ನವದೆಹಲಿ: ಪ್ರವಾಸಿ ಆಸ್ಟ್ರೇಲಿಯಾ ಹಾಗೂ ಭಾರತ ತಂಡಗಳ ನಡುವೆ ನಡೆದ ಐದು ಏಕದಿನ ಪಂದ್ಯಗಳ ಸರಣಿಯ ಕ್ಲೈಮ್ಯಾಕ್ಸ್ ಪಂದ್ಯದಲ್ಲಿ ಗೆಲುವು ದಾಖಲು ಮಾಡಿರುವ ಕಾಂಗರೂ ಪಡೆ ಸರಣಿಯನ್ನ 3-2 ಅಂತರದಿಂದ ಕೈವಶ ಮಾಡಿಕೊಂಡಿದೆ.
ಕೊನೆಯ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಪಡೆ 35 ರನ್ಗಳ ಗೆಲುವು ದಾಖಲು ಮಾಡಿ ಐದು ಏಕದಿನ ಪಂದ್ಯಗಳ ಸರಣಿಯನ್ನ 3-2 ಅಂತರದಲ್ಲಿ ಕೈವಶ ಮಾಡಿಕೊಂಡಿದೆ. ಫಿರೋಜ್ ಶಾ ಕೋಟ್ಲಾ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ ತಂಡ ಉಸ್ಮಾನ್ ಖವಾಜ್ ಅವರ ಆಕರ್ಷಕ ಶತಕದ ನೆರವಿನಿಂದ ನಿಗದಿತ 50 ಓವರ್ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 272 ರನ್ ಗಳಿಕೆ ಮಾಡಿತು.
ಸ್ಪರ್ಧಾತ್ಮಕ 273 ರನ್ ಟಾರ್ಗೆಟ್ ಬೆನ್ನತ್ತಿದ್ದ ಟೀಂ ಇಂಡಿಯಾ ಆರಂಭದಲ್ಲೇ ಅಘಾತ ಅನುಭವಿಸಿತು. ಕಳೆದ ಪಂದ್ಯದಲ್ಲಿ ಶತಕ ಸಿಡಿಸಿದ್ದ ಶಿಖರ್ ಧವನ್ (12) ರನ್ ಗಳಿಕೆ ಮಾಡಿ ಪೆವಿಲಿಯನ್ ಸೇರಿಕೊಂಡರು. ಇದಾದ ಬಳಿಕ ಬಂದ ಕ್ಯಾಪ್ಟನ್ ವಿರಾಟ್ ಕೊಹ್ಲಿ ಕೂಡ 20 ರನ್ ಗಳಿಕೆ ಮಾಡಿ ವಿಕೆಟ್ ಒಪ್ಪಿಸಿದರು. ವಿರಾಟ್ ವಿಕೆಟ್ ಪತನವಾಗುತ್ತಿದ್ದಂತೆ ರಿಷಭ್ ಪಂತ್‌ (16), ವಿಜಯ್‌ ಶಂಕರ್‌(16), ರವೀಂದ್ರ ಜಡೇಜಾ(0) ವಿಕೆಟ್ ಒಪ್ಪಿಸಿ ನಿರಾಸೆ ಮೂಡಿಸಿದರು.
ಗೆಲುವಿನ ಆಸೆ ಮೂಡಿಸಿದ್ದ ಭುವಿ-ಕೇದಾರ್
ಟೀಂ ಇಂಡಿಯಾ 28.5 ಓವರ್ಗಳಲ್ಲಿ ಪ್ರಮುಖ ಆರು ವಿಕೆಟ್ ಕಳೆದುಕೊಂಡು 132 ರನ್ ಗಳಿಕೆ ಮಾಡಿದ್ದ ವೇಳೆ ಮೈದಾನ ಹಂಚಿಕೊಂಡ ಭುವಿ-ಕೇದಾರ್ ಗೆಲುವಿನ ಭರವಸೆ ಮೂಡಿಸಿದ್ದರೂ ಪ್ರಯೋಜನವಾಗಲಿಲ್ಲ. ಈ ಜೋಡಿ 80 ರನ್ಗಳ ಜೊತೆಯಾಟವಾಡುವ ಜತೆಗೆ ತಂಡವನ್ನ 200ರ ಗಡಿ ದಾಟುವಂತೆ ಮಾಡಿತ್ತು.
ಆದರೆ 46 ರನ್ ಗಳಿಕೆ ಮಾಡಿದ್ದ ವೇಳೆ ದೊಡ್ಡ ಹೊಡತಕ್ಕೆ ಕೈ ಹಾಕಿದ ಭುವಿ ಕ್ಯಾಚ್ ನೀಡಿ ನಿರ್ಗಮಿಸಿದರೆ, ಇದರ ಬೆನ್ನಲ್ಲೇ ಕೇದಾರ್ ಜಾಧವ್(44)ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಹೀಗಾಗಿ ತಂಡ ಸಂಪೂರ್ಣವಾಗಿ ಗೆಲುವಿನ ಆಸೆ ಕೈ ಬಿಡುವಂತಾಯಿತು. ಕೊನೆಯದಾಗಿ ತಂಡ 50 ಓವರ್ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡು 237 ರನ್ ಗಳಿಕೆ ಮಾಡಿದ್ದರಿಂದ 35 ರನ್ಗಳ ಸೋಲು ಕಾಣುವಂತಾಯಿತು. ಈಗಾಗಲೇ ಟೀಂ ಇಂಡಿಯಾ ಟಿ-20 ಸರಣಿ ಕೂಡ ಕೈಚೆಲ್ಲಿದೆ.
ಆಸ್ಟ್ರೇಲಿಯಾ ಪರ ಜಂಪಾ ಮಾರಕ ಬೌಲಿಂಗ್ ನಡೆಸಿ 3 ವಿಕೆಟ್ ಪಡೆದುಕೊಂಡರೆ, ಕಮ್ಮಿನ್ಸ್, ರಿಚರ್ಡಸನ್ ತಲಾ 2 ವಿಕೆಟ್ ಹಾಗೂ ಸ್ಟೋನಿಸ್, ನೇಥನ್ ಲಯನ್ 1 ವಿಕೆಟ್ ಪಡೆದು ಮಿಂಚಿದರು.
