ಸೂರತ್ (ಗುಜರಾತ್): ಬಾಲಿವುಡ್ ಸಿನಿಮಾ 'ಪ್ಯಾಡ್ ಮ್ಯಾನ್' ಬಿಡುಗಡೆಯಾಗುವ ಐದು ವರ್ಷಗಳ ಮೊದಲೇ 'ಪ್ಯಾಡ್ ದಾದಿ' ಎಂದೇ ಹೆಸರಾದ ಮೀನಾ ಮೆಹ್ತಾ ಎಂಬುವರು ಸೂರತ್‌ನ ಹಿಂದುಳಿದ ವರ್ಗದ ಹುಡುಗಿಯರಿಗೆ, ಮಹಿಳೆಯರಿಗೆ ಉಚಿತವಾಗಿ ಸ್ಯಾನಿಟರಿ ಪ್ಯಾಡ್ಗಳನ್ನ ವಿತರಿಸುತ್ತಾ ಬಂದಿದ್ದಾರೆ.
ಪ್ರತಿ ತಿಂಗಳು ಅವರು ವಿವಿಧ ಸರ್ಕಾರಿ ಶಾಲೆಗಳಲ್ಲಿ ಓದುತ್ತಿರುವ ಬಾಲಕಿಯರಿಗೆ 5,000 ಸ್ಯಾನಿಟರಿ ಪ್ಯಾಡ್ಗಳನ್ನ ವಿತರಿಸುತ್ತಾರೆ. ಪ್ರಧಾನಿ ನರೇಂದ್ರ ಮೋದಿಯವರು ತಮ್ಮ ರೇಡಿಯೋ ಕಾರ್ಯಕ್ರಮ 'ಮನ್ ಕಿ ಬಾತ್' ಹಾಗೂ ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆಯ ಅಂಗವಾಗಿ ಪಿಎಂ ಮೋದಿ ನಡೆಸುತ್ತಿರುವ #SheInspiresUs ಎಂಬ ಅಭಿಯಾನದ ಮೂಲಕ ಮೀನಾ ಮೆಹ್ತಾ ಅವರ ಸಾಮಾಜಿಕ ಸೇವೆಯನ್ನ ಬೆಳಕಿಗೆ ತಂದಿದ್ದಾರೆ.
ಇವರ ಈ ಕಾರ್ಯಕ್ಕೆ ಪತಿ ಅತುಲ್ ಮೆಹ್ತಾ ಕೂಡ ಸಾಥ್ ನೀಡಿದ್ದು, ಸರ್ಕಾರಿ ಅನುದಾನಿತ ಶಾಲೆಗಳಿಗೆ ಭೇಟಿ ನೀಡಿ, ಬಾಲಕಿಯರಲ್ಲಿ ವೈಯಕ್ತಿಕ ನೈರ್ಮಲ್ಯವನ್ನು ಉತ್ತೇಜಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದ್ದಾರೆ. ಈವೆರೆಗೂ ಒಟ್ಟು ನಾಲ್ಕು ಲಕ್ಷ 'ಮ್ಯಾಜಿಕ್ ಕಿಟ್'ಗಳನ್ನು ವಿತರಿಸಿದ್ದಾರೆ. ಇವರ ಈ 'ಮ್ಯಾಜಿಕ್ ಕಿಟ್'ನಲ್ಲಿ ಬಾಲಕಿಯರ ಒಳ ಉಡುಪುಗಳು, ಶ್ಯಾಂಪೂ ಪ್ಯಾಕೆಟ್ಗಳು, ಸಾಬೂನುಗಳು ಹಾಗೂ ಸ್ಯಾನಿಟರಿ ಪ್ಯಾಡ್ಗಳು ಇರುತ್ತವೆ.
ಈಟಿವಿ ಭಾರತದ ಜೊತೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮೀನಾ ಮೆಹ್ತಾ ಅವರು ತಮ್ಮ ಸವಾಲಿನ ಪಯಣದ ಅನುಭವ ಹಂಚಿಕೊಂಡಿದ್ದಾರೆ. ಒಂದು ದಿನ ಡಸ್ಟ್‌ ಬಿನ್ನಲ್ಲಿ ಎಸೆಯಲಾಗಿದ್ದ ಪ್ಯಾಡ್ಅನ್ನು ಹುಡುಗಿಯೊಬ್ಬಳು ಎತ್ತಿಕೊಳ್ಳುವುದನ್ನು ನೋಡಿದೆ. ಬಳಿಕ ಆಕೆಯೊಂದಿಗೆ ಮಾತನಾಡಿದಾಗ, ನನಗೆ ಹೊಸ ಪ್ಯಾಡ್ಗಳನ್ನ ಖರೀದಿಸುವ ಶಕ್ತಿಯಿಲ್ಲ. ಹೀಗಾಗಿ ಇನ್ನೊಬ್ಬರು ಬಳಸಿ ಬಿಸಾಕಿದ್ದನ್ನು ತೆಗೆದುಕೊಂಡು, ಅದನ್ನು ತೊಳೆದು ಮರುಬಳಕೆ ಮಾಡುವೆ ಎಂದು ಹೇಳಿದಳು. ಈ ಘಟನೆಯಿಂದ ಪ್ರೇರಿತಳಾಗಿ ಅಂದಿನಿಂದ ಹೆಣ್ಣುಮಕ್ಕಳಿಗೆ ಉಚಿತ ಸ್ಯಾನಿಟರಿ ಪ್ಯಾಡ್ಗಳನ್ನ ವಿತರಿಸಲು ನಿರ್ಧರಿಸಿದೆ. 2013ರಲ್ಲಿ ಈ ಕಾರ್ಯ ಪ್ರಾರಂಭಿಸಿದ್ದು, ಕಳೆದ ಏಳು ವರ್ಷಗಳಿಂದ ಮುಂದುವರೆಸಿಕೊಂಡು ಬಂದಿದ್ದೇನೆ ಎಂದು ಮಾಹಿತಿ ನೀಡಿದರು.
ಪ್ರಾರಂಭದಲ್ಲಿ ನನ್ನ ಪತಿ ಬಡ ಹುಡುಗಿಯರಿಗಾಗಿ ಸ್ಯಾನಿಟರಿ ಪ್ಯಾಡ್ಗಳನ್ನು ಕೊಳ್ಳಲು 25 ಸಾವಿರ ರೂಪಾಯಿಗಳನ್ನ ನೀಡಿದ್ದರು. ನಮಗೆ ಸಾಕಷ್ಟು ಆರ್ಥಿಕ ಸಂಕಷ್ಟ ಎದುರಾಯಿತು. ಆದರೆ ಎಂದಿಗೂ ಈ ಸೇವೆಯಿಂದ ಹಿಂದೆ ಸರಿಯಬಾರದು ಎಂದು ನಿರ್ಧರಿಸಿದೆವು. ಇದೀಗ ನಮ್ಮ ಕಾರ್ಯವನ್ನು ಪ್ರಧಾನಿ ಮೋದಿಯವರು ಗುರುತಿಸಿದ್ದಾರೆ. ಆರ್ಥಿಕವಾಗಿ ಬಲವಾಗಿರುವವರು ಈ ರೀತಿಯ ಸಮಾಜ ಸೇವೆಯಲ್ಲಿ ತಮ್ಮನ್ನು ತೊಡಗಿಸಿಕೊಂಡು ಇತರರ ಬಾಳಿಗೆ ಬೆಳಕಾಗಲಿ ಎಂಬುದೇ ನಮ್ಮ ಆಶಯ ಎಂದು ಮೆಹ್ತಾ ಹೇಳುತ್ತಾರೆ.
ಮೆಹ್ತಾ ದಂಪತಿ ಸ್ಥಾಪಿಸಿರುವ 'ಮಾನುನಿ' ಎಂಬ ಟ್ರಸ್ಟ್‌ನ ಅಡಿಯಲ್ಲಿ ಈ ಕಾರ್ಯ ಮಾಡುತ್ತಾ ಬಂದಿದ್ದು, ಇದಕ್ಕೆ ಪ್ರಶಂಸೆ ವ್ಯಕ್ತಪಡಿಸಿರುವ 'ಪ್ಯಾಡ್ ಮ್ಯಾನ್' ಸಿನಿಮಾದಲ್ಲಿ ನಟಿಸಿದ್ದ ಬಾಲಿವುಡ್ ನಟ ಅಕ್ಷಯ್ ಕುಮಾರ್, ಟ್ರಸ್ಟ್‌ಗೆ 5 ಲಕ್ಷ ರೂ. ದೇಣಿಗೆ ನೀಡಿದ್ದಾರೆ.
