ವಯನಾಡ್: ಕೇರಳದ ವಯನಾಡ್ ಜಿಲ್ಲೆಯ ಪುಲಿಯರ್ಮಲಾ ಮೂಲದ ಯುವಕ ಒಂದೇ ಕಾಲಿನಿಂದ ಡ್ಯಾನ್ಸ್ ಮಾಡುವ ಮೂಲಕ ಗಮನ ಸೆಳೆಯುತ್ತಿದ್ದಾನೆ.
ಸ್ವರೂಪ್ ಆರು ತಿಂಗಳ ಹಿಂದೆ ರಸ್ತೆ ಅಪಘಾತದಲ್ಲಿ ಒಂದು ಕಾಲು ಕಳೆದುಕೊಂಡಿದ್ದಾನೆ. ಫೆಬ್ರವರಿ 2020ರಲ್ಲಿ ಈತನ ಬೈಕ್, ಕಾರಿಗೆ ಡಿಕ್ಕಿ ಹೊಡೆದ ಪರಿಣಾಮ ಈತನಿಗೆ ಗಂಭೀರ ಗಾಯಗಳಾಗಿತ್ತು. ಬಳಿಕ ಮೂರು ತಿಂಗಳ ಕಾಲ ಚಿಕಿತ್ಸೆ ಪಡೆದರೂ ಒಂದು ಕಾಲನ್ನು ಅನಿವಾರ್ಯವಾಗಿ ವೈದ್ಯರು ಕತ್ತರಿಸಿ ತೆಗೆಯಬೇಕಾಗಿತ್ತು.
ಸಿನಿಮಾ, ಮಾಡೆಲಿಂಗ್ ಮತ್ತು ಡ್ಯಾನ್ಸ್ನಲ್ಲಿ ಹೆಸರು ಮಾಡಬೇಕೆಂಬ ಕನಸು ಮತ್ತು ಗುರಿ ಸ್ವರೂಪ್‌ಗಿದೆ. ಆದ್ರೆ ಈ ಅಪಘಾತದಿಂದ ಆತನ ಕನಸೆಲ್ಲಾ ಕಮರಿಹೋಗಿದೆ ನಿಜ. ಆದ್ರೂ ಛಲ ಬಿಡದ ಯುವಕ ಒಂದೇ ಕಾಲಿನಿಂದ ಡ್ಯಾನ್ಸ್ ಮಾಡುವ ಮೂಲಕ ತನ್ನ ಗುರಿಯತ್ತ ದಾಪುಗಾಲಿಟ್ಟಿದ್ದಾನೆ.
ಚಿಕಿತ್ಸೆಯ ನಂತರ ಸ್ವರೂಪ್ ಮನೆಗೆ ಬಂದಾಗ, ಪೋಷಕರು, ಸಂಬಂಧಿಕರು ಮತ್ತು ಸ್ನೇಹಿತರು ಬೆಂಬಲವಾಗಿ ನಿಂತರು. ಅಲ್ಲದೇ ತನ್ನ ಹಳೆಯ ಡ್ಯಾನ್ಸ್ ಕ್ಲಬ್ ಅನ್ನು ಮತ್ತೆ ಪ್ರಾರಂಭಿಸಲು ಸಹಾಯ ಮಾಡಿದರು. ನಂತರ ಸ್ವರೂಪ್ ನೃತ್ಯಾಭ್ಯಾಸ ಪ್ರಾರಂಭಿಸಿದ್ದಾನೆ. ಈತನ ಡ್ಯಾನ್ಸ್ ವಿಡಿಯೋಗಳನ್ನು ಸ್ನೇಹಿತರು ಯುಟ್ಯೂಬ್‌ಗೆ ಅಪ್ಲೋಡ್ ಮಾಡುತ್ತಿದ್ದು, ಜನಮೆಚ್ಚುಗೆ ಗಳಿಸುತ್ತಿದ್ದಾನೆ. ಈಗ ಯುವಕನಿಗೆ ಕೃತಕ ಅಂಗದ ಅವಶ್ಯಕತೆಯಿದೆ. ಸ್ವರೂಪ್ ಮೊದಲಿನಂತೆ ನೃತ್ಯ ಮಾಡಬೇಕಾದ್ರೆ, ಸುಮಾರು 24 ಲಕ್ಷ ರೂ. ಖರ್ಚು ಮಾಡಿ ಚಿಕಿತ್ಸೆ ಪಡೆಯಬೇಕಾಗಿದೆ.
