ನಮ್ಮ ಬೇಡಿಕೆಗಳಿಗೆ ರಾಜಸ್ಥಾನ ಸರ್ಕಾರ ಸ್ಪಂದಿಸಲಿದೆ: ಗುಜ್ಜರ್​​ ನಾಯಕರ ವಿಶ್ವಾಸ

ಗುಜ್ಜರ್​​ ಸಮುದಾಯದ ವಿವಿಧ ಬೇಡಿಕೆಗಳಿಗೆ ರಾಜಸ್ಥಾನ ಸರ್ಕಾರ ಸ್ಪಂದಿಸಲಿದೆ. ಹೀಗಾಗಿ ತಾವು ಕೈಗೊಂಡಿರುವ ಪ್ರತಿಭಟನೆಗೆ ಅಂತ್ಯ ಹಾಡಲಾಗುವುದು ಎಂದು ಗುಜ್ಜರ್​ ಮುಖಂಡರೊಬ್ಬರು ಬುಧವಾರ ಹೇಳಿಕೆ ನೀಡಿದ್ದಾರೆ.

ಜೈಪುರ(ರಾಜಸ್ಥಾನ): ನಮ್ಮ ವಿವಿಧ ಬೇಡಿಕೆಗಳಿಗೆ ರಾಜಸ್ಥಾನ ಸರ್ಕಾರ ಸ್ಪಂದಿಸುವುದಾಗಿ ಭರವಸೆ ನೀಡಿದೆ ಎಂದು ಗುಜ್ಜರ್​​ ಮುಖಂಡರೊಬ್ಬರು ಬುಧವಾರ ತಿಳಿಸಿದ್ದಾರೆ.

ರಾಜ್ಯ ಸರ್ಕಾರವು ಗುಜ್ಜರ್​​ ಸಮುದಾಯಕ್ಕೆ ಮೀಸಲಾತಿ ನೀಡಬೇಕು. ಸಂವಿಧಾನದ ಒಂಬತ್ತನೇ ಪರಿಚ್ಛೇದದಲ್ಲಿ ಸೇರಿಸಿ ಖಾಲಿ ಹುದ್ದೆಗಳನ್ನು ಭರ್ತಿಮಾಡಬೇಕು. ಮತ್ತು ಅತ್ಯಂತ ಹಿಂದುಳಿದ ವರ್ಗಗಳಿಗೆ(ಎಂಬಿಸಿ) ಶೇಕಡಾ 5 ರಷ್ಟು ಮೀಸಲಾತಿ ಹೆಚ್ಚಿಸಿ ಬಾಕಿ ಉಳಿದಿರುವ ನೇಮಕಾತಿ ಪ್ರಕ್ರಿಯೆ ಪೂರ್ಣ ಮಾಡಬೇಕು ಎಂದು ಗುಜ್ಜರ್​​ ಆರಕ್ಷಣ ಸಂಘರ್ಷ ಸಮಿತಿಯು ಬೇಡಿಕೆ ಇಟ್ಟಿತ್ತು.

ಗುಜ್ಜರ್​ ಸಮುದಾಯದ ಸಂಘಟನೆಯು ತಮ್ಮ ಬೇಡಿಕೆಗಳ ಈಡೇರಿಕೆಗೆ ನವೆಂಬರ್ 1 ರಿಂದ ಪ್ರತಿಭಟನೆ ಪ್ರಾರಂಭಿಸಿತ್ತು. ಈ ವೇಳೆ ಹಿಂದಾನ್ - ಬಯಾನಾ ರಸ್ತೆ ಮತ್ತು ದೆಹಲಿ-ಮುಂಬೈ ರೈಲು ಮಾರ್ಗವನ್ನು ನಿರ್ಬಂಧಿಸಿ ಪ್ರತಿಭಟಿಸಲಾಗಿತ್ತು.

ಸದ್ಯ ಮಂತ್ರಿಮಂಡಲದೊಂದಿಗಿನ ಮ್ಯಾರಥಾನ್ ಸಭೆಯ ನಂತರ, ಕರ್ನಲ್ ಕಿರೋರಿ ಸಿಂಗ್ ಬೈನ್ಸ್ಲಾ ಸೇರಿದಂತೆ ಗುಜ್ಜರ್​​ ನಿಯೋಗ ಮುಖ್ಯಮಂತ್ರಿಗಳು ಅಶೋಕ್ ಗೆಹ್ಲೋಟ್ ಅವರನ್ನು ಭೇಟಿಯಾಗಿದ್ದಾರೆ. ಸದ್ಯ ಸರ್ಕಾರ ಅವರ ಬೇಡಿಕೆಗಳ ಪೂರೈಕೆಯ ಭರವಸೆ ನೀಡಿರುವ ಹಿನ್ನೆಲೆ ಭರತ್‌ಪುರದ ಬಯಾನಾದ ಪ್ರತಿಭಟನಾ ಸ್ಥಳದಲ್ಲಿ ತಮ್ಮ ಆಂದೋಲನವನ್ನು ರದ್ದುಗೊಳಿಸುವ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ನಿಯೋಗ ತಿಳಿಸಿದೆ.