ಸಂವಿಧಾನವನ್ನು ಅಂಗೀಕರಿಸಿದ ನೆನಪಿಗಾಗಿ ಪ್ರತಿವರ್ಷ ನವೆಂಬರ್ 26ರಂದು ಸಂವಿಧಾನ ದಿನ (ರಾಷ್ಟ್ರೀಯ ಕಾನೂನು ದಿನ) ಎಂದು ಆಚರಿಸುತ್ತೇವೆ. ಭಾರತವು ತನ್ನದೇ ಆದ ಸಂವಿಧಾನವನ್ನು ಅಳವಡಿಸಿಕೊಂಡ ದಿನ 1950 ಜನವರಿ 26. ಸಂವಿಧಾನವು 1949ರ ನವೆಂಬರ್ 26ರಲ್ಲಿಯೇ ಸಿದ್ಧಗೊಂಡು ಸಂಸತ್ನ ಅಂಗೀಕಾರ ಪಡೆದುಕೊಂಡಿತ್ತು. ಆದರೂ ಅದರ ಅಳವಡಿಕೆಗೆ ಜನವರಿ 26ರವರೆಗೂ ಕಾಯಲಾಯಿತು. ಬಳಿಕ ಅಂದಿನಿಂದ ಭಾರತದ ಇತಿಹಾಸದಲ್ಲಿ ಹೊಸಯುಗವೂ ಆರಂಭಗೊಂಡಿತು.
ಇಲ್ಲಿವೆ ನೋಡಿ.. ಪ್ರತಿಯೊಬ್ಬರೂ ತಿಳಿದುಕೊಳ್ಳಬೇಕಾದ ಭಾರತದ ಸಂವಿಧಾನದ ಕುತೂಹಲಕಾರಿ ಸಂಗತಿಗಳು ಇಂತಿವೆ
* ಸಂವಿಧಾನದ ಕರಡು ರಚನೆಯಲ್ಲಿ ಡಾ.ಬಿ.ಆರ್.ಅಂಬೇಡ್ಕರ್ ಅವರ ಪಾತ್ರ ಬಹು ದೊಡ್ಡದು. ಮಾನವೀಯ ಮೌಲ್ಯಗಳ ರಕ್ಷಣೆಗೆ ಶ್ರಮಿಸಿದ ಅಂಬೇಡ್ಕರ್ ಅವರ ಕಾರ್ಯಕ್ಕೆ ಇಡೀ ಭಾರತ ಇಂದಿಗೂ ಅವರನ್ನು ನೆನೆಯುತ್ತದೆ.
* 448 ವಿಧಿಗಳು, 12 ಅನುಚ್ಛೇದಗಳು, 25 ಭಾಗಗಳನ್ನು ಹೊಂದಿರುವ ಈ ಸಂವಿಧಾನವು ವಿಶ್ವದ ಅತಿದೊಡ್ಡ ಲಿಖಿತ ಸಂವಿಧಾನವಾಗಿದೆ.
* ಭಾರತದ ಮೂಲ ಸಂವಿಧಾನವನ್ನು ಕೈಬರಹದಲ್ಲಿ ಸಿದ್ದಪಡಿಸಿದ್ದು ಪ್ರೇಮ್ ಬಿಹಾರಿ ನರೈನ್ ರೈಜಾಡಾ. ಸುಂದರವಾದ ಕ್ಯಾಲಿಗ್ರಫಿಯೊಂದಿಗೆ ಇಟಾಲಿಕ್ ಶೈಲಿಯಲ್ಲಿ ಅವರು ಅದನ್ನು ಬರವಣಿಗೆಗೆ ಇಳಿಸಿದರು. ಅಲ್ಲದೆ, ಈ ಸಂವಿಧಾನ ಪೂರ್ಣಗೊಳಿಸಲು ತೆಗೆದುಕೊಂಡ ಕಾಲಾವಧಿ 6 ತಿಂಗಳು. ಮತ್ತೊಂದೆಡೆ, ನಂದಲಾಲ್ ಬೋಸ್ ಮತ್ತು ಶಾಂತಿನಿಕೇತನ ಕಲಾವಿದರ ತಂಡದೊಂದಿಗೆ ಸಂವಿಧಾನದ ಪ್ರತಿಯೊಂದು ಪುಟವೂ ಸೊಗಸಾಗಿ ಮೂಡಿ ಬರುವಂತೆ ಶ್ರಮಿಸಿದರು.
* 1946ರ ಡಿಸೆಂಬರ್ 9 ರಂದು ನಡೆದ ಸಂವಿಧಾನ ಸಭೆ, ಸ್ವತಂತ್ರ ಭಾರತದ ಮೊದಲ ಸಂಸತ್ತು. ಅಂದು ಸಭೆ ಸೇರಿದಾಗ ಡಾ.ಸಚ್ಚಿದಾನಂದ ಸಿನ್ಹಾ ಅವರು ಸಭೆಯ ಮೊದಲ ಹಂಗಾಮಿ ಅಧ್ಯಕ್ಷರಾಗಿ ನೇಮಕಗೊಂಡರು.
* ಸಂವಿಧಾನ ರಚಿಸಲು ತೆಗೆದುಕೊಂಡ ಕಾಲಾವಕಾಶ 2 ವರ್ಷ 11 ತಿಂಗಳು, 18 ದಿನ. ಕರಡನ್ನು ಸಿದ್ಧಪಡಿಸಿ ಚರ್ಚೆಗಳನ್ನು ನಡೆಸಿ ಅಂತಿಮಗೊಳಿಸುವುದಕ್ಕೂ ಮುನ್ನ ಒಟ್ಟು 2000ಕ್ಕೂ ಹೆಚ್ಚು ತಿದ್ದುಪಡಿಗಳನ್ನು ಮಾಡಲಾಗಿತ್ತು.
* ಭಾರತದ ಸಂವಿಧಾನದ ಮೂಲ ಪ್ರತಿಯನ್ನು ಕೈಬರಹದಲ್ಲಿ ಹಿಂದಿ ಮತ್ತು ಇಂಗ್ಲಿಷ್ ಭಾಷೆಯಲ್ಲಿ ಸಿದ್ಧಪಡಿಸಲಾಯಿತು. ಈ ಮೂಲ ಪ್ರತಿಗಳನ್ನು ಹೀಲಿಯಂ ತುಂಬಿರುವ ಪೆಟ್ಟಿಗೆಯಲ್ಲಿ ಭಾರತದ ಸಂಸತ್ತಿನ ಗ್ರಂಥಾಲಯದಲ್ಲಿ ಇರಿಸಲಾಗಿದೆ.
* 1950ರ ಜನವರಿ 26ರಂದು ಜಾರಿಗೆ ಬಂದ ಸಂವಿಧಾನಕ್ಕೆ ಸಂವಿಧಾನ ರಚನಾ ಸಭೆಯ ಒಟ್ಟು 284 ಸದಸ್ಯರು ಸಹಿ ಹಾಕಿದರು.
* ಭಾರತ ಸಂವಿಧಾನದ ಕೆಲವು ಅಂಶಗಳನ್ನು ಬ್ರಿಟನ್, ಐರ್ಲೆಂಡ್, ಅಮೆರಿಕಾ, ಜಪಾನ್, ಫ್ರಾನ್ಸ್, ರಷ್ಯಾ, ದಕ್ಷಿಣಾ ಆಫ್ರಿಕಾ, ಜರ್ಮನಿ, ಆಸ್ಟ್ರೇಲಿಯಾ ಮತ್ತು ಕೆನಡಾ ದೇಶಗಳಿಂದ ಎರವಲು ಪಡೆಯಲಾಗಿದೆ.
* ಜವಾಹರಲಾಲ್ ನೆಹರೂ ಪ್ರಧಾನಿಯಾಗಿದ್ದಾಗ ಭಾರತದ ಸಂವಿಧಾನದ ಮೊದಲ ತಿದ್ಧುಪಡಿಯಾಗಿತ್ತು. ಈ ತಿದ್ದುಪಡಿಯಲ್ಲಿ 5, 19, 85, 87, 174, 176, 341, 342, 372 ಮತ್ತು 376 ವಿಧಿಗಳನ್ನು ಸೇರಿಸಲಾಯಿತು. ಪ್ರಸಕ್ತ ಸಂವಿಧಾನದಲ್ಲಿ 103 ತಿದ್ದುಪಡಿಗಳಾಗಿವೆ.
* 1947ರ ಜೂನ್ 11ರಂದು ನಡೆದ ಭಾರತ ಮತ್ತು ಪಾಕಿಸ್ತಾನ ಸಂವಿಧಾನ ಸಭೆಗೆ ಹೈದಾರಾಬಾದ್ ನಿಜಾಮರು ಪಾಲ್ಗೊಂಡಿರಲಿಲ್ಲ. ಅಷ್ಟೇ ಅಲ್ಲದೆ, ಈ ಸಭೆ ಮುಕ್ತಾಯವಾಗುವವರೆಗೂ ತನ್ನ ಯಾವುದೇ ಪ್ರತಿನಿಧಿಯನ್ನು ಕಳುಹಿಸಲಿಲ್ಲ.
