ಪುಣೆ: ಮಹಾರಾಷ್ಟ್ರದ 40 ವರ್ಷದ ಮಹಿಳೆಯೊಬ್ಬರಿಗೆ ಕೊರೊನಾ ಸೋಂಕು ತಗುಲಿರುವುದಾಗಿ ಹಿರಿಯ ಅಧಿಕಾರಿಗಳು ದೃಢಪಡಿಸಿದ್ದಾರೆ.
ಭಾರತಿ ಆಸ್ಪತ್ರೆಯಲ್ಲಿ ಅನಾರೋಗ್ಯದಿಂದ ದಾಖಲಾಗಿದ್ದ ಮಹಿಳೆಗೆ ಎಚ್1ಎನ್1 ಇರಬಹುದೆಂಬ ಶಂಕೆಯ ಮೇರೆಗೆ ಆಕೆಯ ಗಂಟಲಿನ ದ್ರವದ ಮಾದರಿಯನ್ನು ರಾಷ್ಟ್ರೀಯ ವೈರಾಲಜಿ ಸಂಸ್ಥೆಗೆ ಕಳುಹಿಸಲಾಗಿತ್ತು. ಆದರೆ ಫಲಿತಾಂಶದಲ್ಲಿ ಕೊವಿಡ್-19 ಇರುವುದು ವರದಿಯಾಗಿದೆ.
ವಿಶೇಷವೆಂದರೆ ಈ ಮಹಿಳೆ ಯಾವುದೇ ವಿದೇಶ ಪ್ರಯಾಣ ಬೆಳೆಸಿ ಬಂದಿಲ್ಲ. ಆದರೆ ಮಾ.3 ರಂದು ಮದುವೆ ಸಮಾರಂಭದಲ್ಲಿ ಪಾಲ್ಗೊಳ್ಳಲು ನವಿ ಮುಂಬಯಿಯ ವಾಶಿಗೆ ತೆರಳಿ ಬಂದಿದ್ದರು. ಈ ಮಹಿಳೆ ಖಂಡಿತವಾಗಿಯೂ ವಿದೇಶಕ್ಕೆ ಪ್ರಯಾಣ ಬೆಳೆಸಿ ಬಂದವರನ್ನು ಸಂಪರ್ಕಿಸಿರುತ್ತಾರೆ. ಮುಂಬೈಗೆ ಆಕೆ ಬೆಳೆಸಿದ ಕ್ಯಾಬ್ ಪ್ರಯಾಣದ ವಿವರಗಳನ್ನು ಪರಿಶೀಲಿಸಲಾಗುತ್ತಿದೆ. ಹಾಗೂ ಈ ಪ್ರಕರಣವನ್ನು ಹೆಚ್ಚಿನ ತನಿಖೆಗಾಗಿ ಉನ್ನತ ಅಧಿಕಾರಿಗಳಿಗೆ ವಹಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ನೇವಲ್ ಕಿಶೋರ್ ರಾಮ್ ಹೇಳಿದ್ದಾರೆ.
