ನವದೆಹಲಿ: ಆಪರೇಷನ್ ಸಮುದ್ರ ಸೇತು ಅಡಿ 200 ಭಾರತೀಯರನ್ನು ಕರೆತರಲು ಎರಡನೇ ನೌಕೆ ಐಎನ್ಎಸ್ ಮಗರ್ ಮಾಲ್ಡೀವ್ಸ್ನ ಮಾಲೆ ತಲುಪಿದೆ. ಇದರ ಬೆನ್ನಲ್ಲೇ ಮಾಲ್ಡೀವ್ಸ್ನಿಂದ ಹೊರಟಿದ್ದ ಐಎನ್ಎಸ್ ಜಲಾಶ್ವ ಮಾಲ್ಡೀವ್ಸ್ನಿಂದ ಕೊಚ್ಚಿ ಬಂದರಿಗೆ ಇಂದು ಬೆಳಗ್ಗೆ 698 ಭಾರತೀಯ ನಾಗರಿಕರನ್ನು ಕರೆತಂದಿದೆ.
ಐಎನ್ಎಸ್ ಮಗರ್ ಕೊಚ್ಚಿ ಬಂದರಿನಿಂದ ಹೊರಟ್ಟಿದ್ದು, ಅಲ್ಲಿಂದ ಕರೆತರುವ ಎಲ್ಲ ಭಾರತೀಯರಿಗೆ ಬೇಕಾದ ಅಗತ್ಯ ಸಾಮಗ್ರಿಗಳನ್ನು ಹೊತ್ತು ಸಾಗಿದೆ. ಈ ನೌಕೆಯಲ್ಲಿ ಸುಮಾರು 200 ಭಾರತೀಯರನ್ನು ಕರೆತರುವ ಸಾಮರ್ಥ್ಯವಿದ್ದು, ಎಲ್ಲಾ ಮುಂಜಾಗ್ರತಾ ಕ್ರಮಗಳೊಂದಿಗೆ ವ್ಯಕ್ತಿಗಳ ನಡುವೆ ಸಾಮಾಜಿಕ ಅಂತರ ಕೂಡಾ ಕಾಪಾಡಿಕೊಳ್ಳಲಾಗುತ್ತದೆ ಎಂದು ನೌಕೆಯ ಹಿರಿಯ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
ಪ್ರಯಾಣದುದ್ದಕ್ಕೂ ಮಕ್ಕಳು, ಮಹಿಳೆಯರು ಹಾಗೂ ಹಿರಿಯ ನಾಗರಿಕರಿಗಾಗಿ ಪ್ರತ್ಯೇಕ ವಸತಿ ಕಲ್ಪಿಸಲಾಗುತ್ತಿದೆ. ಊಟದ ಸ್ಥಳ ಹಾಗೂ ಸ್ನಾನದ ಕೊಠಡಿಗಳಲ್ಲಿ ಜನದಟ್ಟಣೆ ತಪ್ಪಿಸಲು ಗುಂಪುಗಳನ್ನು ರಚಿಸಲಾಗಿದೆ ಎಂದಿದ್ದಾರೆ.
ಇದು ಮಾತ್ರವಲ್ಲದೇ ವಂದೇ ಭಾರತ ಮಿಷನ್ ಅಡಿ ಏರ್ ಇಂಡಿಯಾ 64 ವಿಮಾನಗಳ ಮೂಲಕ ಕಾರ್ಯಾಚರಣೆ ನಡೆಸುತ್ತಿದ್ದು, ವಿದೇಶಗಳಲ್ಲಿನ ಭಾರತೀಯರನ್ನು ಕರೆತರುತ್ತಿದೆ. ನೌಕೆಗಳ ಮೂಲಕ ಕರೆತರುವ ಆಪರೇಷನ್ ಸಮುದ್ರ ಸೇತು ಮೇ 8ರಿಂದ ಆರಂಭವಾಗಿದೆ.
