ಹೊಸದಿಲ್ಲಿ: ಆನ್ಲೈನ್ ಮೂಲಕ ದಿನದ 24 ಗಂಟೆಯೂ ದಾಖಲೆಗಳನ್ನು ಸಲ್ಲಿಸಬಹುದಾದ ಆಧುನಿಕ ಇ-ಫೈಲಿಂಗ್ ವ್ಯವಸ್ಥೆಯನ್ನು ಸುಪ್ರೀಂಕೋರ್ಟ್ ಶೀಘ್ರ ಅಳವಡಿಸಿಕೊಳ್ಳಲಿದೆ. ಇ-ಫೈಲಿಂಗ್ ಸಾಫ್ಟವೇರ್ನ ಅಂತಿಮ ಹಂತದ ಪರೀಕ್ಷೆಗಳನ್ನು ನಡೆಸಲಾಗುತ್ತಿದೆ ಎಂದು ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ್ ನ್ಯಾಯವಾದಿಗಳೊಂದಿಗೆ ನಡೆಸಿದ ವಿಡಿಯೋ ಸಂವಾದದಲ್ಲಿ ತಿಳಿಸಿದರು.
ಸುಪ್ರೀಂಕೋರ್ಟ್ ಬಾರ್ ಅಸೋಸಿಯೇಷನ್ ಹಾಗೂ ಸುಪ್ರೀಂಕೋರ್ಟ್ ಅಡ್ವೊಕೇಟ್ಸ್-ಆನ್-ರೆಕಾರ್ಡ್ ಅಸೋಸಿಯೇಷನ್ ಸದಸ್ಯರು ಇಷ್ಟರಲ್ಲೇ ಸಾಫ್ಟ್‌ವೇರ್ ಪರೀಕ್ಷೆ ಮಾಡುವ ಅವಕಾಶ ಪಡೆಯಲಿದ್ದಾರೆ. ಆರಂಭಿಕ ತಾಂತ್ರಿಕ ಸಮಸ್ಯೆಗಳನ್ನು ನಿವಾರಿಸಲಾಗಿದ್ದು, ವಿಡಿಯೋ ಕಾನ್ಫರೆನ್ಸಿಂಗ್ ಅಡೆತಡೆಯಿಲ್ಲದೇ ನಡೆಯುತ್ತಿದೆ ಎಂದು ಸುಪ್ರೀಂಕೋರ್ಟ್ನ ಇ-ಕಮಿಟಿ ಮುಖ್ಯಸ್ಥರೂ ಆಗಿರುವ ಚಂದ್ರಚೂಡ್ ಹೇಳಿದರು.
ಲಾಕ್ಡೌನ್ನ ಸಕಾರಾತ್ಮಕ ಪರಿಣಾಮಗಳ ಬಗ್ಗೆ ಇದೇ ಸಂದರ್ಭದಲ್ಲಿ ಮೆಚ್ಚುಗೆಯ ಮಾತುಗಳನ್ನಾಡಿದ ಅವರು, ದೆಹಲಿ ಆಕಾಶದಲ್ಲಿ ಮತ್ತೆ ರಾತ್ರಿ ನಕ್ಷತ್ರಗಳನ್ನು ನೋಡಬಹುದಾಗಿದ್ದು, ನನ್ನ ಮನೆ ಮುಂದಿನ ಉದ್ಯಾನದಲ್ಲಿ ನವಿಲುಗಳ ನರ್ತನವೂ ಕಾಣಿಸುತ್ತಿದೆ ಎಂದರು.
