ನಕ್ಸಲರ ವಿರುದ್ಧ ಭದ್ರತಾಪಡೆ ಕಾರ್ಯಾಚರಣೆ: ಇಬ್ಬರ ಹತ್ಯೆ

ದಂತೇವಾಡ ಹಾಗೂ ಸುಕ್ಮಾ ಗಡಿಯ ಗೊಂಡೆರಾಸ್​ ಅರಣ್ಯ ಪ್ರದೇಶದಲ್ಲಿ ಭದ್ರತಾ ಪಡೆಗಳು ನಡೆಸಿದ ಕಾರ್ಯಾಚರಣೆಯಲ್ಲಿ ಇಬ್ಬರು ನಕ್ಸಲರನ್ನು ಹತ್ಯೆ ಮಾಡಲಾಗಿದೆ.

ದಂತೇವಾಡ: ಜಿಲ್ಲಾ ಮೀಸಲು ಪಡೆ ಹಾಗೂ ವಿಶೇಷ ಕಾರ್ಯಪಡೆ ಜಂಟಿಯಾಗಿ ನಡೆಸಿದ ಕಾರ್ಯಾಚರಣೆಯಲ್ಲಿ ಇಬ್ಬರು ನಕ್ಸಲರು ಹತರಾಗಿದ್ದಾರೆ.

ದಂತೇವಾಡ ಹಾಗೂ ಸುಕ್ಮಾ ಗಡಿಯ ಗೊಂಡೆರಾಸ್​ ಅರಣ್ಯ ಪ್ರದೇಶದಲ್ಲಿ ಬೆಳಗ್ಗೆ 5 ಗಂಟೆಯಿಂದ ನಕ್ಸಲರು ಹಾಗೂ ಭದ್ರತಾ ಪಡೆ ನಡುವೆ ಗುಂಡಿನ ಕಾಳಗ ನಡೆದಿತ್ತು. ನಕ್ಸಲ್ ಕಮಾಂಡರ್​ಗಳಾದ ಶ್ಯಾಂ, ದೇವ ಹಾಗೂ ವಿನೋದ್​ ಅಡಗಿದ್ದ ಟೆಂಟ್​ಗಳ ಮೇಲೆ ಭದ್ರತಾ ಪಡೆಗಳು ಗುಂಡಿನ ಮಳೆಗರೆದಿವೆ. ಈ ವೇಳೆ ಇಬ್ಬರು ನಕ್ಸಲರು ಮೃತಪಟ್ಟಿದ್ದು, ಹಲವರು ಗಾಯಗೊಂಡಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಬಗ್ಗೆ ಮಾಹಿತಿ ನೀಡಿರುವ ದಂತೇವಾಡದ ಎಸ್​ಪಿ ಅಭಿಷೇಕ್​ ಪಲ್ಲಾವ, ನಕ್ಸಲರ ವಿರುದ್ಧದ ಕಾರ್ಯಾಚರಣೆಯಲ್ಲಿ ಜಿಲ್ಲಾ ಮಹಿಳಾ ಮೀಸಲು ಪಡೆ 'ದಂತೇಶ್ವರಿ ಲಡ್ಕೆ'ಯ ಕಮಾಂಡೋಗಳು ಕೂಡ ಪಾಲ್ಗೊಂಡಿದ್ದರು. ನಕ್ಸಲರ ಪತ್ನಿಯರು ಹಾಗೂ ಮಹಿಳಾ ನಕ್ಸಲರು ಸೇರಿ 13 ಮಂದಿ ಮಹಿಳೆಯರು ಸೆರೆಯಾಗಿದ್ದಾರೆ ಎಂದು ಹೇಳಿದರು.

ನಕ್ಸಲರಿಂದ ಅತ್ಯಾಧುನಿಕ ರೈಫಲ್​ಗಳು ಸೇರಿದಂತೆ ಹಲವು ಶಸ್ತ್ರಾಸ್ತ್ರಗಳನ್ನು ವಶಕ್ಕೆ ಪಡೆಯಲಾಗಿದೆ. ಸ್ಥಳದಲ್ಲಿ ಮೊಬೈಲ್​ ನೆಟ್​ವರ್ಕ್​ ಸ್ಥಗಿತಗೊಳಿಸಲಾಗಿದ್ದು, ಕಾರ್ಯಾಚರಣೆ ತೀವ್ರಗೊಂಡಿದೆ.