ಹೈದರಾಬಾದ್: ತೆಲಂಗಾಣದಲ್ಲಿ ಎರಡು ದಿನಗಳ ಹಿಂದೆ ಅಬ್ಬರಿಸಿ 50ಕ್ಕೂ ಹೆಚ್ಚು ಜನರನ್ನು ಬಲಿಪಡೆದಿದ್ದ ಪ್ರವಾಹ ನಿನ್ನೆ ಮತ್ತೆ ಆರ್ಭಟಿಸಿದ್ದು, ಬೆಳಗಾಗುವಷ್ಟರಲ್ಲಿ ಹೈದರಾಬಾದ್ನಲ್ಲಿ ಮೂವರು ಸಾವನ್ನಪ್ಪಿದ್ದಾರೆ.
ರಾತ್ರಿಯಿಡೀ ಸುರಿದ ಧಾರಾಕಾರ ಮಳೆಗೆ ವನಸ್ಥಲಿಪುರಂ, ಎಲ್.ಬಿ ನಗರ್, ಉಪ್ಪಲ್, ಸಿಕಿಂದರಾಬಾದ್, ಖೈರತಾಬಾದ್, ಕುಕಟ್ಪಲ್ಲಿ, ಹೈ-ಟೆಕ್ ಸಿಟಿ, ಮೆಹದಿಪಟ್ಟಣಂ, ಆರಂಘರ್, ಗೋಲ್ಕೊಂಡ, ನಾಗೋಲ್, ಸರೂರ್ ನಗರ್ ಸೇರಿದಂತೆ ಹೈದರಾಬಾದ್ನ ಅನೇಕ ಪ್ರದೇಶಗಳ ರಸ್ತೆಗಳು, ಕಾಲೋನಿಗಳು ಜಲಾವೃತವಾಗಿದ್ದು, ವಾಹನಗಳು ಪ್ರವಾಹದ ನೀರಿನಲ್ಲಿ ಕೊಚ್ಚಿ ಹೋಗಿವೆ.
ಮಲಕ್ಪೇಟ್, ಅರುಂಧತಿ ನಗರ್ ಹಾಗೂ ಉಪ್ಪಲ್ನಲ್ಲಿ ವಿದ್ಯುತ್ ಶಾಕ್ನಿಂದಾಗಿ ಮೂವರು ಮೃತಪಟ್ಟಿದ್ದಾರೆ. ಮಜೀದ್ಪುರ್ ಪ್ರದೇಶದಲ್ಲಿ ಇಬ್ಬರು ವ್ಯಕ್ತಿಗಳಿದ್ದ ಕಾರೊಂದು ಕೊಚ್ಚಿ ಹೋಗಿದ್ದು, ಅವರ ಕುರಿತು ಮಾಹಿತಿ ತಿಳಿದು ಬಂದಿಲ್ಲ.
ನಗರದ ವಿವಿಧೆಡೆ ವಿದ್ಯುತ್ ಕಡಿತಗೊಂಡಿದ್ದು, ರಕ್ಷಣಾ ಕಾರ್ಯಾಚರಣೆ ಮುಂದುವರೆದಿದೆ. ಹೈದರಾಬಾದ್ನ ಹಾರ್ಸ್ ರೈಡಿಂಗ್ ಸ್ಕೂಲ್ ತಂಡವು ಕುದುರೆ ಏರಿ ಪ್ರವಾಹ ಪೀಡಿತ ಪ್ರದೇಶಗಳಿಗೆ ತೆರಳಿ ಆಹಾರ ಪದಾರ್ಥಗಳನ್ನು ನೀಡುತ್ತಿದೆ.
