ಮುಂಬೈ: ಸೂರತ್ನ ಉದ್ಯಮಿಯೋರ್ವನನ್ನು ಅಪಹರಿಸಿ 25 ಲಕ್ಷಕ್ಕೆ ಬೇಡಿಕೆ ಇಟ್ಟಿದ್ದ ನಕಲಿ ಪೊಲೀಸ್ ಅಧಿಕಾರಿಯನ್ನು ಇಲ್ಲಿನ ಅಪರಾಧ ತಡೆ ವಿಭಾಗದ ತಂಡ ವಶಕ್ಕೆ ಪಡೆದಿದ್ದಾರೆ.
ಬಂಧಿತ ಆರೋಪಿ ರಾಜಸ್ಥಾನ ಮೂಲದ ಶ್ಯಾಮ್ ಸುಂದರ್ ಶರ್ಮಾ (38) ಉದ್ಯಮಿಯೋರ್ವನಿಗೆ ಕಂದಾಯ ಇಲಾಖೆಯೊಂದಿಗಿನ ವ್ಯಾಜ್ಯವನ್ನು ಇತ್ಯರ್ಥಗೊಳಿಸುವುದಾಗಿ ಬಲೆಗೆ ಬೀಳಿಸಿಕೊಂಡಿದ್ದ. ಅಲ್ಲದೆ ನಾನು ಐಪಿಎಸ್ ಮುಗಿಸಿ ಪೊಲೀಸ್ ಅಧಿಕಾರಿಯಾಗಿ ಸೇವೆಯಲ್ಲಿರುವುದಾಗಿ ಉದ್ಯಮಿಗೆ ತಿಳಿಸಿದ್ದ.
ಆರೋಪಿ ಗುಜರಾತ್ನಲ್ಲಿರುವ ಕುರಿತು ಖಚಿತ ಮಾಹಿತಿ ಪಡೆದಿದ್ದ ತಂಡ ಆತನ ಬೆನ್ನು ಬಿದ್ದಿತ್ತು. ಆದರೆ ಇದರ ಸುಳಿವು ಪಡೆದಿದ್ದ ಖದೀಮ ಅಲ್ಲಿಂದ ಎಸ್ಕೇಪ್ ಆಗಿದ್ದ. ಅಲ್ಲಿಂದ ಸುಮಾರು 1 ಸಾವಿರ ಕಿ.ಮೀವರೆಗೂ ಬೆನ್ನು ಹತ್ತಿದ ಎಇಸಿ ತಂಡ ಕೊನೆಗೆ ಕರ್ನಾಟಕದ ಹುಬ್ಬಳ್ಳಿಯಲ್ಲಿ ಆತನನ್ನು ವಶಕ್ಕೆ ಪಡೆಯವಲ್ಲಿ ಯಶಸ್ವಿಯಾಗಿದೆ ಎಂದು ಎಇಸಿಯ ಹಿರಿಯ ಇನ್ಸ್ಪೆಕ್ಟರ್ ಅಜಯ್ ಸಾವಂತ್ ತಿಳಿಸಿದ್ದಾರೆ.
ಉದ್ಯಮಿಗೆ ತಾನು ಐಪಿಎಸ್ ಅಧಿಕಾರಿ ಎಂದು ನಂಬಿಸಿ ಹಣ ಕೀಳಲು ಯತ್ನಿಸಿದ್ದ ಈತ ಆ ಹಣದಲ್ಲಿ ಐಶಾರಾಮಿ ಜೀವನ ನಡೆಸುವ ಕನಸು ಕಂಡಿದ್ದ. ಜವಳಿ ಉದ್ಯಮಿಯಾಗಿದ್ದ ಸೂರತ್ನ ವ್ಯಕ್ತಿಗೆ ಮುಂಬೈನಲ್ಲಿ ವ್ಯಕ್ತಿಯೋರ್ವರು ಕಂದಾಯ ಇಲಾಖೆಯಡಿಯಲ್ಲಿ ದೂರು ನೀಡಿದ್ದರು. ಈ ಹಿನ್ನೆಲೆ ಮುಂಬೈಗೆ ಆಗಮಿಸುತ್ತಿದ್ದ ಉದ್ಯಮಿಯ ಕುರಿತು ನಕಲಿ ಆಫಿಸರ್ ಶರ್ಮಾಗೆ ಮಾಹಿತಿ ತಿಳಿದಿದ್ದು, ಇದರಿಂದಾಗಿ ಶರ್ಮಾ ಉದ್ಯಮಿಗೆ ಪ್ರಕರಣದಿಂದ ಹೊರಬರಲು ಸಹಾಯ ಮಾಡುವುದಾಗಿ ತಿಳಿಸಿ ವಂಚನೆಗೆ ಇಳಿದಿದ್ದ.
ಇನ್ನು ಕಂದಾಯ ಇಲಾಖೆಯ ಪ್ರಕರಣ ಇತ್ಯರ್ಥ ಪಡಿಸುವ ಕುರಿತಂತೆ ಚರ್ಚ್ ಗೇಟ್ನ ಹೆಸರಾಂತ ಹೋಟೆಲ್ನಲ್ಲಿ ಇಬ್ಬರೂ ಭೇಟಿಯಾದಾಗ, ಶರ್ಮಾ 25 ಲಕ್ಷಕ್ಕೆ ಬೇಡಿಕೆ ಇಟ್ಟಿದ್ದು, ಈ ವೇಳೆ ಇಬ್ಬರ ನಡುವೆ ವಾಗ್ವಾದಕ್ಕೂ ಕಾರಣವಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.
ಈ ಘಟನೆಯ ಬಳಿಕ ಹೋಟೆಲ್ ಕೋಣೆಯಲ್ಲಿ ಬಂಧಿಸಿಟ್ಟು, ತಲೆಗೆ ಬಂದೂಕು ಹಿಡಿದು ಅಪಹರಿಸಿ ಗುಜರಾತ್ಗೆ ಕರೆತರಲಾಗಿದೆ. ಅಲ್ಲಿ ಉದ್ಯಮಿಯಿಂದ 16 ಲಕ್ಷ ನಗದು, ಎರಡು ಐಫೋನ್, ಎರಡು ವಾಚ್ಗಳನ್ನು ಶರ್ಮಾ ಕಿತ್ತುಕೊಂಡಿದ್ದ. ಬಳಿಕ ಉದ್ಯಮಿ ಗುಜರಾತ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ಅಲ್ಲಿಂದ ಮುಂಬೈ ಪೊಲೀಸರಿಗೆ ಮಾಹಿತಿ ನೀಡಲಾಗಿತ್ತು.
