ನವ ದೆಹಲಿ: ಭಾರತದ ಮಹತ್ವಾಕಾಂಕ್ಷಿ ಬಾಹ್ಯಾಕಾಶ ಯೋಜನೆಯಾದ ಚಂದ್ರಯಾನ-2 ನೌಕೆಯ ಕಕ್ಷೆ ಮೇಲಕ್ಕೆತ್ತರಿಸುವ ಕಾರ್ಯ ನಡೆಯುತ್ತಿದೆ. ಇತ್ತೀಚೆಗಿನ ಮಾಹಿತಿ ಪ್ರಕಾರ, ನಾಲ್ಕನೇ ಸುತ್ತಿನ ಕಕ್ಷೆ ಮೇಲಕ್ಕೆತ್ತರಿಸುವ ಕಾರ್ಯವನ್ನು(Orbit-raising maneuver) ಇಸ್ರೋ ವಿಜ್ಞಾನಿಗಳು ಯಶಸ್ವಿಯಾಗಿ ನೆರವೇರಿಸಿದ್ದಾರೆ.
ಚಂದ್ರಯಾನ-2 ತನ್ನ ನಿಗದಿತ ಗುರಿ ತಲುಪಲು ಒಂದು ಹೆಜ್ಜೆ ಹತ್ತಿರದಲ್ಲಿಯೇ ಇದೆ. ಆಂಧ್ರದ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಜುಲೈ 22 ರಂದು ಉಡಾವಣೆಯಾದ ಈ ನೌಕೆ ಸೆಪ್ಟೆಂಬರ್ 7 ರಂದು ಚಂದ್ರನ ಮೇಲ್ಮೈಯನ್ನು ಸ್ಪರ್ಶಿಸಲಿದೆ.
ಕಕ್ಷೆ ಮೇಲಕ್ಕೆತ್ತರಿಸುವ ಕೊನೆಯ ಸುತ್ತಿನ ಕಾರ್ಯಾಚರಣೆಯನ್ನು ವಿಜ್ಞಾನಿಗಳು ಆ. 6ಕ್ಕೆ ಮಾಡಲಿದ್ದಾರೆ.
ಚಂದ್ರಯಾನ-2 ಮಿಷನ್ ಕೊನೆಯ ಸುತ್ತನ್ನು ತಲುಪುವವರೆಗೂ ಹಲವಾರು ಅಡೆತಡೆಗಳನ್ನು ಎದುರಿಸಿಕೊಂಡೇ ಹೋಗಬೇಕಾಗುತ್ತದೆ. ಇಲ್ಲಿಯವರೆಗೆ ಯಾವುದೇ ರೀತಿಯ ಅಡೆತಡೆಗಳಿಲ್ಲದೆ ನೌಕೆ ಯಶಸ್ವಿಯಾಗಿ ಚಂದ್ರನೂರಿಗೆ ಮುನ್ನುಗ್ಗುತ್ತಿದೆ.
