ಕೃಷಿ ಮಾಡಲು ಪೆರೋಲ್​ ಕೇಳಿದ ವಿವಾದಿತ ರಾಮ್​ ರಹೀಮ್​... ರಾಜಕಾರಣಿಗಳ ಬೆಂಬಲ

ತನ್ನ ಒಡೆತನದಲ್ಲಿರುವ ಹೊಲಗಳಲ್ಲಿ ಕೃಷಿ ಮಾಡಬೇಕಾಗಿರುವುದಕ್ಕೆ ತನಗೆ ಬಿಡುವುಬೇಕೆಂದು ವಿವಾದಿತ ರಾಮ್​ ರಹೀಮ್​ ಪೆರೋಲ್​ಗಾಗಿ ಅರ್ಜಿ ಸಲ್ಲಿಸಿದ್ದಾನೆ.

ಚಂಡೀಗಢ: ಅತ್ಯಾಚಾರ ಹಾಗೂ ಕೊಲೆ ಪ್ರಕರಣಗಳ ಸಂಬಂಧ ಜೈಲು ಶಿಕ್ಷೆ ಅನುಭವಿಸುತ್ತಿರುವ ಡೇರಾ ಸಚ್ಚಾ​​​ಸೌಧದ ಮುಖ್ಯಸ್ಥ ಗುರ್ಮಿತ್​ ರಾಮ್​ ರಹೀಮ್​ ಬಾಬಾ ಒಣ ಭೂಮಿಯಲ್ಲಿ ಕೃಷಿ ಮಾಡಲು ತನಗೆ ಜಾಮೀನು ಬೇಕೆಂದು ಪೆರೋಲ್​ಗಾಗಿ ಅರ್ಜಿ ಸಲ್ಲಿಸಿದ್ದು, ಇದಕ್ಕೆ ರಾಜಕಾರಣಿಗಳು ಬೆಂಬಲ ನೀಡಿರುವುದು ವಿವಾದಕ್ಕೆ ಎಡೆ ಮಾಡಿಕೊಟ್ಟಿದೆ.

ತನ್ನ ಒಡೆತನದಲ್ಲಿರುವ ಹೊಲಗಳಲ್ಲಿ ಕೃಷಿ ಮಾಡಬೇಕಾಗಿರುವುದಕ್ಕೆ ತನಗೆ ಬಿಡುವುಬೇಕೆಂದು ರಾಮ್​ ರಹೀಮ್​ ತನ್ನ ವಕೀಲರ ಮೂಲಕ ಅರ್ಜಿ ಸಲ್ಲಿಸಿದ್ದು, 42 ದಿನಗಳ ಕಾಲ ಪೆರೋಲ್​ ಬಯಸಿದ್ದಾನೆ.

ತನ್ನ ವಿರುದ್ಧ ಸುದ್ದಿ ಬರೆದ ಪತ್ರಕರ್ತನ ಹತ್ಯೆ ಹಾಗೂ ಇಬ್ಬರ ಮೇಲೆ ಅತ್ಯಾಚಾರ ಪ್ರಕರಣ ಸಂಬಂಧ ರಾಮ್​ ರಹೀಮ್​ ಜೈಲು ಶಿಕ್ಷೆ ಅನುಭವಿಸುತ್ತಿದ್ದಾನೆ. ರಾಮ್​ ರಹೀಮ್ ಬಂಧನಕ್ಕೊಳಗಾಗುವ ಮುನ್ನ ಆತನ ಆಶ್ರಮದ ಮುಂದೆ ಗಲಾಟೆ ನಡೆದಿತ್ತು. ಭಕ್ತರು ಹಾಗೂ ಪೊಲೀಸರ ನಡುವಿನ ಘರ್ಷಣೆ ನಂತರ ಸೇನಾ ನೆರವಿನಿಂದ ರಾಮ್​ ರಹೀಮ್​ನನ್ನು ಬಂಧಿಸಲಾಗಿತ್ತು.