ನವದೆಹಲಿ: ಪಾಕ್ ದಾಳಿಯನ್ನು ಹಿಮ್ಮೆಟ್ಟಿಸಲು ಮುಂದಾಗಿ, ಆಕಸ್ಮಿಕವಾಗಿ ಅಲ್ಲಿನ ಸೇನೆಯ ವಶದಲ್ಲಿರುವ ವಿಂಗ್ ಕಮ್ಯಾಂಡರ್ ಅಭಿನಂದನ್ ಇಂದು ವಾಘಾ ಗಡಿ ಮೂಲಕ ಭಾರತಕ್ಕೆ ಮರಳಲಿದ್ದಾರೆ.
ಜಗತ್ತಿನ ಪ್ರಮುಖ ರಾಷ್ಟ್ರಗಳು ಪಾಕ್ ಕಪಿಮುಷ್ಠಿಯಲ್ಲಿದ್ದ ಅಭಿನಂದನ್ರನ್ನು ಬಿಡುಗಡೆ ಮಾಡುವಂತೆ ಒತ್ತಡ ಹೇರಿದ್ದರ ಪರಿಣಾಮ ಅವರನ್ನು ಭಾರತಕ್ಕೆ ಒಪ್ಪಿಸುವುದಾಗಿ ಅಲ್ಲಿನ ಸರ್ಕಾರ ಘೋಷಿಸಿದೆ. ಇಡೀ ದೇಶವೇ ಅವರ ಬರುವಿಕೆಗಾಗಿ ಎದುರು ನೋಡುತ್ತಿದೆ. ವಾಘಾ ಗಡಿಯಲ್ಲಿ ಸಾಕಷ್ಟು ಜನರು ನೆರೆದಿದ್ದು, ಅಭಿನಂದನ್ರಿಗೆ ಜೈ ಹೋ ಎನ್ನುತ್ತಿದ್ದಾರೆ.
ಶತ್ರುರಾಷ್ಟ್ರದ ವಶದಲ್ಲಿದ್ದ ಮಗ ಸುರಕ್ಷಿತವಾಗಿ ಹಿಂದಿರುಗಬೇಕೆಂದು ಕಾತುರದಿಂದಕ ಕಾಯುತ್ತಿದ್ದ ಅಭಿನಂದನ್ರ ಪೋಷಕರು ದೆಹಲಿಗೆ ಆಗಮಿಸಿದ್ದಾರೆ. ಅವರು ಚೆನ್ನೈ-ದೆಹಲಿ ವಿಮಾನದೊಳಗೆ ಬರುವ ವೇಳೆ ಒಂದು ಮಹತ್ವದ ಪ್ರಸಂಗವೂ ನಡೆಯಿತು.
ಅಭಿನಂದನ್ರ ತಂದೆ ನಿವೃತ್ತ ಏರ್ ಮಾರ್ಷಲ್ ಎಸ್ ವರ್ತಮಾನ್ ಹಾಗೂ ತಾಯಿ ಶೋಭಾ ವರ್ತಮಾನ್ ಅವರು ವಿಮಾನದೊಳಗೆ ಬರುತ್ತಿದ್ದಂತೆ ಸಹ ಪ್ರಯಾಣಿಕರು ಎದ್ದುನಿಂತು, ಅವರಿಗೆ ಚಪ್ಪಾಳೆ ತಟ್ಟುವ ಮೂಲಕ ಸ್ವಾಗತಿಸಿದರು.
ನಿವೃತ್ತ ಏರ್ ಮಾರ್ಷಲ್ ಎಸ್ ವರ್ತಮಾನ್ ಅವರು ನಿಷ್ಠಾವಂತ ಅಧಿಕಾರಿಯಾಗಿದ್ದವರು, ಪರಮ ವಿಶಿಷ್ಠ ಸೇವಾ ಮೆಡಲ್ ಪುಸ್ಕೃತರು. ಶೋಭಾ ವರ್ತಮಾನ್ ಅವರು ವೃತ್ತಿಯಲ್ಲಿ ವೃದ್ಯೆ. ಅಭಿನಂದನ್ರ ತಾತ ಸಿಂಹಕುಟ್ಟಿ 2ನೇ ಮಹಾಯುದ್ಧದಲ್ಲಿ ವಾಯುಪಡೆಯ ಯೋಧರಾಗಿ ಹೋರಾಡಿದವರು.
ಈ ಮೊದಲು ಅಭಿನಂದನ್ರ ಬಗ್ಗೆ ಮಾತನಾಡಿದ್ದ ಎಸ್ ವರ್ತಮಾನ್, ಅಭಿ ಜೀವಂತವಾಗಿದ್ದಾನೆ. ಆತ ಗಾಯಗೊಂಡಿಲ್ಲ ಎಂದು ಧೈರ್ಯದಿಂದ ಮಾತನಾಡುವುದನ್ನು ಕೇಳಿದಾಗ ತಿಳಿಯುತ್ತೆ. ಆತ ನಿಜವಾದ ಯೋಧ, ನಮಗೆ ಹೆಮ್ಮೆಯಿದೆ ಎಂದು ಹೇಳಿದ್ದರು.
