ನವದೆಹಲಿ: ಕೇಂದ್ರ ಬಜೆಟ್ ಮಂಡನೆಗೆ ದಿನಗಣನೆ ಶುರುವಾಗಿದೆ. ಫೆಬ್ರುವರಿ ಒಂದರಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಬಜೆಟ್ ಮಂಡಿಸಲಿದ್ದಾರೆ. ಇದರ ನಡುವೆ ಈ ಬಾರಿಯ ಬಜೆಟ್ನಲ್ಲಿ ಹಣಕಾಸಿನ ಕೊರತೆ(fiscal deficit number) ಎಷ್ಟಿರಲಿದೆ ಎಂಬುದು ಬಹಳಷ್ಟು ಕುತೂಹಲ ಮೂಡಿಸಿದೆ. ಇದಕ್ಕೆಲ್ಲಾ ನಿರ್ಮಲಾ ಸೀತಾರಾಮನ್ ಫೆಬ್ರುವರಿ 1ರಂದು ತೆರೆ ಎಳೆಯುವ ಸಾಧ್ಯತೆಯಿದೆ.
ನಿರ್ಮಾಲಾ ಸೀತಾರಾಮನ್ ಕಳೆದ ವರ್ಷ ಜುಲೈನಲ್ಲಿ ಮಂಡಿಸಿದ್ದ ತಮ್ಮ ಚೊಚ್ಚಲ ಬಜೆಟ್ನಲ್ಲಿ, 2019-2020ನೇ ಹಣಕಾಸು ವರ್ಷದ ಹಣಕಾಸಿನ ಕೊರತೆಯು ದೇಶದ ಜಿಡಿಪಿಯ 3.3% ಅಥವಾ 7 ಲಕ್ಷ ಕೋಟಿ ರೂ. ಎಂದು ಅಂದಾಜಿಸಿದ್ದರು.
ಕೇಂದ್ರ ಮತ್ತು ರಾಜ್ಯಗಳಲ್ಲಿ ಹಣಕಾಸಿನ ಶಿಸ್ತು ಮೂಡಿಸಲು 2003ರಲ್ಲಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರ ಸರ್ಕಾರವು ಹಣಕಾಸಿನ ಜವಾಬ್ದಾರಿ ಮತ್ತು ಬಜೆಟ್ ನಿರ್ವಹಣಾ ಕಾಯ್ದೆ(FRBM Act) ಜಾರಿಗೆ ತಂದಿತ್ತು. ಕೇಂದ್ರವು ತನ್ನ ಆದಾಯ ಕೊರತೆ(revenue deficit)ಅನ್ನು ಶೂನ್ಯ ಶೇಕಡಾ ಮತ್ತು ಹಣಕಾಸಿನ ಕೊರತೆಯನ್ನು ಜಿಡಿಪಿಯ ಶೇ.3 ಕ್ಕೆ ಇಳಿಸುವ ಅಗತ್ಯವಿತ್ತು.
ಹೀಗಿದ್ದರೂ, ಹಲವು ಅರ್ಥಶಾಸ್ತ್ರಜ್ಞರು ಎಫ್‌ಆರ್‌ಬಿಎಂ ಕಾಯ್ದೆಯ ನಿಬಂಧನೆಗಳನ್ನು ಇತ್ತೀಚಿನ ವರ್ಷಗಳಲ್ಲಿ ದುರ್ಬಲಗೊಳಿಸಲಾಗಿದೆ. ಇದು ದೇಶದ ಆರ್ಥಿಕತೆಯಲ್ಲಿ ರಚನಾತ್ಮಕ ದೌರ್ಬಲ್ಯ(structural weakness)ಕ್ಕೆ ಕಾರಣವಾಗಿದೆ ಎಂದು ಅಭಿಪ್ರಾಯಪಟ್ಟರು. ಹೀಗಾಗಿ ಆರ್ಥಿಕ ಚೇತರಿಕೆಗಾಗಿ ಮೋದಿ ಸರ್ಕಾರವು ಮೂಲ ಎಫ್‌ಆರ್‌ಬಿಎಂ ಕಾಯ್ದೆಗೆ ಹಿಂದಿರುಗಬೇಕೆಂದು ಸಲಹೆ ನೀಡಿದರು.
'ತತ್ತ್ವಶಾಸ್ತ್ರದ ಪ್ರಕಾರ, ಎಫ್‌ಆರ್‌ಬಿಎಂ ಕಾಯ್ದೆಯು ಆದಾಯದ ಖರ್ಚಿನಿಂದ ಬಂಡವಾಳ ವೆಚ್ಚದವರೆಗೆ ಖರ್ಚು ಬದಲಾಯಿಸುವ ಕಾರ್ಯ ವಿಧಾನವಾಗಿದೆ ಮತ್ತು ಇದು ಖರ್ಚು ಸಂಕುಚಿತ ಕಾರ್ಯವಿಧಾನ(expenditure compression mechanism)ಅಲ್ಲ' ಎಂದು ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಪಬ್ಲಿಕ್ ಫೈನಾನ್ಸ್ ಮತ್ತು ಪಾಲಿಸಿಯ ಪ್ರಾಧ್ಯಾಪಕ ಎನ್.ಆರ್. ಭಾನುಮೂರ್ತಿ ಹೇಳಿದರು.
'ಮೂಲ ಎಫ್‌ಆರ್‌ಬಿಎಂ ಕಾಯ್ದೆಯು ಹಣಕಾಸಿನ ಕೊರತೆಯನ್ನು ಜಿಡಿಪಿಯ 3% ಮತ್ತು ಆದಾಯ ಕೊರತೆಯನ್ನು ಶೂನ್ಯ ಶೇಕಡಕ್ಕೆ ತರುವಂತೆ ಆದೇಶಿಸಿದೆ. ಈ ಹೊಂದಾಣಿಕೆಯಲ್ಲಿ ಬಂಡವಾಳ ವೆಚ್ಚವು ಒಂದು ಅವಧಿಯಲ್ಲಿ ಹೆಚ್ಚಾಗುತ್ತದೆ ಮತ್ತು ಬಳಕೆಯ ಖರ್ಚು ಕುಸಿಯುತ್ತದೆ' ಎಂದು ಅವರು ಹೆಚ್ಚಿನ ಬಂಡವಾಳ ವೆಚ್ಚ ಮತ್ತು ಹೆಚ್ಚಿನ ಜಿಡಿಪಿ ಬೆಳವಣಿಗೆಯ ನಡುವಿನ ನೇರ ಸಂಬಂಧವನ್ನು ವಿವರಿಸುವಾಗ ಈಟಿವಿ ಭಾರತಕ್ಕೆ ತಿಳಿಸಿದರು.
ಬಂಡವಾಳ ವೆಚ್ಚವು ರಸ್ತೆಗಳು, ಬಂದರುಗಳು, ಶಾಲೆಗಳು ಮತ್ತು ಆಸ್ಪತ್ರೆಗಳ ನಿರ್ಮಾಣದಂತಹ ಆಸ್ತಿ ಸೃಷ್ಟಿಗೆ ಹೋಗುತ್ತದೆ. ದೇಶದ ಆರ್ಥಿಕ ಬೆಳವಣಿಗೆಗೆ ಪ್ರಮುಖ ಪಾತ್ರ ವಹಿಸುವ ಮೂಲಸೌಕರ್ಯ ಅಭಿವೃದ್ಧಿಗೆ ಹೆಚ್ಚಿನ ಹಣ ಹರಿಯುತ್ತದೆ.
2018-19ರಲ್ಲಾದ ಬದಲಾವಣೆ...
"2018-19ರ ಕೇಂದ್ರ ಸರ್ಕಾರದ ಹಣಕಾಸು ಮಸೂದೆಯಲ್ಲಿ ಆದಾಯ ಕೊರತೆಯ ವ್ಯತ್ಯಾಸವನ್ನು ತೆಗೆದುಹಾಕಲಾಯ್ತು. ಈಗ ಸರ್ಕಾರವು ಹಣಕಾಸಿನ ಕೊರತೆ ಮತ್ತು ಸಾರ್ವಜನಿಕ ಸಾಲವನ್ನು ಮಾತ್ರ ಹೊಂದಿದ್ದು, ಹಣಕಾಸಿನ ಕೊರತೆ ಮತ್ತು ಸಾರ್ವಜನಿಕ ಸಾಲವೂ ಕಡಿಮೆಯಾಗಬೇಕು ಎಂದು ಹೇಳುತ್ತಿದೆ. ಆದರೆ ಆದಾಯ ಕೊರತೆಯ ವ್ಯತ್ಯಾಸವನ್ನು ತೆಗೆದುಹಾಕಿದರೆ ಅದು ಸಾಧ್ಯವಿಲ್ಲ" ಎಂದು ಅರ್ಥಶಾಸ್ತ್ರಜ್ಞ ಹೇಳುತ್ತಾರೆ. ದೇಶದ ಆರ್ಥಿಕತೆಯಲ್ಲಿ ರಚನಾತ್ಮಕ ದೌರ್ಬಲ್ಯಕ್ಕೆ ಕಾರಣವಾದ ಮೂಲ ಎಫ್‌ಆರ್‌ಬಿಎಂ ಕಾಯ್ದೆಯ ದುರ್ಬಲಗೊಳಿಸುವಿಕೆಯನ್ನು ಪ್ರೊ. ಭಾನುಮೂರ್ತಿ ದೂಷಿಸಿದ್ದಾರೆ.
"2018 ರಿಂದ ದೇಶದಲ್ಲಿ ಆಗುತ್ತಿರುವುದೆಲ್ಲ ಮೂಲ ಎಫ್‌ಆರ್‌ಬಿಎಂ ಕಾಯ್ದೆಯ ಉದ್ದೇಶಕ್ಕೆ ವಿರುದ್ಧವಾಗಿದೆ. ಬಂಡವಾಳ ವೆಚ್ಚ ಕಡಿಮೆಯಾಗುತ್ತಿರುವಾಗ ನಮ್ಮ ಆದಾಯ ವೆಚ್ಚ ಹೆಚ್ಚುತ್ತಿದೆ. 2019 ರಲ್ಲಿ, ಬಂಡವಾಳ ವೆಚ್ಚವು ಸಂಪೂರ್ಣವಾಗಿ ಕಡಿಮೆಯಾಗಿದೆ" ಎಂದು ಅವರು ವಿವರಿಸಿದರು. ಕಡಿಮೆ ಬಂಡವಾಳ ವೆಚ್ಚವು ಆರ್ಥಿಕತೆಯಲ್ಲಿ ರಚನಾತ್ಮಕ ಕುಸಿತಕ್ಕೆ ಕಾರಣವಾಗಿದೆ ಎಂದು ಆರೋಪಿಸಿದರು.
ಈ ಆರ್ಥಿಕ ವರ್ಷದ ಜುಲೈ-ಸೆಪ್ಟಂಬರ್ ತ್ರೈಮಾಸಿಕದಲ್ಲಿ ಜಿಡಿಪಿ ಬೆಳವಣಿಗೆಯು 4.5% ಕ್ಕೆ ಇಳಿದಿದೆ. ಇದು 2012-13ರ ಜನವರಿ-ಮಾರ್ಚ್ ಬಳಿಕ ದಾಖಲಾದ ಅತಿ ಕಡಿಮೆ ಪ್ರಮಾಣ.
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಮತ್ತು ಅಂತಾರಾಷ್ಟ್ರೀಯ ಹಣಕಾಸು ಸಂಸ್ಥೆ (IMF) ಯಂತಹ ಅಂತಾರಾಷ್ಟ್ರೀಯ ಸಂಸ್ಥೆಗಳು ಈ ಹಣಕಾಸು ವರ್ಷದಲ್ಲಿ ಭಾರತದ ಜಿಡಿಪಿ ಬೆಳವಣಿಗೆ 5% ಕ್ಕಿಂತ ಕಡಿಮೆ ಎಂದು ಅಂದಾಜಿಸಿದೆ.
