ಮಹಿಳಾ ಎಸ್​ಐ ಮೇಲೆ ಪೊಲೀಸ್​ ಇನ್ಸ್​ಪೆಕ್ಟರ್​ನಿಂದ​ ಅತ್ಯಾಚಾರ ಆರೋಪ!

ಅತ್ಯಾಚಾರ, ದೌರ್ಜನ್ಯಕ್ಕೊಳಗಾಗುವ ಮಹಿಳೆಯರನ್ನು ರಕ್ಷಿಸಬೇಕಾದ ಪೊಲೀಸ್​ವೋರ್ವ ಹೀನ ಕೃತ್ಯವೆಸಗಿರುವ ಆರೋಪ ಕೇಳಿಬಂದಿದೆ. ಮದುವೆಯಾಗುವುದಾಗಿ ನಂಬಿಸಿ ಮಹಿಳಾ ಪೊಲೀಸ್​​ ಸಬ್​ಇನ್ಸ್​​​ಪೆಕ್ಟರ್​ ಮೇಲೆ ಇನ್ಸ್​ಪೆಕ್ಟರ್​ ಅತ್ಯಾಚಾರವೆಸಗಿರುವ ಕುರಿತು ಉತ್ತರ ಪ್ರದೇಶದಲ್ಲಿ ದೂರು ದಾಖಲಾಗಿದೆ.

ಮುಜಾಫರ್​ನಗರ(ಯುಪಿ): ಮಹಿಳಾ ಸಬ್​​ ಇನ್ಸ್​ಪೆಕ್ಟರ್​ ಮೇಲೆ ಇನ್ಸ್​ಪೆಕ್ಟರ್​ವೋರ್ವ ಅತ್ಯಾಚಾರವೆಸಗಿರುವ ಆರೋಪ ಪ್ರಕರಣ ಉತ್ತರಪ್ರದೇಶದ ಮುಜಾಫರ್​ನಗರದಲ್ಲಿ ನಡೆದಿದೆ. ಈ ಘಟನೆಗೆ ಸಂಬಂಧಿಸಿದಂತೆ ಪ್ರಕರಣ ದಾಖಲಾಗಿದೆ.

ಮದುವೆಯಾಗುವುದಾಗಿ ನಂಬಿಸಿ ಪೊಲೀಸ್​ ಇನ್ಸ್​ಪೆಕ್ಟರ್​ ಈ ಕೃತ್ಯವೆಸಗಿರುವುದಾಗಿ ಮಹಿಳಾ ಎಸ್​ಐ ಮಿರಾನ್​ಪುರ್​ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಕಳೆದ ವರ್ಷ ಮಾರ್ಚ್​ ತಿಂಗಳಲ್ಲಿ ಘಾಜಿಯಾಬಾದ್​ನ ಭೋಪುರ್​​ ಗ್ರಾಮದಲ್ಲಿ ಈ ಘಟನೆ ನಡೆದಿದ್ದಾಗಿ ಸಂತ್ರಸ್ತೆ ಹೇಳಿಕೊಂಡಿದ್ದಾರೆ. ಮಹಿಳಾ ಎಸ್​ಐಗೆ ಈಗಾಗಲೇ ವೈದ್ಯಕೀಯ ಪರೀಕ್ಷೆ ನಡೆಸಲಾಗಿದ್ದು, ಪೊಲೀಸ್​ ಇನ್ಸ್​ಪೆಕ್ಟರ್​​​ ಸಂದೀಪ್​ ಚೌಹಾಣ್​ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾಗಿ ಪೊಲೀಸ್​ ವರಿಷ್ಠಾಧಿಕಾರಿ ಹೆಚ್​ ಎನ್​ ಸಿಂಗ್​ ತಿಳಿಸಿದ್ದಾರೆ.

ಮಿರಾನ್​ಪುರ್​​ ನಿವಾಸಿಯಾಗಿರುವ ಮಹಿಳಾ ಎಸ್​ಐ ಈಗಾಗಲೇ ಪೊಲೀಸ್ ಇನ್ಸ್​ಪೆಕ್ಟರ್​ ಸಂದೀಪ್​ ಚೌಹಾಣ್​​ಗೆ 5 ಲಕ್ಷ ನಗದು ಹಣ ಹಾಗೂ ನಿಶ್ಚಿತಾರ್ಥದ ಹೆಸರಿನಲ್ಲಿ ಗಿಫ್ಟ್​ ಕೂಡ ನೀಡಿದ್ದಾಗಿ ತಿಳಿದು ಬಂದಿದೆ. ಮಾಹಿತಿ ಪ್ರಕಾರ ಇವರಿಬ್ಬರ ಮದುವೆ ಬರುವ ಏಪ್ರಿಲ್​ ತಿಂಗಳ 21ರಂದು ನಡೆಯಬೇಕಾಗಿತ್ತು. ಆದರೆ ಎಸ್​ಐ ಜತೆ ದೈಹಿಕ ಸಂಪರ್ಕ ಬೆಳೆಸಿದ ಬಳಿಕ ಆತ ಮದುವೆ ಮಾಡಿಕೊಳ್ಳಲು ನಿರಾಕರಿಸಿದ್ದಾರೆ ಎಂದು ತಿಳಿದು ಬಂದಿದೆ. ಹೀಗಾಗಿ ಮಹಿಳಾ ಎಸ್​​ಐ ದೂರು ನೀಡಿದ್ದಾರೆ.