ನ್ಯೂಯಾರ್ಕ್ (ಅಮೆರಿಕ): ಸಾಮಾನ್ಯ ಕೊರೊನಾ ಸೋಂಕಿತರಿಗಿಂತ ಕ್ಯಾನ್ಸರ್ ಇರುವ ಕೊರೊನಾ ಸೋಂಕಿತರ ಮರಣ ಪ್ರಮಾಣ ಹೆಚ್ಚಿರುವ ಸಾಧ್ಯತೆ ಇದೆ ಎಂದು ಅಮೆರಿಕದಲ್ಲಿರುವ ಭಾರತೀಯ ಮೂಲದ ಸಂಶೋಧಕರ ತಂಡ ಹೇಳಿದೆ.
ಅಮೆರಿಕದ ಆಲ್ಬರ್ಟ್ ಐನ್ಸ್ಟಿನ್ ಕಾಲೇಜ್ ಆಫ್ ಮೆಡಿಸಿನ್ನ ಸಂಶೋಧಕ ವಿಕಾಸ್ ಮೆಹ್ತಾ ''ನಾವು ಕ್ಯಾನ್ಸರ್ ರೋಗಿಗಳಿಗೆ ಸೋಂಕು ಬರದಂತೆ ತಡೆಗಟ್ಟುವುದು ಹೇಗೆ ಎಂಬ ಬಗ್ಗೆ ಸಂಶೋಧನೆ ನಡೆಸುತ್ತಿದ್ದೇವೆ. ಜೊತೆಗೆ ಕೊರೊನಾ ಸೋಂಕು ಕ್ಯಾನ್ಸರ್ ಇರುವವರ ಮೇಲೆ ಬೀರುವ ದುಷ್ಪರಿಣಾಮಗಳ ಬಗ್ಗೆಯೂ ಕೂಡಾ ನಮ್ಮ ಸಂಶೋಧನೆಗಳು ಬೆಳಕು ಚೆಲ್ಲುತ್ತವೆ'' ಎಂದಿದ್ದಾರೆ.
ಈ ಸಂಶೋಧನೆಯು ಕ್ಯಾನ್ಸರ್ ಡಿಸ್ಕವರಿ ಜರ್ನಲ್ನಲ್ಲಿ ಪ್ರಕಟವಾಗಿದ್ದು ಸಂಶೋಧನಾ ತಂಡವು 218 ಕ್ಯಾನ್ಸರ್ ರೋಗಿಗಳನ್ನು ತನ್ನ ಸಂಶೋಧನೆಗೆ ಒಳಪಡಿಸಿಕೊಂಡಿತ್ತು. ಇವರಿಗೆ ಮಾರ್ಚ್ 18ರಿಂದ ಏಪ್ರಿಲ್ 26ರವರೆಗೆ ಮಾಂಟೆಫೀಯೋರ್ ಎಂಬ ವೈದ್ಯಕೀಯ ಕೇಂದ್ರದಲ್ಲಿ ಕೊರೊನಾ ಪರೀಕ್ಷೆ ನಡೆಸಿತ್ತು. ಈ ಕೊರೊನಾ ಸೋಂಕಿತ ಕ್ಯಾನ್ಸರ್ ರೋಗಿಗಳಲ್ಲಿ 61 ಮಂದಿ ಅಂದರೆ ಶೇಕಡಾ 28ರಷ್ಟು ಮಂದಿ ಸಾವನ್ನಪ್ಪಿದ್ದರು.
''ಕ್ಯಾನ್ಸರ್ ಚಿಕಿತ್ಸೆ ಮಾತ್ರವಲ್ಲದೇ ಕೊರೊನಾ ಸೋಂಕಿತ ವ್ಯಕ್ತಿಯ ಸಾವು ವ್ಯಕ್ತಿಯ ವಯಸ್ಸು, ಸೋಂಕಿತನಿಗೆ ಇರುವ ಕಾಯಿಲೆಗಳು ಹಾಗೂ ರೋಗನಿರೋಧಕ ಶಕ್ತಿಯನ್ನೂ ಕೂಡಾ ಆಧರಿಸಿರುತ್ತದೆ. ಕೋವಿಡ್-19 ಹೊಂದಿರುವ ಕ್ಯಾನ್ಸರ್ ರೋಗಿಯ ಚಿಕಿತ್ಸೆಯನ್ನು ನಿಲ್ಲಿಸಲು ಸಾಧ್ಯವಿಲ್ಲ. ಆದರೆ ಕ್ಯಾನ್ಸರ್ ಕೊರೊನಾ ಸೋಂಕಿತನ ಸಾವಿಗೆ ಕಾರಣವಾಗದ ಹಾಗೆ ನೋಡಿಕೊಳ್ಳುವ ಬಗ್ಗೆ ಗಮನಹರಿಸಬೇಕಿದೆ'' ಎಂದು ಮತ್ತೊಬ್ಬ ಸಂಶೋಧಕ ಅಮಿತ್ ವರ್ಮಾ ಅಭಿಪ್ರಾಯಪಟ್ಟಿದ್ದಾರೆ.
ಕೊರೊನಾ ಸೋಂಕಿತ ಲ್ಯುಕೇಮಿಯಾ ಹಾಗೂ ಲಿಂಪೋಮಾದಂತಹ ಕ್ಯಾನ್ಸರ್ ಹೊಂದಿರುವ ಶೇ 37ರಷ್ಟು, ಶ್ವಾಸಕೋಶ ಕ್ಯಾನ್ಸರ್ ಹೊಂದಿರುವವರಲ್ಲಿ ಶೇಕಡಾ 55ರಷ್ಟು, ಸ್ತನ ಕ್ಯಾನ್ಸರ್ ಹೊಂದಿರುವವರಲ್ಲಿ ಶೇ 14ರಷ್ಟು ಮರಣ ಪ್ರಮಾಣವಿದೆ ಎಂದು ಸಂಶೋಧನೆ ಹೇಳಿದೆ.
