ಕೋಲ್ಕತ್ತಾ (ಪಶ್ಚಿಮಬಂಗಾಳ) : ಮುಂಬರುವ ಮುನ್ಸಿಪಲ್ ಚುನಾವಣೆ ಮೇಲೆ ಕಣ್ಣಿಟ್ಟಿರುವ ಭಾರತೀಯ ಜನತಾ ಪಾರ್ಟಿ, ಇದೀಗ ಪಕ್ಷದಲ್ಲಿ ಮಹತ್ವದ ಬದಲಾವಣೆ ಮಾಡಲು ಮುಂದಾಗಿದೆ. ಹೀಗಾಗಿ, ರಾಜ್ಯ ಬಿಜೆಪಿಯಲ್ಲಿ ಕೆಲ ಸ್ಥಾನ ಪುನರ್ ರಚನೆ ಮಾಡಲು ಇರಾದೆ ಇಟ್ಟುಕೊಂಡಿದೆ.
ಪಶ್ಚಿಮ ಬಂಗಾಳದಲ್ಲಿ ಮಮತಾ ಬ್ಯಾನರ್ಜಿ ನೇತೃತ್ವದ ಟಿಎಂಸಿ ಮತ್ತೊಂದು ಅವಧಿಗೆ ಅಧಿಕಾರದ ಚುಕ್ಕಾಣಿ ಹಿಡಿಯುತ್ತಿದ್ದಂತೆ ಅನೇಕ ಬಿಜೆಪಿ ಮುಖಂಡರು ಟಿಎಂಸಿ ಸೇರಿದ್ದಾರೆ. ಹೀಗಾಗಿ, ಅಲ್ಲಿನ ಪಕ್ಷದ ಪುನರ್ರಚನೆ ಮಾಡಲು ಬಿಜೆಪಿ ಹೈಕಮಾಂಡ್ ಮುಂದಾಗಿದೆ.
ರಾಜ್ಯ ಸಮಿತಿ ರಚನೆ ಸೇರಿದಂತೆ ಎಲ್ಲ ವಿಭಾಗ ಇದೀಗ ಪುನರ್ರಚನೆಯಾಗಲಿದೆ. ರಾಜ್ಯ ಪ್ರಧಾನ ಕಾರ್ಯದರ್ಶಿಗಳ ಸ್ಥಾನಗಳಲ್ಲಿ ಹೊಸ ಮುಖಗಳಿಗೆ ಮಣೆ ಹಾಕುವ ಸಾಧ್ಯತೆ ಇದೆ. ಪ್ರಮುಖವಾಗಿ ದೇಬೋಜಿತ್ ಸರ್ಕಾರ್, ಡಾ. ಇಂದ್ರನಿಲ್ ಖಾ, ಲೋಕನಾಥ್ ಚಟ್ಟೋಪಾಧ್ಯಾಯ ಮತ್ತು ದೇಬ್ತಾನು ಭಟ್ಟಾಚಾರ್ಯರಂತಹ ಯುವ ಮುಖಗಳಿಗೆ ರಾಜ್ಯ ಸಮಿತಿಯಲ್ಲಿ ಅವಕಾಶ ಸಿಗುವ ಸಾಧ್ಯತೆ ಇದೆ. ಲಭ್ಯವಾಗಿರುವ ಮಾಹಿತಿ ಪ್ರಕಾರ, ಆರ್ಎಸ್ಎಸ್ಗೆ ಹತ್ತಿರ ಇರುವ ಮುಖಗಳಿಗೆ ರಾಜ್ಯ ಸಮಿತಿಯಲ್ಲಿ ಚಾನ್ಸ್ ಸಿಗುವ ಸಾಧ್ಯತೆ ಇದೆ.
ಇದನ್ನೂ ಓದಿರಿ: ಚೀನಾಗೆ ಕೌಂಟರ್ ನೀಡಲು ಹೊಸ ಆಯುಧ.. ಭಾರತೀಯ ಸೇನೆಗೆ ತ್ರಿಶೂಲ್, ವಜ್ರ!
ಪಶ್ಚಿಮ ಬಂಗಾಳ ರಾಜ್ಯ ಸಮಿತಿ ಕಾರ್ಯನಿರ್ವಹಣೆ ಬಗ್ಗೆ ಈಗಾಗಲೇ ಆರ್ಎಸ್ಎಸ್ ಅತೃಪ್ತಿ ಹೊಂದಿದೆ. 2021ರ ಸೋಲಿನ ನಂತರ ಈಗಾಗಲೇ ತನ್ನ ಅಸಮಾಧಾನ ಸಹ ಹೊರ ಹಾಕಿದೆ. ಮುನ್ಸಿಪಲ್ ಕಾರ್ಪೊರೇಷನ್ನಲ್ಲಿ ಪ್ರಮುಖವಾಗಿ ಹೌರಾ ಮತ್ತು ಕೋಲ್ಕತ್ತಾ ಮೇಲೆ ಹೆಚ್ಚಿನ ಗಮನ ಹರಿಸಲು ನಿರ್ಧರಿಸಲಾಗಿದೆ.
ಹೀಗಾಗಿ, ಉತ್ತರ ಕೋಲ್ಕತ್ತಾ ಜಿಲ್ಲಾ ಅಧ್ಯಕ್ಷರಾಗಿರುವ ಶಿಬಾಜಿ ಸಿನ್ಹರಾಯ್ ಅವರ ಸ್ಥಾನಕ್ಕೆ ಸಜಲ್ ಘೋಷ್, ದಕ್ಷಿಣ ಕೋಲ್ಕತ್ತಾ ಜಿಲ್ಲಾ ಅಧ್ಯಕ್ಷರಾಗಿ ಇಂದ್ರಜಿತ್ ಖಾಟಿಕ್ ಅಧಿಕಾರ ವಹಿಸಿಕೊಳ್ಳಬಹುದು ಎನ್ನಲಾಗಿದೆ.
ಇದಕ್ಕೆ ಸಂಬಂಧಿಸಿದಂತೆ ಮಾತನಾಡಿರುವ ಬಿಜೆಪಿ ರಾಜ್ಯಾಧ್ಯಕ್ಷ ಸುಕಾಂತ್ ಮಜುಂದಾರ್, ನಿರ್ದಿಷ್ಟ ಹುದ್ದೆಯಲ್ಲಿರುವ ಕೆಲವರ ಹುದ್ದೆ ಬದಲಾವಣೆ ಮಾಡುವುದು ಬಿಜೆಪಿ ಸಂಪ್ರದಾಯ. ದೀಪಾವಳಿ ಮುಗಿದ ಬಳಿಕ ಈ ಪ್ರಕ್ರಿಯೆ ಆರಂಭವಾಗಲಿದೆ. ಪಕ್ಷದ ಹೈಕಮಾಂಡ್ ನಿರ್ದೇಶನದಂತೆ ಎಲ್ಲವೂ ಬದಲಾವಣೆಯಾಗಲಿದೆ ಎಂದಿದ್ದಾರೆ.
