ಚಂದ್ರಯಾನ-2 ಲ್ಯಾಂಡಿಂಗ್ ವೇಳೆ, ನಂತರ ನಡೆಯೊದೇನು? ಪ್ರತಿ ಸೆಕೆಂಡಿನ ಮಾಹಿತಿ ಇಲ್ಲಿದೆ..

ಚಂದ್ರಯಾನ-2 ಲ್ಯಾಂಡಿಂಗ್​ ನೋಡಲು ಪ್ರಪಂಚ ಕೌತುಕದಿಂದ ಕಾಯುತ್ತಿದೆ. ಲ್ಯಾಂಡಿಂಗ್​ನ ಪ್ರತಿ ಸೆಕೆಂಡಿನ ಮಾಹಿತಿ ಈ ಕೆಳಗಿನಂತಿದೆ.

ನವದೆಹಲಿ: ಭಾರತ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ ಮಹತ್ವಾಕಾಂಕ್ಷಿ ಯೋಜನೆಯಾದ ಚಂದ್ರಯಾನ-2 ಇಂದು ಚಂದ್ರನ ದಕ್ಷಿಣ ಧ್ರುವದಲ್ಲಿ ಇಳಿಯಲು ಸಿದ್ದವಾಗಿದೆ.

ಪ್ರಪಂಚದ ಯಾವುದೇ ದೇಶಗಳು ಚಂದ್ರನ ದಕ್ಷಿಣ ಧ್ರುವದಲ್ಲಿ ಯಶಸ್ವಿಯಾಗಿ ಲ್ಯಾಂಡ್​ ಆಗಿಲ್ಲ. ಹೀಗಾಗಿ ಚಂದ್ರಯಾನ-2 ಲ್ಯಾಂಡಿಂಗ್ ಕಣ್ತುಂಬಿಕೊಳ್ಳಲು ಇಡೀ ವಿಶ್ವವೇ ಕೌತುಕದಿಂದ ಕಾಯುತ್ತಿದೆ.

ಚಂದ್ರಯಾನ-2

ಸೋಮವಾರ ಮಧ್ಯಾಹ್ನ ವಿಕ್ರಮ್​ ಲ್ಯಾಂಡರ್, ಆರ್ಬಿಟ್​ನಿಂದ ಯಶಸ್ವಿಯಾಗಿ ಬೇರ್ಪಟ್ಟು ಚಂದ್ರನತ್ತ ತನ್ನ ಪ್ರಯಾಣ ಬೆಳೆಸಿತ್ತು. ಈ ವಿಕ್ರಮ್​ ರೋವರ್ 6 ಚಕ್ರಗಳನ್ನ ಹೊಂದಿರುವ ಪ್ರಗ್ಯಾನ್ ಎಂಬ ರೋವರ್‌ನ​ಹೊತ್ತೊಯ್ದಿದ್ದು, ಇದು ಚಂದ್ರನ ದಕ್ಷಿಣ ಧ್ರುವದಲ್ಲಿ ಲ್ಯಾಂಡ್ ಆಗಲಿದೆ.

ಲ್ಯಾಂಡಿಂಗ್​ ವೇಳೆ, ಲ್ಯಾಂಡಿಗ್​ ನಂತರ ನಡೆಯೋದೇನು?

• ಚಂದ್ರನ ದಕ್ಷಿಣ ಧ್ರುವದಲ್ಲಿ ಲ್ಯಾಂಡ್​ ಆಗುವ ಚಿತ್ರಗಳನ್ನ ಸೆರೆಹಿಡಿಯುವುದು ಸೇರಿದಂತೆ ಹಲವು ಸಂಕೀರ್ಣವಾದ ಕೆಲಸಗಳನ್ನ ವಿಕ್ರಮ್ ಲ್ಯಾಂಡರ್ ನಿರ್ವಹಿಸಲಿದೆ.
• ನುಸುಕಿನಜಾವ 1.40ಕ್ಕೆ ಚಂದ್ರನ ಮೇಲ್ಮೈಗಿಂತ 35 ಕಿಲೋ ಮೀಟರ್ ಎತ್ತರದಲ್ಲಿರುವ ವಿಕ್ರಮ್, 6 ಸಾವಿರ ಕಿಲೋ ಮೀಟರ್​ ವೇಗದಲ್ಲಿ ಚಂದ್ರನ ಹತ್ತಿರಕ್ಕೆ ಸಮೀಪಿಸಲಿದೆ. ಕೇವಲ 10 ನಿಮಿಷದಲ್ಲಿ ಚಂದ್ರನ ಮೇಲ್ಮೈಗಿಂತ 7.4 ಕಿ.ಮೀ. ಎತ್ತರಕ್ಕೆ ಬಂದು ತಲುಪಲಿದ್ದು, ಅದರ ವೇಗವನ್ನ 526 ಕಿಲೋ ಮೀಟರ್​ಗೆ ತಗ್ಗಿಸಿಕೊಳ್ಳಲಿದೆ.
• ವಿಕ್ರಮ್ ಲ್ಯಾಂಡರ್ ಚಂದ್ರನ ಮೇಲ್ಮೈನಿಂದ 400 ಮೀಟರ್​ ಎತ್ತರಕ್ಕೆ ತಲುಪುತಿದ್ದಂತೆ ಸುಮಾರು 12 ಸೆಕೆಂಡ್​ಗಳ ಕಾಲ ಚಂದ್ರನ ಮೇಲ್ಮೈ ಕುರಿತು ಕೆಲವು ಡಾಟಾ ಸಂಗ್ರಹಿಸಲಿದೆ.
• ಮುಂದಿನ 66 ಸೆಕೆಂಡ್​ಗಳ ಕಾಲ 400 ಮೀಟರ್​ ಎತ್ತರದಿಂದ 100 ಮೀಟರ್​ಗೆ​ ತಲುಪಲಿದೆ.
• 100 ಮೀಟರ್​ ಎತ್ತರಕ್ಕೆ ತಲುಪುತ್ತಿದ್ದಂತೆ 25 ಸೆಕೆಂಡ್​ಗಳ ಕಾಲ ಈಗಾಗಲೇ ಲ್ಯಾಂಡಿಂಗ್​ಗಾಗಿ ಗುರುತಿಸಿರುವ 2 ಸ್ಥಳಗಳ ಪೈಕಿ ಎಲ್ಲಿ ಲ್ಯಾಂಡ್​ ಮಾಡಬೇಕು ಎಂಬ ನಿರ್ಧಾರವನ್ನ ವಿಕ್ರಮ್​ ಕೈಗೊಳ್ಳಲಿದೆ. ಚಂದ್ರಯಾನ-2 ಲ್ಯಾಂಡರ್​ನಲ್ಲಿನ ಆನ್​ಬೋರ್ಡ್​ ಉಪಕರಣಗಳು ಈ ನಿರ್ಧಾರ ಕೈಗೊಳ್ಳಲು ವಿಕ್ರಮ್​ಗೆ ಅಗತ್ಯವಾದ ಡಾಟಾ ನೀಡಲಿವೆ.
• ಮೊದಲೇ ಗುರ್ತಿಸಿದ 2 ಸ್ಥಳಗಳ ಪೈಕಿ ಮೊದಲ ಸ್ಥಳವನ್ನ ವಿಕ್ರಮ್​ ಆಯ್ಕೆ ಮಾಡಿಕೊಂಡರೆ. 65 ಸೆಕೆಂಡ್​ಗಳಲ್ಲಿ ತನ್ನ ವೇಗವನ್ನ ತಗ್ಗಿಸಿಕೊಳ್ಳುತ್ತ ಚಂದ್ರನ ಮೇಲ್ಮೈನಿಂದ 10 ಮೀಟರ್​ ಎತ್ತರ ತಲುಪಲಿದೆ.
• ಒಂದು ವೇಳೆ 2ನೇ ಸ್ಥಳವನ್ನ ವಿಕ್ರಮ್ ಆಯ್ಕೆ ಮಾಡಿಕೊಂಡರೆ 40 ಸೆಕೆಂಡ್​ಗಳಲ್ಲಿ ಚಂದ್ರನ ಮೇಲ್ಮೈನಿಂದ 60 ಮೀಟರ್ ಎತ್ತರ ತಲುಪಲಿದೆ. ಮುಂದಿನ 25 ಸೆಕೆಂಡ್​ಗಳಲ್ಲಿ 60 ರಿಂದ 10 ಮೀಟರ್​ ತಲುಪಲಿದೆ.
• 10 ಮೀಟರ್​ ಎತ್ತರಕ್ಕೆ ಬಂದು ತಲುಪುತಿದ್ದಂತೆ ಮುಂದಿನ 13 ಸೆಕೆಂಡ್​ಗಳಲ್ಲಿ ವಿಕ್ರಮ್ ಲ್ಯಾಂಡರ್, ಚಂದಿರನ ಅಂಗಳಕ್ಕೆ ಇಳಿಯಲಿದೆ.
• ಯಶಸ್ವಿಯಾಗಿ ಚಂದಿರನ ಅಂಗಳ ತಲುಪಿದ 15 ನಿಮಿಷಗಳ ನಂತರ ಮೊದಲ ಛಾಯಾಚಿತ್ರವನ್ನ ಕಳುಹಿಸಿಕೊಡಲಿದೆ.
• ಇನ್ನು ಲ್ಯಾಂಡ್​ ಆದ 4 ಗಂಟೆಗಳ ನಂತರ 6 ಚಕ್ರಗಳ ಪ್ರಗ್ಯಾನ್ ರೋವರ್​ ವಿಕ್ರಮ್ ಲ್ಯಾಂಡರ್​ನಿಂದ ಬೇರ್ಪಡಲಿದೆ.

ದಕ್ಷಿಣ ಧ್ರುವದಲ್ಲೇ ಲ್ಯಾಂಡಿಗ್ ಏಕೆ?

ಚಂದ್ರನ ದಕ್ಷಿಣ ಧ್ರುವ ಉತ್ತರ ಧ್ರುವಕ್ಕೆ ಹೋಲಿಸಿದರೆ ಅತ್ಯಂತ ಹೆಚ್ಚು ನೆರಳಿನಿಂದ ಆವೃತವಾಗಿದೆ. ನೆರಳಿನ ಪ್ರದೇಶದಲ್ಲಿ ನೀರಿನ ಅಂಶ ಕೊಂಚ ಹೆಚ್ಚಾಗಿರುವ ಸಾಧ್ಯತೆಯಿಂದ ಇಸ್ರೋ ದಕ್ಷಿಣ ಧ್ರುವವನ್ನು ಆರಿಸಿಕೊಂಡು ಆ ಭಾಗದಲ್ಲಿ ಲ್ಯಾಂಡರ್ ಇಳಿಸುವ ಪ್ರಯತ್ನಕ್ಕೆ ಕೈಹಾಕಿದೆ. ಒಂದು ವೇಳೆ ಈ ಸವಾಲಿನಲ್ಲಿ ಇಸ್ರೋ ಗೆದ್ದಲ್ಲಿ ಈ ಸಾಧನೆ ಗೈದ ಮೊದಲ ರಾಷ್ಟ್ರ ಎನ್ನುವ ಹೆಗ್ಗಳಿಕೆ ಭಾರತದ್ದಾಗಲಿದೆ.