ಜೈಲಿನಲ್ಲಿ ಬೇವಿನ ಎಲೆ, ಅಲೋವೆರಾದಿಂದ ಸ್ಯಾನಿಟೈಸರ್​ ತಯಾರಿಸುತ್ತಿದ್ದಾರೆ ಕೈದಿಗಳು!

ವಾರಣಾಸಿ ಜಿಲ್ಲಾ ಜೈಲಿನಲ್ಲಿ ಲಭ್ಯವಿರುವ ನೈಸರ್ಗಿಕ ಉತ್ಪನ್ನಗಳನ್ನು ಬಳಸಿಕೊಂಡು ಕೈದಿಗಳಿಂದ ಸ್ಯಾನಿಟೈಸರ್ ತಯಾರಿಲಾಗುತ್ತಿದೆ.

ವಾರಣಾಸಿ: ಅಪರಾಧ ಎಸಗಿ ಜೈಲು ಶಿಕ್ಷೆ ಅನುಭವಿಸುತ್ತಿರುವ ವಾರಣಾಸಿ ಜಿಲ್ಲಾ ಕಾರಾಗೃಹದಲ್ಲಿರುವ ಕೈದಿಗಳು ನೈಸರ್ಗಿಕ ಸಂಪನ್ಮೂಲಗಳನ್ನು ಬಳಸಿಕೊಂಡು ಹ್ಯಾಂಡ್ ಸ್ಯಾನಿಟೈಸರ್​ ಮತ್ತು ಮಾಸ್ಕ್​ಗಳನ್ನು ತಯಾರಿಸುವ ಮೂಲಕ ಕೊರೊನಾ ವೈರಸ್ ವಿರುದ್ಧದ ಹೋರಾಟದಲ್ಲಿ ಭಾಗಿಯಾಗಿದ್ದಾರೆ.

ಜೈಲಿನಲ್ಲಿ 1,800ಕ್ಕೂ ಹೆಚ್ಚು ಕೈದಿಗಳಿದ್ದು, ಅವರಲ್ಲಿ ಹೆಚ್ಚಿನವರು ಸಾಂಕ್ರಾಮಿಕ ರೋಗದ ವಿರುದ್ಧ ಹೋರಾಟಕ್ಕೆ ಕೈಜೋಡಿಸಿದ್ದಾರೆ. ಕೇವಲ ಮಾಸ್ಕ್​ ಮಾತ್ರವಲ್ಲದೆ, ಹ್ಯಾಂಡ್ ಸ್ಯಾನಿಟೈಸರ್​​ಗಳನ್ನೂ ತಯಾರಿಸುತ್ತಿದ್ದಾರೆ ಎಂದು ಜೈಲರ್​ ಬಿಬಿ ಪಾಂಡೆ ಮಾಹಿತಿ ನೀಡಿದ್ದಾರೆ.

ಜೈಲಿನಲ್ಲಿ ಲಭ್ಯವಿರುವ ನೈಸರ್ಗಿಕ ಸಂಪನ್ಮೂಲಗಳಿಂದಲೇ ಸ್ಯಾನಿಟೈಸರ್​ ತಯಾರಿಸಲಾಗುತ್ತಿದೆ. ಬೇವಿನ ಎಲೆ, ಅಲೋವೆರಾ ಮತ್ತು ತೋಟದಲ್ಲಿನ ಇತರ ಹೂವುಗಳನ್ನು ಬೆರೆಸಿ ಕುದಿಸಲಾಗುತ್ತದೆ. ನಂತರ ಸ್ಪಲ್ಪ ಸ್ಪಿರಿಟ್​​ಅನ್ನು ಮಿಶ್ರಣಕ್ಕೆ ಸೇರಿಸಲಾಗುತ್ತದೆ. ಅಗತ್ಯವಿರುವ ಜನರಿಗೆ ಸಹಾಯ ಮಾಡುವ ಸಲುವಾಗಿ ಜೈಲು ಅಧಿಕಾರಿಗಳು ಈ ಉತ್ಪನ್ನಗಳನ್ನು ಕಳುಹಿಸಲು ತೀರ್ಮಾನಿಸಿದ್ದಾರೆ.