನಿಂದ 2ನೇ ಮದುವೆ ಕುದುರಿಸಿಕೊಂಡಿದ್ದ. ಮದುವೆಗೆ ಎರಡೂ ಕಡೆಯವರು ಒಪ್ಪಿಗೆ ಸೂಚಿಸಿದ ಹಿನ್ನೆಲೆಯಲ್ಲಿ ಮದುವೆಯ ಸಿದ್ಧತೆಗಳೂ ಪೂರ್ಣಗೊಂಡಿದ್ದವು. ಮದುವೆಯ ದಿನ ಕಿರಾತಕ ಸಂಜಯ್ ಒಬ್ಬನೇ ಮದುವೆ ಮನೆಗೆ ಬಂದಾಗ ವಧುವಿನ ಕಡೆಯವರು ಪ್ರಶ್ನಿಸಿದ್ದಾರೆ. ಅನಾರೋಗ್ಯ ಕಾರಣ ಅವರು ತಡವಾಗಿ ಬರುತ್ತಾರೆ ಎಂದು ಯಾಮಾರಿಸಿದ್ದಾನೆ.
ರಹಸ್ಯ ಬಯಲಿಗೆಳೆದ ತಂದೆ: ವಧುವಿನ ಕಡೆಯವರ ಪ್ರಶ್ನೆಯಿಂದ ವಿಚಿಲಿತನಾದ ಸಂಜಯ್ ನಿಜವಾದ ಪೋಷಕರನ್ನು ಗೆಳೆಯರ ಸಹಾಯದಿಂದ ಮದುವೆ ಮನೆಗೆ ಕರೆ ತಂದಿದ್ದಾನೆ. ಇಷ್ಟಾದರೂ, ತಾವು ಬಂದಿದ್ದು ಮಗನ ಮದುವೆಗೆ ಎಂಬುದು ಮಾತ್ರ ಅವರಿಗೆ ತಿಳಿದಿರಲಿಲ್ಲ. ಮದುವೆ ಯಾರದ್ದು ಎಂಬುದನ್ನು ತಿಳಿದುಕೊಳ್ಳಲು ಸಂಜಯ್ ಅವರ ತಂದೆ ಲಗ್ನಪತ್ರಿಕೆಯನ್ನು ನೋಡಿದಾಗ ವಿಷಯ ಗೊತ್ತಾಗಿದೆ. ತಕ್ಷಣವೇ ಅವರು ಈ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಿ, ವಿಷಯ ಬಯಲಿಗೆಳೆದಿದ್ದರು.
ಇದೀಗ 2ನೇ ಮದುವೆಗೆ ಸಿದ್ಧವಾಗಿದ್ದ ವರ ಸಂಜಯ್ ಪೊಲೀಸ್ ಠಾಣೆಯಲ್ಲಿ ಕಂಬಿ ಎಣಿಸುವಂತಾಗಿದೆ. ಇದೆಲ್ಲದಕ್ಕೂ ಮಿಗಿಲಾಗಿ ಇಬ್ಬರು ಹೆಣ್ಣುಮಕ್ಕಳ ಬಾಳನ್ನು ಉಳಿಸಿದ ಸಮಾಧಾನ ಪೊಲೀಸರು ಮತ್ತು ಆತನ ತಂದೆಯದ್ದು.
ಓದಿ: ರಸ್ತೆ ಅಪಘಾತ ಬಳಿಕ ಆರೋಗ್ಯದ ಬಗ್ಗೆ ಮಾಹಿತಿ ಹಂಚಿಕೊಂಡ ನಟಿ ಅದಾ ಶರ್ಮಾ
