ಮುಂಬೈ(ಮಹಾರಾಷ್ಟ್ರ): ಸಲ್ಮಾನ್ ಖಾನ್ ಅಭಿನಯದ ಬಹುನಿರೀಕ್ಷಿತ ಚಿತ್ರ ದಬಾಂಗ್ 3 ಬಿಡುಗಡೆಗೂ ಮುನ್ನವೇ ಸಿನಿಮಾ ವಿರುದ್ಧ ಮಹಾರಾಷ್ಟ್ರದ ಹಿಂದೂ ಜನಜಾಗೃತಿ ಸಮಿತಿ ಪ್ರತಿಭಟನೆ ನಡೆಸಿದೆ. ಹಿಂದೂ ಸಾಧುಗಳ (ಸನ್ಯಾಸಿಗಳು) ಕುರಿತು ಅಸಭ್ಯವಾಗಿ ಬಿಂಬಿಸಲಾಗಿದೆ ಎಂಬ ಆರೋಪ ಕೇಳಿಬಂದಿದ್ದು, ಈ ದೃಶ್ಯವನ್ನು ತೆಗೆದುಹಾಕುವಂತೆ ಒತ್ತಾಯಿಸಲಾಗಿದೆ.
ಈ ಸಂಬಂಧ ಪ್ರತಿಕ್ರಯಿಸಿರುವ ಹಿಂದೂ ಜನಜಾಗೃತಿ ಸಮಿತಿಯ ಅರವಿಂದ್ ಪನ್ಸಾರೆ, ದಬಾಂಗ್ 3 ಸಿನಿಮಾದಲ್ಲಿ ಹಿಂದೂ ಸಾಧುಗಳು ಗಿಟಾರ್ ಹಿಡಿದುಕೊಂಡು ಕನ್ನಡಕಗಳನ್ನು ಧರಿಸಿ ನೃತ್ಯ ಮಾಡುತ್ತಿರುವಂತೆ ಅಸಭ್ಯ ಚಿತ್ರಣವನ್ನು ಚಿತ್ರಿಸಿರುವ ದೃಶ್ಯ ಈ ಸಿನಿಮಾದಲ್ಲಿದೆ ಎನ್ನಲಾಗ್ತಿದೆ. ಇದು ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತರುತ್ತದೆ. ಸಾಧುಗಳನ್ನು ಹಿಂದೂ ಧರ್ಮದಲ್ಲಿ ಗೌರವದಿಂದ ನೋಡಲಾಗುತ್ತದೆ. ಹೀಗಾಗಿ ಈ ರೀತಿಯ ಚಿತ್ರಣಗಳನ್ನು ನಾವು ಸಹಿಸುವುದಿಲ್ಲ. ಈ ದೃಶ್ಯವನ್ನು ಸಿನಿಮಾದಿಂದ ತೆಗೆದುಹಾಕುವವರೆಗೂ ದೇಶಾದ್ಯಂತ ಪ್ರತಿಭಟನೆ ಮುಂದುವರೆಸುತ್ತೇವೆ ಎಂದು ಕಿಡಿಕಾರಿದ್ದಾರೆ.
ಅಲ್ಲದೇ ಸಲ್ಮಾನ್ ಖಾನ್ ನಮ್ಮ ಪ್ರತಿಭಟನೆಯನ್ನು 'ಪ್ರಚಾರದ ಗಿಮಿಕ್' ಎಂದು ಕರೆದು ಧಾರ್ಮಿಕ ಭಾವನೆಗಳಿಗೆ ಅನುಮಾನ ಮಾಡಿದ್ದಾರೆ ಎಂದು ಪ್ರತಿಭಟನಾಕಾರರು ಆರೋಪಿಸಿದ್ದಾರೆ.
ನವೆಂಬರ್ 27 ರಂದು ಮಹಾರಾಷ್ಟ್ರ ಹಾಗೂ ಛತ್ತೀಸ್ಗಢದ ಹಿಂದೂ ಜನಜಾಗೃತಿ ಸಮಿತಿ ವತಿಯಿಂದ ಚಿತ್ರದಲ್ಲಿನ ದೃಶ್ಯದ ಬಗ್ಗೆ ಕಳವಳ ವ್ಯಕ್ತವಾಗಿದೆ. ಅಲ್ಲದೆ, ದೃಶ್ಯವನ್ನು ತೆಗೆದು ಹಾಕುವಂತೆ ಸೆನ್ಸಾರ್ ಮಂಡಳಿಗೆ ಒತ್ತಾಯಿಸಿತ್ತು.
ಇನ್ನು, ಪ್ರಭುದೇವ ನಿರ್ದೇಶನದ ದಬಾಂಗ್ 3 ಚಿತ್ರವನ್ನು ಸಲ್ಮಾನ್, ಅರ್ಬಾಜ್ ಖಾನ್ ಮತ್ತು ನಿಖಿಲ್ ದ್ವಿವೇದಿ ನಿರ್ಮಾಣ ಮಾಡಿದ್ದು, ಡಿಸೆಂಬರ್ 20 ರಂದು ತೆರೆ ಮೇಲೆ ಬರಲಿದೆ.
