ಹೈದರಾಬಾದ್: ಕೊರೊನಾ ವೈರಸ್‌ ಸಂಕಷ್ಟ ಹರಡದಂತೆ ತಡೆಯುವ ನಿಟ್ಟಿನಲ್ಲಿ ಹಲವಾರು ದೇಶಗಳು ತೀವ್ರ ಪ್ರತಿಬಂಧಕ ಕ್ರಮಗಳನ್ನು ಕೈಗೊಳ್ಳುತ್ತಿವೆ. ಆದರೆ, ಇಂತಹ ಕ್ರಮಗಳು ಜನರ ಮಾನಸಿಕ ಆರೋಗ್ಯ ಹಾಗೂ ಸ್ವಾಸ್ಥ್ಯದ ಮೇಲೆ ಋಣಾತ್ಮಕ ಪರಿಣಾಮಗಳನ್ನು ಬೀರುವ ಸಾಧ್ಯತೆಗಳೂ ಇವೆ.
ಕೊರೊನಾ ವೈರಸ್‌ ಹಬ್ಬುತ್ತಿರುವ ಈ ಅನಿಶ್ಚಯದ ಕಾಲದಲ್ಲಿ, ಪ್ರತಿಯೊಂದು ವಿಷಯವೂ ನಮ್ಮ ಕೈತಪ್ಪಿ ಹೋಗುತ್ತದೇನೋ ಎಂದು ಅನಿಸುವ ಸಾಧ್ಯತೆಗಳು ದಟ್ಟವಾಗಿವೆ. ನಮ್ಮೆಲ್ಲರ ಬಹುತೇಕ ರೂಢಿಗಳು ಅಸ್ತವ್ಯಸ್ತವಾಗಿದ್ದು, ತಜ್ಞರು ಹೇಳುವಂತೆ ಭವಿಷ್ಯ ಕೂಡಾ ಯಾವುದೇ ನಿಶ್ಚಿತತೆಯನ್ನು ಹೊಂದಿಲ್ಲ. ಕೊರೊನಾ ವೈರಸ್‌ ಕುರಿತ ಎಚ್ಚರಿಕೆಗಳಾದ- “ಮನೆಯೊಳಗೇ ಇರಿ” ಎಂಬುದರಿಂದ ಹಿಡಿದು “ನಿಮ್ಮ ಕೈಗಳನ್ನು ತೊಳೆಯಿರಿ”, “ಸಾಮಾಜಿಕ ಕೂಟಗಳನ್ನು ರದ್ದು ಮಾಡಿ”- ಎಂಬಂತಹ ಸೂತ್ರಗಳನ್ನು ಜಗತ್ತು ಬಹುತೇಕ ಒಪ್ಪಿಕೊಂಡಾಗಿದೆ. ಆದರೆ, ದಿಗ್ಬಂಧನದಲ್ಲಿ ವಾರಗಟ್ಟಲೇ ಇದ್ದುರಿಂದ ಜನರ ಮನಸ್ಸಿನಲ್ಲಿ ಆತಂಕ ಹೆಚ್ಚುತ್ತಿದ್ದು, ಅವರ ಮಾನಸಿಕ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮವಾಗದಂತೆ ನೋಡಿಕೊಳ್ಳಬೇಕಿದೆ.
ಕೊರೊನಾ ವೈರಸ್‌ ಹರಡುವಿಕೆಯನ್ನು ನಿರ್ಬಂಧಿಸಲು ಸರಕಾರಗಳು ಕೈಗೊಂಡಿರುವ ಕ್ರಮಗಳು ಅಸಾಮಾನ್ಯವಾಗಿವೆ. ಶಾಲೆಗಳನ್ನು ಮುಚ್ಚಲಾಗಿದ್ದು, ವಾಣಿಜ್ಯ ವಹಿವಾಟುಗಳು, ಪ್ರಯಾಣ ಮುಂತಾದವನ್ನು ನಿರ್ಬಂಧಿಸಲಾಗಿದೆ. ಮಂಕಾದ ಆರ್ಥಿಕತೆ ಮತ್ತು ಸ್ಥಗಿತಗೊಂಡಿರುವ ಸಾಮಾಜಿಕ ವ್ಯವಸ್ಥೆಯು ಸಾರ್ವಜನಿಕ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮಗಳಿಗೆ ಕಾರಣವಾಗಬಹುದು ಎಂದು ಕೆಲ ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.
ಕೊರೊನಾ ಶಂಕೆ ದೃಢಪಟ್ಟಿರುವ ಕಾರಣ ಅಥವಾ ಸೋಂಕು ತಗಲಬಹುದು ಎಂಬ ಕಾರಣಕ್ಕೆ ಹೆಚ್ಚೆಚ್ಚು ಜನರು ಗೃಹ ದಿಗ್ಬಂಧನ ಅಥವಾ ಪ್ರತ್ಯೇಕವಾಗಿ ಇರಬೇಕಾದ ಅನಿವಾರ್ಯತೆಗೆ ಸಿಲುಕುತ್ತಿದ್ದಾರೆ. ಸಾಂಕ್ರಾಮಿಕದಿಂದಾಗಿ ಜನರ ಮೇಲೆ ಉಂಟಾಗುತ್ತಿರುವ ಮಾನಸಿಕ ಆರೋಗ್ಯದ ಮೇಲಿನ ಪರಿಣಾಮಗಳನ್ನು ಗಮನಿಸುವ ಮಹತ್ವವನ್ನು ತಜ್ಞರು ಈಗ ಮನಗಂಡಿದ್ದು, ಸಾರ್ವಜನಿಕರಿಗೆ ಮಾನಸಿಕ ಬೆಂಬಲ ಸೂಚಿಸುವ ಅವಶ್ಯಕತೆಯನ್ನು ಪ್ರಸ್ತಾಪಿಸಿದ್ದಾರೆ.
ಕೊರೊನಾ ವೈರಸ್‌ ನಿಯಂತ್ರಿಸಲು ಸಾಮಾಜಿಕ ಅಂತರ ಕ್ರಮಗಳನ್ನು ತಕ್ಷಣ ಕೈಗೊಳ್ಳದಿದ್ದರೆ ಈ ಸೋಂಕು ಅಮೆರಿಕದಲ್ಲಿ 20 ಲಕ್ಷ, ಇಂಗ್ಲಂಡ್‌ನಲ್ಲಿ 5 ಲಕ್ಷ ಜನರನ್ನು ಕೊಲ್ಲಬಹುದು ಎಂದು ಎಚ್ಚರಿಸಿದ್ದ ಲಂಡನ್‌ನ ಇಂಪೀರಿಯಲ್‌ ಕಾಲೇಜಿನ ಸಂಶೋಧಕರ ಇತ್ತೀಚಿನ ವರದಿಯು ಜಗತ್ತಿನಾದ್ಯಂತ ದಿಗ್ಬಂಧನ ವಿಧಿಸಲು ನೆರವಾಗಿತ್ತು. ಈ ವಿಧಾನ ನಿಜಕ್ಕೂ ಕೆಲಸ ಮಾಡಬೇಕೆಂದರೆ, ದಿಗ್ಬಂಧನವನ್ನು ಹಾಕುವುದು, ತೆರೆಯುವುದು, ಮತ್ತೆ ಹಾಕುವ ರೀತಿ ಅಂದಾಜು 18 ತಿಂಗಳವರೆಗಿನ ಸುದೀರ್ಘ ಅವಧಿಗೆ ವಿಧಿಸಬೇಕಿದೆ ಎಂದು ವರದಿ ಹೇಳಿತ್ತು.
ಕೋವಿಡ್-19 ಅತಿ ವೇಗವಾಗಿ ಹರಡುತ್ತಿದ್ದು, ಅದು ಹೇಗೆ ಮುಂದುವರಿಯುವುದೋ ಅಥವಾ ಅಂತಿಮ ಸಾವಿನ ಸಂಖ್ಯೆ ಎಷ್ಟಕ್ಕೆ ನಿಲ್ಲುವುದು ಎಂಬುದನ್ನು ಯಾರೂ ಹೇಳಲು ಸಾಧ್ಯವಿಲ್ಲ. ಆದರೆ, ಆಳವಾದ ಮತ್ತು ದೀರ್ಘಕಾಲದ ಆರ್ಥಿಕ ಆಘಾತ, ಜೊತೆಗೆ ಸಾಮಾಜಿಕ ಅಂತರವೂ ಸೇರಿಕೊಂಡರೆ ಅವು ಆರೋಗ್ಯದ ಮೇಲೆ ಮಧ್ಯಮ ಮತ್ತು ದೀರ್ಘಕಾಲೀನ ಪರಿಣಾಮವನ್ನು ತಂತಾನೇ ಬೀರುತ್ತವೆ ಎಂಬುದನ್ನು ಇತಿಹಾಸ ತೋರಿಸಿಕೊಟ್ಟಿದೆ ಎನ್ನುತ್ತಾರೆ ಸಂಶೋಧಕರು.
ಆಕ್ಸ್‌ಫರ್ಡ್‌ ವಿಶ್ವವಿದ್ಯಾಲಯದ ಏರನ್‌ ರೀವ್ಸ್‌ ಎಂಬ ಪ್ರಮುಖ ಲೇಖಕರು ಪ್ರಕಟಿಸಿದ ಸಂಶೋಧನಾ ವರದಿಯ ಪ್ರಕಾರ ಅಮೆರಿಕದಲ್ಲಿ ಪ್ರತಿಶತ ಒಂದರಷ್ಟು ನಿರುದ್ಯೋಗ ಪ್ರಮಾಣದ ಏರಿಕೆಗೆ ಪ್ರತಿಯಾಗಿ ಆತ್ಮಹತ್ಯೆ ಪ್ರಮಾಣವೂ ಶೇಕಡಾ 1 ರಷ್ಟು ಏರಿಕೆಯಾಗಿದೆ. ಅಮೆರಿಕದಲ್ಲಿ ಕಳೆದ ಆರ್ಥಿಕ ಹಿಂಜರಿತದ ಅವಧಿಯಲ್ಲಿ ನಿರುದ್ಯೋಗ ಪ್ರಮಾಣ ಶೇಕಡಾ 10ಕ್ಕೆ ಏರಿದ್ದಾಗ, ಆತ್ಮಹತ್ಯೆ ಪ್ರಮಾಣವೂ ಏರಿಕೆಯಾಗಿ 4750 ಸಾವುಗಳಿಗೆ ಕಾರಣವಾಗಿತ್ತು. ಒಂದು ವೇಳೆ ನಿರುದ್ಯೋಗ ಪ್ರಮಾಣವು ಶೇಕಡಾ 20ರಷ್ಟು ಏರಿಕೆಯಾದರೆ, ಆತ್ಮಹತ್ಯೆ ಪ್ರಮಾಣವೂ ಏರಿಕೆಯಾಗಲಿದೆ ಎನ್ನುತ್ತಾರೆ ತಜ್ಞರು.
ಮಧುಮೇಹದಂತಹ ತೀವ್ರತರ ಕಾಯಿಲೆಯಿಂದ ಬಳಲುತ್ತಿರುವವರಿಗಾಗಿ ಸ್ಥಳೀಯ ಆರೋಗ್ಯ ಇಲಾಖೆಗಳು ಚಿಕಿತ್ಸಾ ಕಾರ್ಯಕ್ರಮಗಳನ್ನು ನಡೆಸುತ್ತವೆ. ಬಾಲ್ಯಾವಸ್ಥೆಯಲ್ಲಿ ಸೀಸ ವಿಷಪ್ರಾಶನ ತಡೆಯುವುದು ಹಾಗೂ ಫ್ಲೋ, ಕ್ಷಯ ಮತ್ತು ರೇಬಿಸ್‌ ಹರಡದಂತೆ ನಿಗ್ರಹಿಸುವ ಕೆಲಸವನ್ನೂ ಅವು ಮಾಡುತ್ತವೆ.
