ನವದೆಹಲಿ : ಸಿಬಿಎಸ್ಇ ದ್ವಿತೀಯ ಪಿಯು ಮೊದಲ ಅವಧಿಯ ಪರೀಕ್ಷೆಯ ಅಕೌಂಟ್ಸ್ ವಿಷಯಕ್ಕೆ ಗ್ರೇಸ್ ಅಂಕ ನೀಡುವ ಕುರಿತಂತೆ ವೈರಲ್ ಆದ 'ವಿಡಿಯೋ ಸುಳ್ಳು' ಎಂದು ಸೆಂಟ್ರಲ್ ಬೋರ್ಡ್ ಆಫ್ ಸೆಕೆಂಡರಿ ಎಜುಕೇಶನ್(ಸಿಬಿಎಸ್ಇ) ಸುತ್ತೋಲೆ ಹೊರಡಿಸಿದೆ.
CBSE ಬೋರ್ಡ್ 12ನೇ ತರಗತಿಯ ಮೊದಲ ಅವಧಿಯ ಪರೀಕ್ಷೆ ಡಿಸೆಂಬರ್ 13ರಂದು ನಡೆದಿದೆ. ಅಕೌಂಟ್ಸ್ ವಿಷಯದಲ್ಲಿ ಪ್ರಮಾದವಾದ ಕಾರಣ ಅದಕ್ಕೆ ಅನುಗುಣವಾಗಿ 6 ಗ್ರೇಸ್ ಅಂಕಗಳನ್ನು ನೀಡಲಾಗುತ್ತದೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋವೊಂದು ವೈರಲ್ ಆಗಿದೆ. ಇದು ಬೋರ್ಡ್ ಗಮನಕ್ಕೆ ಬಂದ ಕಾರಣ 'ವಿಡಿಯೋದಲ್ಲಿರುವ ಮಾಹಿತಿ ಸಂಪೂರ್ಣ ಸುಳ್ಳಾಗಿದೆ' ಎಂದು ಅದು ಹೇಳಿದೆ.
ವೈರಲ್ ಆದ ವಿಡಿಯೋದಲ್ಲೇನಿದೆ?: ಪರೀಕ್ಷಾ ನಿಯಂತ್ರಕರಾದ ಡಾ.ಸನ್ಯಮ್ ಭಾರದ್ವಾಜ್ ಅವರು ಮಾತನಾಡಿದ್ದು, 12ನೇ ತರಗತಿಯ ಅಕೌಂಟ್ಸ್ ಮೊದಲ ಅವಧಿಯ ಪರೀಕ್ಷೆಯಲ್ಲಿ ವಿದ್ಯಾರ್ಥಿಗಳು 6 ಗ್ರೇಸ್ ಅಂಕಗಳನ್ನು ಪಡೆದುಕೊಳ್ಳಲಿದ್ದಾರೆ. ಪ್ರಮಾದವಾದ ಬಗ್ಗೆ ವಿದ್ಯಾರ್ಥಿಗಳು ಯಾವುದೇ ಭಯಪಡುವ ಅಗತ್ಯವಿಲ್ಲ ಎಂದು ಅವರು ಹೇಳಿರುವಂತೆ ವಿಡಿಯೋ ಮಾಡಲಾಗಿದೆ.
ಇದನ್ನೂ ಓದಿ: ಪತ್ನಿಯ ಸಾವಿನ ಸುದ್ದಿ ಕೇಳಿ ನೇಣಿಗೆ ಶರಣಾದ ಪತಿ..ಜೀವನ್ಮರಣ ಹೋರಾಟದಲ್ಲಿ ಪುತ್ರಿ
ಇದಕ್ಕೆ ಸ್ಪಷ್ಟನೆ ನೀಡಿರುವ ಮಂಡಳಿ, ಪರೀಕ್ಷಾ ನಿಯಂತ್ರಣಾಧಿಕಾರಿ ಡಾ.ಸನ್ಯಮ್ ಭಾರದ್ವಾಜ್ ಈ ಬಗ್ಗೆ ಯಾವುದೇ ವರದಿಗಾರರ ಜೊತೆ ಮಾತನಾಡಿಲ್ಲ ಅಥವಾ ಗ್ರೇಸ್ ಅಂಕ ನೀಡುವ ನಿರ್ಧಾರವನ್ನು ತೆಗೆದುಕೊಂಡಿಲ್ಲ. ವಿಡಿಯೋದಲ್ಲಿರುವ ಮಾಹಿತಿ ಸುಳ್ಳು. ವೈರಲ್ ಸಂದೇಶವನ್ನು ನಂಬಬೇಡಿ. ಮಾಹಿತಿಗಾಗಿ CBSEಯ ಅಧಿಕೃತ ವೆಬ್‌ಸೈಟ್‌ಗೆ ಭೇಟಿ ನೀಡಿ ಎಂದು ಸ್ಪಷ್ಟನೆ ನೀಡಿದೆ.
