ಕಲಬುರಗಿ: ಮಹಾಮಾರಿ ಕೊರೊನಾ ಭೀತಿಯಿಂದಾಗಿ ಈಗಾಗಲೇ ಎಲ್ಲ ಮಾಲ್,ಸಿನಿಮಾ ಹಾಲ್, ಕೆಲವೊಂದು ಮಾರುಕಟ್ಟೆ ಸೇರಿದಂತೆ ಪ್ರಮುಖ ಕ್ಷೇತ್ರದ ವ್ಯಾಪಾರ ಸಂಪೂರ್ಣವಾಗಿ ಬಂದ್ ಆಗಿದೆ. ಇದರ ಬೆನ್ನಲ್ಲೇ ಹೊರಬಿದ್ದ ಗಾಳಿ ಸುದ್ದಿ ನಂಬಿ ವಾಹನ ಸವಾರರು ಪೆಟ್ರೋಲ್ ತುಂಬಿಸಿಕೊಳ್ಳಲು ಮುಗಿಬಿದಿದ್ದಾರೆ.
ಇಂದಿನಿಂದ ಕಲಬುರಗಿಯಲ್ಲಿ ಎಂಟು ದಿನಗಳ ಕಾಲ ಪೆಟ್ರೋಲ್ ಬಂಕ್ ಬಂದ್ ಇರಲಿವೆ ಎಂಬ ಗಾಳಿ ಸುದ್ದಿಯಿಂದ ಗಾಬರಿಯಾದ ವಾಹನ ಸವಾರರು ರಾತ್ರೋರಾತ್ರಿ ಪೆಟ್ರೋಲ್ ಬಂಕ್ಗಳಿಗೆ ಮುಗಿಬಿದ್ದಿದ್ದಾರೆ. ಕೊರೊನಾ ಹಿನ್ನೆಲೆಯಲ್ಲಿ ಜಿಲ್ಲೆಯಲ್ಲಿ ಮುಂದಿನ ಎಂಟು ದಿನಗಳ ಕಾಲ ಬಂಕ್ ಸಂಪೂರ್ಣವಾಗಿ ಬಂದ್ ಇರಲಿವೆ ಎಂಬ ಸುದ್ದಿ ವಾಟ್ಸಪ್ನಲ್ಲಿ ಹರಿದಾಡಿತ್ತು. ಇದರಿಂದ ವಾಹನ ಸವಾರರು ರಾತ್ರೋರಾತ್ರಿ ಪೆಟ್ರೋಲ್, ಡಿಸೇಲ್ ತುಂಬಿಸಿಕೊಳ್ಳಲು ಬೈಕ್, ಕಾರ್ ತ ಎಗೆದುಕೊಂಡು ಬಂಕ್ಗಳ ಮುಂದೆ ದೌಡಾಯಿಸಿದ್ದಾರೆ.
ಸವಾರರು ಏಕಾಏಕಿ ಮುಗಿಬಿದ್ದ ಕಾರಣ, ಸುಮಾರು ದೂರದವರೆಗೆ ವಾಹನಗಳು ಸರದಿ-ಸಾಲಿನಲ್ಲಿ ನಿಂತಿದ್ದವು. ಈ ವೇಳೆ ಪೆಟ್ರೋಲ್ ಬಂಕ್ ಸಿಬ್ಬಂದಿ ಮಾಹಿತಿ ನೀಡಿದರೂ ಅವರ ಮಾತಿಗೆ ಕಿವಿಗೊಡದ ಸವಾರರು ತೈಲ ತುಂಬಿಸಿಕೊಳ್ಳುವ ದೃಶ್ಯ ಸಾಮಾನ್ಯವಾಗಿತ್ತು. ಆದರೆ ಪೆಟ್ರೋಲ್ ಪಂಪ್ ಬಂದ್ ಬಗ್ಗೆ ಇಲ್ಲಿನ ಜಿಲ್ಲಾಧಿಕಾರಿಗಳು ಯಾವುದೇ ಮಾಹಿತಿ ಹೊರಹಾಕಿಲ್ಲ.
