ಹೈದರಾಬಾದ್: ಪಾಕಿಸ್ತಾನಿ ಸೈನಿಕರನ್ನು ಬಗ್ಗುಬಡೆದು, ಟೈಗರ್ ಹಿಲ್ ಮೇಲೆ ಮತ್ತೆ ತ್ರಿವರ್ಣ ಧ್ವಜ ನೆಟ್ಟ ನಮ್ಮ ಯೋಧರು 1999 ರ ಜುಲೈ 26ರಂದು ಕಾರ್ಗಿಲ್ ಯುದ್ಧ ಗೆದ್ದ ಸಂಭ್ರಮದಲ್ಲಿದ್ದರು. ಇಂದಿಗೆ ಕಾರ್ಗಿಲ್ ಯುದ್ಧದ ವಿಜಯೋತ್ಸವಕ್ಕೆ 21 ವರ್ಷ.
ಆದರೆ ಕಾರ್ಗಿಲ್ ಕದನವು ಹೆಚ್ಚಿನ ಸಂಖ್ಯೆಯ ಸಾವು-ನೋವಿಗೆ ಕಾರಣವಾಯಿತು. ಭಾರತದ ಸೇನೆಯ 4 ನೇ ಬೆಟಾಲಿಯನ್‌ನ ಜಾಟ್ ರೆಜಿಮೆಂಟಿನ ಕ್ಯಾಪ್ಟನ್ ಆಗಿದ್ದ ಸೌರಭ್ ಕಾಲಿಯಾ ಸೇರಿ, ಐವರು ಯೋಧರನ್ನು ಪಾಕ್ ಸೇನೆ ಹತ್ಯೆಗೈದ ವಿಚಾರ ಇಂದಿಗೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಚರ್ಚೆಯಲ್ಲಿದೆ. ಕ್ಯಾಪ್ಟನ್ ಸೌರಭ್ ಕಾಲಿಯಾ ಅವರನ್ನು ಯುದ್ಧ ಕೈದಿಯಾಗಿ ಪಾಕಿಸ್ತಾನಿ ಸೇನೆ ವಶಕ್ಕೆ ಪಡೆಯಿತು. ಚಿತ್ರಹಿಂಸೆ ನೀಡಿ, ಅಂಗಛೇದನ ಮಾಡಿ, ಕ್ರೂರತೆ ಮೆರಿಯಿತು. ಆದರೆ ಪಾಕಿಸ್ತಾನ ಮಾತ್ರ ಈ ವಿಚಾರವನ್ನು ನಿರಾಕರಿಸುತ್ತಲೇ ಬಂದಿದೆ.
ಭಾರತಾಂಬೆಯ ಹೆಮ್ಮೆಯ ಪುತ್ರ ಕ್ಯಾಪ್ಟನ್ ಸೌರಭ್ ಕಾಲಿಯಾ :
ಕ್ಯಾಪ್ಟನ್ ಸೌರಭ್ ಕಾಲಿಯಾ ಪಂಜಾಬ್‌ನ ಅಮೃತಸರದವರಾಗಿದ್ದು, ಯುಪಿಎಸ್‌ಸಿ ನಡೆಸಿದ ಸಂಯೋಜಿತ ರಕ್ಷಣಾ ಸೇವೆಗಳ ಪರೀಕ್ಷೆಯ ಮೂಲಕ ಭಾರತೀಯ ಮಿಲಿಟರಿ ಅಕಾಡೆಮಿಗೆ ಆಯ್ಕೆಯಾದರು. 1998 ರಲ್ಲಿ ಕಾರ್ಯಾರಂಭ ಮಾಡಿದರು. ಅವರ ಮೊದಲ ಪೋಸ್ಟಿಂಗ್ 1999 ರ ಜನವರಿಯಲ್ಲಿ ಕಾರ್ಗಿಲ್ ವಲಯದ 4 ನೇ ಬೆಟಾಲಿಯನ್ ಜಾಟ್ ರೆಜಿಮೆಂಟ್‌ನಲ್ಲಿ ಯುದ್ಧ ಪ್ರಾರಂಭವಾಗುವ ಕೆಲವು ತಿಂಗಳ ಮೊದಲು ನಡೆಯಿತು.
ಪಾಕ್ ಸೇನೆಯ ಬಲೆಗೆ ಸಿಲುಕಿದ ಭಾರತೀಯ ಯೋಧರು :
ಮೇ 15, 1999 ರಂದು, ಕ್ಯಾಪ್ಟನ್ ಸೌರಭ್ ಕಾಲಿಯಾ ಮತ್ತು ಇತರ ಐದು ಸೈನಿಕರು ಮರಗಳಿಲ್ಲದ ಲಡಾಖ್ ಪರ್ವತಗಳಲ್ಲಿ ಕಾಕ್ಸಾರ್ ಸೆಕ್ಟರ್‌ನಲ್ಲಿರುವ ಭಜರಾಂಗ್ ಪೋಸ್ಟ್‌ನಲ್ಲಿ ಗಸ್ತು ತಿರುಗಲು ಹೋಗಿದ್ದರು.
ಪರಿಸ್ಥಿತಿ ಎಷ್ಟರ ಮಟ್ಟಿಗೆ ಉಲ್ಬಣಗೊಂಡಿದೆತ್ತೆಂದರೆ ಎರಡೂ ಕಡೆಯ ಸೈನಿಕರ ನಡುವೆ ನಿರಂತರ ಗುಂಡಿನ ದಾಳಿ ನಡೆಯಿತು. ಆದರೆ, ಅಂತಿಮವಾಗಿ, ಕ್ಯಾಪ್ಟನ್ ಸೌರಭ್ ಕಾಲಿಯಾ ಮತ್ತು ಐವರು ಸೈನಿಕರನ್ನು ಪಾಕ್ ಸೇನೆ ಜೀವಂತವಾಗಿ ಸೆರೆ ಹಿಡಿಯಿತು.
ಅವರನ್ನು ಮೂರು ವಾರಗಳ ಕಾಲ ಜೈಲಿನಲ್ಲಿರಿಸಲಾಯಿತು. ಅತ್ಯಂತ ಅಮಾನುಷವಾಗಿ ಚಿತ್ರಹಿಂಸೆ ನೀಡಲಾಯಿತು. ಬಳಿಕ ಅವರ ಮೃತದೇಹವನ್ನು ಜೂನ್ 9, 1999 ರಂದು ಪಾಕಿಸ್ತಾನ ಸೇನೆಯು ಹಿಂದಿರುಗಿಸಿತು. ಶರೀರದ ಮೇಲಿರುವ ಗುರುತುಗಳಿಂದ ಪಾಕ್ ನೀಡಿದ ಕ್ರೂರ ಹಿಂಸೆಯ ಬಗ್ಗೆ ದೃಢೀಕರಿಸಲಾಯಿತು.
ಮರಣೋತ್ತರ ಪರೀಕ್ಷೆಯ ವರದಿ:
ಮರಣೋತ್ತರ ಪರೀಕ್ಷೆಯಲ್ಲಿ ಪಾಕಿಸ್ತಾನಿಗಳು ತಮ್ಮ ಕೈದಿಗಳನ್ನು ಹಿಂಸಿಸಿದ್ದಾರೆ ಎಂದು ತಿಳಿದುಬಂದಿದೆ. ಅವರ ಕಣ್ಣು ಗುಡ್ಡೆಗಳೇ ಇರಲಿಲ್ಲ. ಮರ್ಮಾಂಗವನ್ನು ಕತ್ತರಿಸಲಾಗಿತ್ತು. ದೇಹದ ತುಂಬೆಲ್ಲ ಗಾಯಗಳಾಗಿದ್ದವು. ಅವರಿಗೆ ಸಿಗರೇಟಿನಿಂದ ಸುಡುವುದು, ಕಿವಿ-ಡ್ರಮ್‌ಗಳನ್ನು ಬಿಸಿ ಕಡ್ಡಿಗಳಿಂದ ಚುಚ್ಚುವುದು, ಹಲ್ಲು ಮತ್ತು ಮೂಳೆಗಳನ್ನು ಮುರಿದು, ತಲೆಬುರುಡೆಗಳನ್ನು ಒಡೆದು, ತುಟಿ, ಮೂಗು ಕತ್ತರಿಸಿ ಅಂತಿಮವಾಗಿ ಅವರನ್ನು ಸಾಯಿಸಲಾಗಿದೆ ಎಂಬ ಆಘಾತಕಾರಿ ಅಂಶ ಬೆಳಕಿಗೆ ಬಂದಿತು.
ನ್ಯಾಯಕ್ಕಾಗಿ ತಂದೆಯ ಹೋರಾಟ:
ಕ್ಯಾಪ್ಟನ್ ಸೌರಭ್ ಕಾಲಿಯಾ ತಂದೆ ಎನ್.ಕೆ.ಕಾಲಿಯಾ ನ್ಯಾಯಕ್ಕಾಗಿ ಅವಿರತ ಹೋರಾಟ ನಡೆಸಿದ್ದಾರೆ. ಅಕ್ಟೋಬರ್ 1999 ರಲ್ಲಿ ಸೇನಾ ಮುಖ್ಯಸ್ಥ ಜನರಲ್ ವಿ.ಪಿ. ಮಲಿಕ್ ಅವರು ಕಾಲಿಯಾ ಅವರ ಮನೆಗೆ ಭೇಟಿ ನೀಡಿದ್ದರು ಮತ್ತು ಈ ಸಮಸ್ಯೆಯನ್ನು ಕೈಗೆತ್ತಿಕೊಳ್ಳುವುದಾಗಿ ಭರವಸೆ ನೀಡಿದರು. ಆದರೆ ನಂತರ ಸೈನ್ಯವು ಎನ್.ಕೆ.ಕಾಲಿಯಾ ಅವರಿಗೆ ಇದು ಸೂಕ್ಷ್ಮ ವಿಷಯವಾದ್ದರಿಂದ, ಅದನ್ನು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ (ಎಂಇಎ), ಪ್ರಧಾನ ಮಂತ್ರಿಗಳ ಕಚೇರಿ (ಪಿಎಂಒ) ಅಥವಾ ರಕ್ಷಣಾ ಸಚಿವಾಲಯ (ಎಂಒಡಿ) ಮಾತ್ರ ಕ್ರಮ ತೆಗೆದುಕೊಳ್ಳಬಹುದು ಎಂದು ಹೇಳಿದರು. ಬಳಿಕ ಪಿಎಂಒ, ಎಂಇಎ ಮತ್ತು ಎಂಒಡಿ ಮುಂದೆ ಕಾಲಿಯಾ ತಂದೆ ಅರ್ಜಿ ಸಲ್ಲಿಸಿದರು.
ನವದೆಹಲಿಯಲ್ಲಿನ ಪಾಕಿಸ್ತಾನ್ ಹೈಕಮಿಷನ್ ಮೂಲಕ 1999 ರಲ್ಲಿ ಪಾಕ್ ಪ್ರಧಾನಿಗೆ ಈ ಕುರಿತು ಪತ್ರವನ್ನೂ ಬರೆದರು. ಆದರೆ ಮರಳಿ ಯಾವುದೇ ಉತ್ತರವನ್ನು ಸ್ವೀಕರಿಸಿಲ್ಲ.
ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗವನ್ನು ಸಂಪರ್ಕಿಸಿದಾಗ, ಅಂತಹ ವಿಷಯಗಳ ಬಗ್ಗೆ ಕಾರ್ಯನಿರ್ವಹಿಸಲು ಅದು ಸಮರ್ಥವಾಗಿಲ್ಲ ಎಂದು ತಿಳಿಸಲಾಯಿತು. ಭಾರತದ ರಾಷ್ಟ್ರಪತಿಗಳಿಗೆ ಎನ್.ಕೆ.ಕಾಲಿಯಾ ಮನವಿ ಸಲ್ಲಿಸಿದರು. ಇದಕ್ಕೆ ಆರು ತಿಂಗಳ ನಂತರ ಪ್ರಮಾಣಿತ ಉತ್ತರವನ್ನು ಪಡೆದರು. ಈ ಪ್ರಕರಣವನ್ನು ಕುರಿತು ರಕ್ಷಣಾ ಸಚಿವಾಲಯಕ್ಕೆ ವಹಿಸಿದರು. ಪಾಕ್ ಮರಳಿಸಿದ ಶವದ ಪರಿಸ್ಥಿತಿಯ ಕುರಿತು ಅಂತಾರಾಷ್ಟ್ರೀಯ ಕೋರ್ಟ್ನಲ್ಲಿ ಅವಗಾಹನೆಗೆ ತರುವಂತೆ ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಿದರು. ಆದರೆ ಯಾವುದೇ ಪ್ರತಿಕ್ರಿಯೆ ಬರದ ಕಾರಣ ಕೊನೆಗೆ ಸರ್ಕಾರಕ್ಕೆ ನಿರ್ದೇಶನ ನೀಡುವಂತೆ ಕೋರಿ 2012 ರಲ್ಲಿ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದರು. ಭರ್ತಿ 21 ವರ್ಷಗಳ ಬಳಿಕವೂ ಕಾಲಿಯಾ ತಂದೆ ಪುತ್ರನ ಸಾವಿನ ನ್ಯಾಯಕ್ಕಾಗಿ ಹೋರಾಡುವಂತಾಗಿದೆ.
ಸರ್ಕಾರದ ಪ್ರತಿಕ್ರಿಯೆಗಳು :
ಪಾಕ್ ಸೈನಿಕರ ಕ್ರೂರ ಕೃತ್ಯದ ವಿರುದ್ಧ ಅಂತಾರಾಷ್ಟ್ರೀಯ ನ್ಯಾಯಾಲಯದಲ್ಲಿ ದೂರು ಸಲ್ಲಿಸಲು ಕೇಂದ್ರ ಸರ್ಕಾರಕ್ಕೆ ನಿರ್ದೇಶನ ನೀಡಬೇಕೆಂದು ಕೋರಿ ಎನ್.ಕೆ.ಕಾಲಿಯಾ ಸುಪ್ರೀಂ ಕೋರ್ಟ್ಗೆ ಮನವಿ ಸಲ್ಲಿಸಿದರು. ಇದನ್ನು ಪುರಸ್ಕರಿಸಿದ ನ್ಯಾಯಾಲಯವು, ಪಾಕಿಸ್ತಾನಿ ಸೈನಿಕರ ವಿರುದ್ಧ ಅಂತಾರಾಷ್ಟ್ರೀಯ ನ್ಯಾಯಾಲಯದಲ್ಲಿ (ಐಸಿಜೆ) ದೂರು ದಾಖಲಿಸುವ ಬಗ್ಗೆ ಕೇಂದ್ರಕ್ಕೆ ನೋಟಿಸ್ ನೀಡಿತು.
ಭಾರತ ಮತ್ತು ಪಾಕಿಸ್ತಾನದ ನಡುವಿನ ದ್ವಿಪಕ್ಷೀಯ ವಿಷಯಗಳಲ್ಲಿ ಐಸಿಜೆ ಹಸ್ತಕ್ಷೇಪ 'ಪ್ರಾಯೋಗಿಕ' ಅಲ್ಲವೆಂದು ನರೇಂದ್ರ ಮೋದಿ ಸರ್ಕಾರ ಹೇಳಿದೆ. ಅಲ್ಲದೇ 2015 ರಲ್ಲಿ ಈ ಕುರಿತು ಪಾಕಿಸ್ತಾನವನ್ನು ಅಂತಾರಾಷ್ಟ್ರೀಯ ನ್ಯಾಯಾಲಯಕ್ಕೆ ಎಳೆಯಲು ಮೋದಿ ಸರ್ಕಾರ ನಿರ್ಧರಿಸಿದೆ. ಇದಕ್ಕೆ ಸಂಬಂಧಪಟ್ಟಂತೆ ಸುಪ್ರೀಂ ಕೋರ್ಟ್ಗೆ ಪರಿಷ್ಕೃತ ಪ್ರಮಾಣಪತ್ರ ಸಲ್ಲಿಸುವುದಾಗಿ ಅಂದಿನ ವಿದೇಶಾಂಗ ಸಚಿವೆ ದಿ.ಸುಷ್ಮಾ ಸ್ವರಾಜ್ ತಿಳಿಸಿದ್ದರು.
ಪಾಕ್ ಜತೆಗಿನ ದ್ವಿಪಕ್ಷೀಯ ಸಂಬಂಧ ಸುಧಾರಿಸುವ ನಿಟ್ಟಿನಲ್ಲಿ ಕಾಲಿಯಾ ವಿಷಯವನ್ನು ಕೈಬಿಡಲು ಯುಪಿಎ ಸರ್ಕಾರ ನಿರ್ಧರಿಸಿತ್ತು.
ವಿಪರೀತ ಹವಾಮಾನ ವೈಪರಿತ್ಯದಿಂದಾಗಿ ಕ್ಯಾಪ್ಟನ್ ಕಾಲಿಯಾ ಮತ್ತು ಇನ್ನುಳಿದ ಸೈನಿಕರು ಸಾವನ್ನಪ್ಪಿದ್ದಾರೆ ಮತ್ತು ಅವರ ಶವಗಳು ಹಳ್ಳದಲ್ಲಿ ಪತ್ತೆಯಾಗಿವೆ ಎಂದು ಪಾಕಿಸ್ತಾನ ಸರ್ಕಾರ ಸಮರ್ಥಿಸಿಕೊಂಡಿದೆ.
