ನವದೆಹಲಿ: ವಿವಿಧ ಸಂಘಸಂಸ್ಥೆಗಳು, ಶ್ರೀಮಂತರು, ದಾನಿಗಳಿಂದ ದೇಣಿಗೆಯಾಗಿ ವಿಶ್ವದ ಅತಿದೊಡ್ಡ ಪಕ್ಷವಾದ ಬಿಜೆಪಿ 614 ಕೋಟಿ ರೂಪಾಯಿ ಸ್ವೀಕರಿಸಿದೆ. ಇದು ಕಳೆದ ವರ್ಷಕ್ಕಿಂತಲೂ ಶೇ.29 ರಷ್ಟು ಹೆಚ್ಚಾಗಿದೆ. ಸ್ವಾತಂತ್ರ್ಯ ಕಾಲದ ಹಳೆಯ ಪಕ್ಷವಾದ ಕಾಂಗ್ರೆಸ್ 2ನೇ ಅತ್ಯಧಿಕ ದೇಣಿಗೆಯಾಗಿ 95 ಕೋಟಿ ರೂಪಾಯಿ ಪಡೆದಿದೆ. ಆದರೆ, ಇದು ಕೇಸರಿ ಪಡೆಗಿಂತಲೂ 6 ಪಟ್ಟು ಕಡಿಮೆಯಾಗಿದೆ.
ಭಾರತದ ಚುನಾವಣಾ ಆಯೋಗದ ವೆಬ್ಸೈಟ್ನಲ್ಲಿ ರಾಷ್ಟ್ರದ 7 ವಿವಿಧ ರಾಜಕೀಯ ಪಕ್ಷಗಳು ದೇಣಿಗೆ ಪಡೆದ ಮಾಹಿತಿಯನ್ನು ಹಂಚಿಕೊಂಡಿವೆ. ಇದರಲ್ಲಿ ಕಾಂಗ್ರೆಸ್ ಬಿಜೆಪಿಗಿಂತಲೂ ಕಡಿಮೆ ದೇಣಿಗೆ ಪಡೆದಿದೆ. ಮಾಯಾವತಿ ನೇತೃತ್ವದ ಬಿಎಸ್ಪಿ ಶೂನ್ಯ ದೇಣಿಗೆ ಪಟ್ಟಿಯಲ್ಲಿದೆ.
ಅತಿಹೆಚ್ಚು ದೇಣಿಗೆ ಪಡೆದ ಬಿಜೆಪಿ ಆದಾಯ ಕಳೆದ ವರ್ಷಕ್ಕಿಂತಲೂ ಅಧಿಕವಾಗಿದೆ. 2021 ರಲ್ಲಿ 477 ಕೋಟಿ ರೂಪಾಯಿ ಹರಿದು ಬಂದಿತ್ತು. ಇದು ಈ ಬಾರಿ 614.53 ಕೋಟಿಗೆ ತಲುಪಿದೆ. 2ನೇ ಸ್ಥಾನದಲ್ಲಿರುವ ಕಾಂಗ್ರೆಸ್ ಕಳೆದ ಬಾರಿ 74 ಕೋಟಿ ಪಡೆದರೆ, ಈ ಬಾರಿ 95.46 ಕೋಟಿ ರೂಪಾಯಿ ಪಡೆದು ಕೊಂಡಿದೆ.
ಬಿಎಸ್ಪಿಗೆ ಅತಿ ಕಡಿಮೆ ದೇಣಿಗೆ: ಚುನಾವಣಾ ಆಯೋಗಕ್ಕೆ ನೀಡಿದ ಮಾಹಿತಿಯಂತೆ ಮಾಯಾವತಿ ಅವರ ಬಹುಜನ ಸಮಾಜ ಪಕ್ಷ(ಬಿಎಸ್ಪಿ) ಕೇವಲ 20 ಸಾವಿರ ರೂಪಾಯಿ ಮಾತ್ರ ಪಡೆದುಕೊಂಡಿದೆ. ಇದು ಸಾಮಾನ್ಯ ಜನರೇ ನೀಡಿದ ಅಲ್ಪಮೊತ್ತವಾಗಿದೆ.
ಇನ್ನುಳಿದಂತೆ ಪಶ್ಚಿಮ ಬಂಗಾಳದಲ್ಲಿ ಅಧಿಕಾರದಲ್ಲಿರುವ ತೃಣಮೂಲ ಕಾಂಗ್ರೆಸ್(ಟಿಎಂಸಿ) 43 ಲಕ್ಷ ರೂಪಾಯಿ, ಕೇರಳದ ಸಿಪಿಐ(ಎಂ) 10.5 ಕೋಟಿ, ಶರದ್ ಪವಾರ್ ನೇತೃತ್ವದ ಎನ್ಸಿಪಿ 57.90 ಕೋಟಿ, ದೆಹಲಿ, ಪಂಜಾಬ್ನಲ್ಲಿ ಸರ್ಕಾರ ನಡೆಸುತ್ತಿರುವ ಅರವಿಂದ್ ಕೇಜ್ರಿವಾಲ್ ಅವರ ಆಮ್ ಆದ್ಮಿ ಪಕ್ಷ(ಆಪ್) 44.54 ಕೋಟಿ ರೂಪಾಯಿ ದೇಣಿಗೆ ಪಡೆದಿದೆ. ಇದರಲ್ಲಿ ಅಕ್ಟೋಬರ್ ತಿಂಗಳವರೆಗೂ 30.30 ಕೋಟಿ ಖರ್ಚಾಗಿರುವುದನ್ನು ಪಕ್ಷ ತೋರಿಸಿದೆ. ಸಿಪಿಐ ಇನ್ನೂ ಯಾವುದೇ ದೇಣಿಗೆಯ ಲೆಕ್ಕಾಚಾರ ನೀಡಿಲ್ಲ.
ದೇಶದಲ್ಲಿರುವ 8 ರಾಷ್ಟ್ರೀಯ ಪಕ್ಷಗಳು ಸೇರಿದಂತೆ ವಿವಿಧ ಪಕ್ಷಗಳು 2021-22 ರ ಸಾಲಿನಲ್ಲಿ ಒಟ್ಟಾರೆ 778.73 ಕೋಟಿ ರೂಪಾಯಿ ದೇಣಿಗೆಯನ್ನು ವಿವಿಧ ಮೂಲಗಳಿಂದ ಸಂಗ್ರಹಿಸಿವೆ. ಬಿಜೆಪಿಗೆ 4,957 ದೇಣಿಗೆಗಳಿಂದ 614.52 ಕೋಟಿ ಬಂದರೆ, ಕಾಂಗ್ರೆಸ್ 1,257 ದೇಣಿಗೆಗಳಿಂದ 95.45 ಕೋಟಿ ರೂಪಾಯಿ ಪಡೆದಿದೆ. ಈ ಎರಡು ಪ್ರಮುಖ ರಾಜಕೀಯ ಪಕ್ಷಗಳು ಒಟ್ಟಾರೆ ದೇಣಿಗೆಯಲ್ಲಿ ಶೇ.90 ರಷ್ಟು ಪಾಲು ಹೊಂದಿವೆ.
ಓದಿ: ಆಟವಾಡಲು ಹೊರ ಬಂದ ಬಾಲಕನ ತಲೆ ಸೀಳಿ ಮೆದುಳು ತಿಂದು ಹಾಕಿದ ಬೀದಿ ನಾಯಿಗಳು!
