ನವದೆಹಲಿ ಗಲಭೆ ಜೊತೆ ತಬ್ಲಿಘಿ ಜಮಾತ್​ ಸಂಬಂಧ: ಚಾರ್ಜ್​ಶೀಟ್​ನಲ್ಲಿ ಉಲ್ಲೇಖ

ರಾಷ್ಟ್ರ ರಾಜಧಾನಿ ಗಲಭೆಯಲ್ಲಿ ತಬ್ಲಿಘಿ ಜಮಾತ್ ಪಾತ್ರ ಇರುವ ಬಗ್ಗೆ ದೆಹಲಿ ಪೊಲೀಸರು ಹೊಸದಾಗಿ ಸಲ್ಲಿಸಿರುವ ಚಾರ್ಜ್​ಶೀಟ್​ನಲ್ಲಿ ಉಲ್ಲೇಖಿಸಿದ್ದಾರೆ.

ನವದೆಹಲಿ: ಫೆಬ್ರವರಿ ತಿಂಗಳಲ್ಲಿ ನವದೆಹಲಿಯಲ್ಲಿ ನಡೆದ ಗಲಭೆ ಜೊತೆ ತಬ್ಲಿಘಿ ಜಮಾತ್ ಸಂಬಂಧ ಇದೆ ಎಂದು ದೆಹಲಿ ಪೊಲೀಸರು ಸಲ್ಲಿಸಿದ ಚಾರ್ಜ್​ಶೀಟ್​ನಲ್ಲಿ ಉಲ್ಲೇಖಿಸಲಾಗಿದೆ.

ಈಶಾನ್ಯ ದೆಹಲಿಯ ಶಿವ ವಿಹಾರ್ ಪ್ರದೇಶದ ರಾಜಧಾನಿ ಶಾಲೆಯ ಬಳಿ ನಡೆದ ಗಲಭೆ ಬಗ್ಗೆ ದೆಹಲಿ ಅಪರಾಧ ವಿಭಾಗ ಚಾರ್ಜ್​ಶೀಟ್ ಸಲ್ಲಿಕೆ ಮಾಡಿದೆ. ಶಾಲೆಯ ಮಾಲೀಕ ಫೈಸಲ್ ಫಾರೂಕ್ ಉತ್ತರ ಪ್ರದೇಶದ ದಿಯೋಬಂದ್​ಗೆ ಭೇಟಿ ನೀಡಿದ್ದರು ಮತ್ತು ಹಜರತ್ ನಿಜಾಮುದ್ದೀನ್ ಮರ್ಕಜ್​​​​​​​​​​ ಜೊತೆ ಸಂಪರ್ಕ ಹೊಂದಿದ್ದರು ಎಂದು ತಿಳಿಸಲಾಗಿದೆ.

ಫೈಸಲ್ ಮೊಬೈಲ್ ಕರೆ ಪರಿಶೀಲನೆ ನಡೆಸಿದ್ದು, ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾದ ಪ್ರಮುಖ ಸದಸ್ಯರು, ಪಿಂಜ್ರಾಟೋಡ್ ಗುಂಪು, ಜಾಮಿಯಾ ಸಮನ್ವಯ ಸಮಿತಿ, ಹಜರತ್ ನಿಜಾಮುದ್ದೀನ್ ಮರ್ಕಜ್​​​​​​​​​ ಮತ್ತು ದಿಯೋಬಂದ್ ಸೇರಿದಂತೆ ಕೆಲವು ಮೂಲಭೂತ ಮುಸ್ಲಿಂ ಧರ್ಮಗುರುಗಳೊಂದಿಗೆ ಸಂಪರ್ಕ ಹೊಂದಿರುವ ಬಗ್ಗೆ ಚಾರ್ಜ್​ಶೀಟ್​ನಲ್ಲಿ ಉಲ್ಲೇಖಿಸಿದ್ದಾರೆ.​

ಶಿವ ವಿಹಾರ್ ಮತ್ತು ನೆರೆಯ ಪ್ರದೇಶಗಳಲ್ಲಿ ಹಿಂಸಾಚಾರ ಪ್ರಾರಂಭವಾಗುವ ಒಂದು ದಿನ ಮೊದಲು ಫೆಬ್ರವರಿ 23 ರಂದು ಫಾರೂಕ್ ದಿಯೋಬಂದ್‌ಗೆ ಭೇಟಿ ನೀಡಿದ್ದ ಎಂದು ಚಾರ್ಜ್‌ಶೀಟ್‌ನಲ್ಲಿ ಹೇಳಲಾಗಿದೆ. ಗಲಭೆಕೋರರು ರಾಜಧಾನಿ ಶಾಲೆಯ ಒಳಗೆ ಬಿಡಾರ ಹೂಡಿದ್ದರು ಮತ್ತು ಟೆರೇಸ್​ನಿಂದ ಗುಂಡುಗಳನ್ನು ಹಾರಿಸಿದ್ದು, ಪೆಟ್ರೋಲ್ ಬಾಂಬ್, ಆ್ಯಸಿಡ್, ಇಟ್ಟಿಗೆ, ಕಲ್ಲುಗಳನ್ನು ಶಾಲೆಯ ಟೆರೇಸ್‌ನಿಂದ ಎಸೆದಿದ್ದರು ಎಂದು ದೆಹಲಿ ಪೊಲೀಸರು ತಿಳಿಸಿದ್ದಾರೆ.