ಕಾನ್ಪುರ: ಮದುವೆಗಾಗಿ ಕಾಯುತ್ತಿದ್ದ ವಧುವಿಗೆ ಮದುವೆ ಕ್ಯಾನ್ಸಲ್ ಎಂದು ವರನೇ ಸಂದೇಶ ಕಳುಹಿಸಿರುವ ಘಟನೆ ನಗರದಲ್ಲಿ ನಡೆದಿದೆ.
ಕಾನ್ಪುರದ ಪಂಕಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದೆ. ಗಂಗಾಪುರ ನಿವಾಸಿ ಪುಷ್ಪ್ ಲತಾ ಜೊತೆ ಕರೌಲಿ ಗ್ರಾಮದ ಕ್ರಾಂತಿ ಸಿಂಗ್ನೊಂದಿಗೆ ಏಪ್ರಿಲ್ 28 ರಂದು ಮದುವೆ ನಿಶ್ಚಯವಾಗಿತ್ತು. ಅದರಂತೆ ಯುವತಿ ಕುಟುಂಬಸ್ಥರು ಮದುವೆ ಮಾಡಲು ತಯಾರಿ ನಡೆಸಿದ್ದರು. ಯುವತಿಯೂ ಸಹ ಮದುವೆಗೆ ಸಂತೋಷದಿಂದಲೇ ರೆಡಿಯಾಗಿದ್ದರು.
ಇನ್ನೇನು ಮದುವೆ ನಡೆಯಬೇಕು. ವರನ ಕುಟುಂಬಸ್ಥರು ವಧು ಮನೆಗೆ ಬರಬೇಕು. ಆದರೆ ವರ ಕೊನೆ ಕ್ಷಣದಲ್ಲಿ ನಾವು ನಿಮ್ಮ ಮನೆಗೆ ಬರುತ್ತಿಲ್ಲ. ಮದುವೆ ಕ್ಯಾನ್ಸಲ್ ಮಾಡುತ್ತಿದ್ದೇವೆ ಎಂದು ವಧುವಿಗೆ ಮೊಬೈಲ್ ಮೂಲಕ ಸಂದೇಶ ರವಾನಿಸಿದ್ದಾನೆ.
ಈ ಸಂದೇಶ ನೋಡಿದ ವಧು ದಿಗ್ಭ್ರಮೆಗೊಂಡಳು. ಬಳಿಕ ಪೊಲೀಸರಿಗೆ ದೂರು ನೀಡಿದರು. ವರನು ವರದಕ್ಷಿಣೆ ಆಸೆಯಿಂದ ಮದುವೆ ನಿರಾಕರಿಸಿದ್ದಾರೆ. ನಾನೂ ಈ ಮದುವೆ ಮಾಡಿಕೊಳ್ಳುವುದಿಲ್ಲ. ನನಗೆ ಇಲ್ಲಿಯವರೆಗೆ ಮದುವೆಗೆ ಖರ್ಚು ಮಾಡಿದ ಹಣ ಮತ್ತು ವರನ ಕುಟುಂಬಕ್ಕೆ ನೀಡಿದ ಹಣ ಹಾಗೂ ವರನ ಉದ್ಯೋಗವೂ ನಮಗೆ ಕೊಡಿಸಬೇಕೆಂದು ವಧು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.
ಈ ಘಟನೆ ಕುರಿತು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.
