ನವದೆಹಲಿ: ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷೆಯ 'ಒನ್ ನೇಷನ್ -ಒನ್ ರೇಷನ್ ಕಾರ್ಡ್' ವ್ಯವಸ್ಥೆಯನ್ನು 2020 ಜೂನ್ 30ರೊಳಗೆ ಎಲ್ಲಾ ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳು ಅನುಷ್ಠಾನ ಮಾಡಬೇಕೆಂದು ಡೆಡ್ಲೈನ್ ನೀಡಲಾಗಿದೆ.
ಈ ಬಗ್ಗೆ ಆಹಾರ ಸಚಿವ ರಾಮ್ ವಿಲಾಸ್ ಪಸ್ವಾನ್ ಮಾತನಾಡಿ, ಈಗಾಗಲೆ ಆಂಧ್ರಪ್ರದೇಶ, ಗುಜರಾತ್, ಹರ್ಯಾಣ, ಜಾಂರ್ಖಂಡ್, ಕರ್ನಾಟಕ, ಮಹಾರಾಷ್ಟ್ರ, ರಾಜಸ್ಥಾನ, ತೆಲಂಗಾಣ ಹಾಗೂ ತ್ರಿಪುರಗಳು ಸಾರ್ವಜನಿಕ ಪಡಿತರ ವಿತರಣಾ ವ್ಯವಸ್ಥೆ ಜಾರಿಗೆ ತಂದಿವೆ. 2020 ಜೂನ್ 30ರೊಳಗೆ ಒನ್ ನೇಷನ್ ಒನ್ ರೇಷನ್ ಕಾರ್ಡ್ ಯೋಜನೆ ಎಲ್ಲೆಡೆ ಜಾರಿಯಾಗಬೇಕು. ಶೀಘ್ರ ಅನುಷ್ಠಾನಕ್ಕೆ ತರುವ ಸಂಬಂಧ ರಾಜ್ಯ ಸರ್ಕಾರಗಳಿಗೆ ಪತ್ರ ಬರೆದು ತಿಳಿಸಲಾಗಿದೆ ಎಂದರು.
ಹೊಸ ರೇಷನ್ ಕಾರ್ಡ್ ವ್ಯವಸ್ಥೆಯಿಂದ ಒಂದು ಪ್ರದೇಶದಿಂದ ಮತ್ತೊಂದು ಪ್ರದೇಶಕ್ಕೆ ತೆರಳಿದ ವ್ಯಕ್ತಿ/ಕುಟುಂಬ ಪಡಿತರದಿಂದ ವಂಚಿತರಾಗುವುದನ್ನು ತಡೆಯುತ್ತದೆ. ಅಲ್ಲದೆ, ನಕಲಿ ರೇಷನ್ ಕಾರ್ಡ್ಗೂ ಬ್ರೇಕ್ ಹಾಕುತ್ತದೆ ಎನ್ನಲಾಗ್ತಿದೆ.
ಈ ಯೋಜನೆಯ ಮೋದಿ 2.0 ಸರ್ಕಾರರ 100 ದಿನಗಳ ಅಜೆಂಡಾದಲ್ಲಿ ಒಂದಾಗಿದೆ. ಮತ್ತೊಂದು ರಾಜ್ಯಕ್ಕೆ ತೆರಳಿದ ವ್ಯಕ್ತಿಯು ಉಚಿತವಾಗಿ ಅಲ್ಲದೆ, ಸರ್ಕಾರ ವಿಧಿಸಿದ ಮೌಲ್ಯ ನೀಡಿ ಪಡಿತರ ಪಡೆಯುಬೇಕಾಗುತ್ತೆ. ಕೆಜಿಗೆ 1-3 ರೂ ಮಾತ್ರ ಬೆಲೆ ವಿಧಿಸಲಾಗುತ್ತೆ ಎಂದೂ ಹೇಳಿದರು.
ಇನ್ನು ಬೇರೊಂದು ಪ್ರದೇಶಕ್ಕೆ ತೆರಳಿದ ವ್ಯಕ್ತಿ ತನ್ನ ಇಡೀ ಕುಟುಂಬದ ಪಡಿತರ ಪಡೆಯಲಾಗದು. ಶೇ50ರಷ್ಟು ಮಾತ್ರ ಪಡಿತರ ನೀಡಲಾಗುತ್ತೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಶೀಘ್ರದಲ್ಲಿಯೆ ಈ ಎಲ್ಲಾ ಮಾರ್ಗಸೂಚಿಗಳನ್ನು ಇಲಾಖೆ ಬಿಡುಗಡೆ ಮಾಡಲಿದೆ ಎಂದು ಸಚಿವರು ಇದೇ ವೇಳೆ ಹೇಳಿದ್ದಾರೆ.
