ಹೋಂವರ್ಕ್​ ಮಾಡದ ಮಗುವಿನಂತೆ ಮೋದಿ ನೆಪ ಹೇಳ್ತಾರೆ: ಪ್ರಿಯಾಂಕಾ ಕುಟುಕು

ಟೀಚರ್ ಏಕೆ ಹೋಂವರ್ಕ್​ ಮಾಡಲಿಲ್ಲ ಎಂದು ಮೋದಿಗೆ ಕೇಳಿದರೆ, ಅವರು ನೆಹರು ಪೇಪರ್​ ಕಿತ್ತುಕೊಂಡರು, ಇಂದಿರಾ ಗಾಂಧಿ ಆ ಪೇಪರ್​ನಲ್ಲಿ ದೋಣಿ ಮಾಡಿ ನೀರಿಗೆ ಬಿಟ್ಟರು ಎಂದು ನೆಪ ಹೇಳುತ್ತಿದ್ದಾರೆ ಎಂದು ಪ್ರಿಯಾಂಕಾ ಗಾಂಧಿ ವ್ಯಂಗ್ಯ ಮಾಡಿದರು.

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ವಾಕ್ಸಮರ ನಡೆಸುತ್ತಿರುವ ಪ್ರಿಯಾಂಕಾ ಗಾಂಧಿ, ಮೋದಿ ಹೋಂವರ್ಕ್​ ಮಾಡದ ಶಾಲೆಯ ಬಾಲಕನಂತೆ ಪ್ರತಿಯೊಂದಕ್ಕೂ ನೆಪ ಹೇಳುತ್ತಾರೆ ಎಂದು ಕಾಲೆಳೆದರು.

ನವದೆಹಲಿಯಲ್ಲಿ ಶೀಲಾ ದೀಕ್ಷಿತ್​ ಪರ ಪ್ರಚಾರ ಮಾಡಿದ ಅವರು, ಮೋದಿ ತಮ್ಮ ಹುಳುಕುಗಳನ್ನು ಮುಚ್ಚಿ ಹಾಕಲು ನೆಹರು ಕುಟುಂಬದ ಮೇಲೆ ಆರೋಪ ಮಾಡುತ್ತಿದ್ದಾರೆ ಎಂದರು.

ಮೋದಿ ಹೋಂವರ್ಕ್​ ಮಾಡದ ಶಾಲೆಯ ಹುಡುಗನಂತಾಗಿದ್ದಾರೆ. ಟೀಚರ್ ಏಕೆ ಹೋಂವರ್ಕ್​ ಮಾಡಲಿಲ್ಲ ಎಂದು ಮೋದಿಗೆ ಕೇಳಿದರೆ ಎಂದರೆ ಜವಾಹರ್​ಲಾಲ್ ನೆಹರು ಪೇಪರ್​ ಕಿತ್ತುಕೊಂಡರು, ಇಂದಿರಾ ಗಾಂಧಿ ಆ ಪೇಪರ್​ನಲ್ಲಿ ದೋಣಿ ಮಾಡಿ ನೀರಿಗೆ ಬಿಟ್ಟರು ಎಂಬೆಲ್ಲಾ ಕುಂಟು ನೆಪ ಹೇಳುತ್ತಿದ್ದಾರೆ ಎಂದು ಹೇಳಿಕೆ ನೀಡಿದ್ದಾರೆ.

ಇದೇ ವೇಳೆ ಪ್ರಧಾನಿಗೆ ಬಹಿರಂಗ ಸವಾಲು ಹಾಕಿರುವ ಪ್ರಿಯಾಂಕಾ, ನೋಟು ಅಮಾನ್ಯೀಕರಣ, ಜಿಎಸ್​ಟಿ, ಮಹಿಳಾ ಭದ್ರತೆಯನ್ನೇ ಮುಂದಿಟ್ಟುಕೊಂಡು ಚುನಾವಣೆ ಗೆದ್ದು ತೋರಿಸಿ ಎಂದಿದ್ದಾರೆ.

ಈ ಹಿಂದೆ ಮತಬೇಟೆಯ ವೇಳೆ ಮಾತನಾಡಿದ ಮೋದಿ 'ಭ್ರಷ್ಟಾಚಾರಿ ನಂ1' ರಾಜೀವ್ ಗಾಂಧಿ ಹೆಸರಿನಲ್ಲಿ ಪ್ರಿಯಾಂಕಾ ಚುನಾವಣೆ ಗೆಲ್ಲಲಿ ಎಂದು ಸವಾಲು ಹಾಕಿದ್ದರು.