ಹರ್ಯಾಣ: ಸೋಮವಾರ ನಾಪತ್ತೆಯಾದ AN-32 ಸೇನಾ ವಿಮಾನ ಅಪಘಾತದಲ್ಲಿ ಪೈಲಟ್ ಆಶಿಶ್ ತನ್ವರ್ ಮೃತಪಟ್ಟಿದ್ದಾಗಿ ಅವರ ಕುಟುಂಬಸ್ಥರು ಹೇಳಿದ್ದಾರೆ.
ಸೋಮವಾರ ಅಸ್ಸೋಂನ ಜೊಹ್ರಾತ್ನಿಂದ ಟೇಕ್ ಆಫ್ ಆಗಿದ್ದ AN-32 ವಿಮಾನ ಇದ್ದಕ್ಕಿಂದ್ದಂತೆ ಸಂಪರ್ಕ ಕಡಿದುಕೊಂಡು ನಾಪತ್ತೆಯಾಗಿದೆ. ಇದೇ ವಿಮಾನದ ಪೈಲಟ್ ಆಗಿದ್ದ ದಿಘೊಟ್ ಗ್ರಾಮದ ಆಶಿಶ್ ತನ್ವರ್ ಮೃತಪಟ್ಟಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಆಶಿಶ್ ಸಂಬಂಧಿ ಉದಯ್ಬೀರ್ ಈ ಬಗ್ಗೆ ಮಾಹಿತಿ ನೀಡಿದ್ದು, ಅಪಘಾತಕ್ಕೊಳಗಾಗಿರುವ AN-32 ವಿಮಾನದಲ್ಲಿ ಆಶಿಶ್ ಸಹ ಇದ್ದರು. ಅವರು ಇನ್ನಿಲ್ಲವೆಂಬುದು ನೋವಿನ ಸಂಗತಿ ಎಂದಿದ್ದಾರೆ. 29 ವರ್ಷದ ಆಶಿಶ್ ರಜೆ ಮುಗಿಸಿ, ಇದೇ ಮೇ 18ರಂದು ಸೇನೆಗೆ ಮರಳಿದ್ದರು.
Sukhoi-30 ಹಾಗೂ C-130 ವಿಶೇಷ ವಿಮಾನಗಳ ಹುಟುಕಾಟ ನಡೆಸುತ್ತಿದ್ದ ತಂಡಕ್ಕೆ ವಿಮಾನದ ಅವಶೇಷಗಳು ಪತ್ತೆಯಾಗಿವೆ ಎನ್ನಲಾಗ್ತಿದೆ. ವಿಮಾನದ ಜೊತೆಗೆ 8 ಸಿಬ್ಬಂದಿ ಹಾಗೂ 5 ಪ್ರಯಾಣಿಕರು ಸಹ ನಾಪತ್ತೆಯಾಗಿದ್ದರು. ಈ ಅಪಘಾತದಲ್ಲಿ ಆಶಿಶ್ ಮೃತಪಟ್ಟಿದ್ದಾರೆ ಎಂದು ಅವರ ಪತ್ನಿ ಸಂಧ್ಯಾಗೆ ಮಂಗಳವಾರ ಸಂಜೆ 5:30ಕ್ಕೆ ಮಾಹಿತಿ ನೀಡಿಲಾಗಿದೆ. ಸಂಧ್ಯಾ ವಾಯುಪಡೆಯಲ್ಲಿ ರಡಾರ್ ಆಪರೇಟರ್ ಆಗಿ ಕೆಲಸ ಮಾಡುತ್ತಿದ್ದಾರೆ.
ಕಂಪ್ಯೂಟರ್ ಸೈನ್ಸ್ ಜತೆ ಬಿಟೆಕ್ ಪದವಿ ಪಡೆದಿದ್ದ ಆಶಿಶ್ 2013ರಲ್ಲಿ ವಾಯುಪಡೆ ಸೇರಿದ್ದರು. 2015ರಲ್ಲಿ ಪೈಲಟ್ ಆಗಿ ನಿಯುಕ್ತಿ ಹೊಂದಿದ್ದರು. ಅವರ ಕುಟುಂಬಕ್ಕೆ ಆಶಿಶ್ ಒಬ್ಬನೇ ಮಗ ಎಂದು ತಿಳಿದುಬಂದಿದೆ.
ಅಶಿಶ್ ಇನ್ನಿಲ್ಲವೆಂಬುದು ಕುಟುಂಬವನ್ನು ದುಃಖಕ್ಕೀಡು ಮಾಡಿದೆ. ಗ್ರಾಮದಲ್ಲಿ ಶೋಕ ಮನೆ ಮಾಡಿದ್ದು, ಜನರು ವೀರ ಯೋಧನ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸುತ್ತಿದ್ದಾರೆ.
