ರುದ್ರಪ್ರಯಾಗ್: ಭೂಪ್ರದೇಶಗಳು, ನದಿಗಳು, ಸರೋವರಗಳು ಮತ್ತು ಗಿರಿ ಶಿಖರಗಳಿಂದ ಕೂಡಿರುವ ಸುಂದರ ರಾಜ್ಯ ಉತ್ತರಾಖಂಡ, ಡೆಸ್ಟಿನೇಷನ್ ಮ್ಯಾರೇಜ್ಗಳಿಗೆ ಹೇಳಿ ಮಾಡಿಸಿದ ತಾಣವಾಗಿದೆ.
ಉತ್ತರಾಖಂಡದ ವಿಭಿನ್ನ ಸಂಸ್ಕೃತಿ ಮತ್ತು ಸಂಪ್ರದಾಯಗಳಂತೆ ಮದುವೆಯಾಗಲು ಇಲ್ಲಿಗೆ ಅನೇಕ ವಿದೇಶಿಗರು ಕೂಡ ಬರುತ್ತಾರೆ. ಇದರಂತೆ ಇತ್ತೀಚೆಗಷ್ಟೇ ಉತ್ತರಾಖಂಡದ ಸಾಂಪ್ರದಾಯಿಕ ಉಡುಪಿನಲ್ಲಿ ಇಂಗ್ಲೆಂಡ್ ಹಾಗೂ ದಕ್ಷಿಣ ಆಫ್ರಿಕಾ ಮೂಲದ ಜೋಡಿಯೊಂದು ರುದ್ರಪ್ರಯಾಗ್ ಜಿಲ್ಲೆಯ ತ್ರಿಯುಗಿ ನಾರಾಯಣ ದೇವಸ್ಥಾನದಲ್ಲಿ ವಿವಾಹವಾದರು.
ಇದೇ ದೇವಾಲಯದಲ್ಲಿ ಶಿವನು ಪಾರ್ವತಿ ದೇವಿಯನ್ನು ಮದುವೆಯಾದನೆಂದು ನಂಬಲಾಗಿದೆ. ಇನ್ನೊಂದು ವಿಶೇಷವೆಂದರೆ ಈ ದೇವಾಲಯದ ಮುಂದೆ ಉರಿಯುತ್ತಿರುವ ಬೆಂಕಿ, ಎಂದಿಗೂ ಆರದೇ ಸದಾ ಉರಿಯುತ್ತಿರುತ್ತದೆ. ಈ ಹಿಂದೆ ಕೂಡ ಇದೇ ದೇವಾಲಯದಲ್ಲಿ ಅನೇಕ ವಿದೇಶಿ ಜೋಡಿಗಳು ವಿವಾಹವಾಗಿದ್ದರು.
ಮೂಗುತಿ, ಕೆಂಪು ಸೀರೆ ತೊಟ್ಟ ವಧು, ಹಳದಿ ಧೋತಿ ಕುರ್ತಾ, ಕಪ್ಪು ಪಹಡಿ ಟೋಪಿ ಧರಿಸಿದ ವರ. ಹೀಗೆ ಉತ್ತರಾಖಂಡದ ಸಾಂಪ್ರದಾಯಿಕ ದಿರಿಸಿನಲ್ಲಿ ಇಂಗ್ಲೆಂಡ್ ಹಾಗೂ ದಕ್ಷಿಣ ಆಫ್ರಿಕಾ ಮೂಲದ ಈ ಜೋಡಿ ಹಸೆಮಣೆ ಏರಿದೆ. ಈ ದಂಪತಿ ಭಾರತದ ಸಂಸ್ಕೃತಿಗೆ ಮಾರುಹೋಗಿದ್ದು, ಇಲ್ಲಿನ ಸಾಂಪ್ರದಾಯಿಕ ಶೈಲಿಯಲ್ಲಿ ವಿವಾಹವಾಗಲು ಬಯಸಿದ್ದರು ಎಂದು ವೆಡ್ಡಿಂಗ್ ಪ್ಲಾನರ್ ರಂಜನಾ ರಾವತ್ ಹೇಳಿದ್ದಾರೆ. ಇದೀಗ ಈ ದಂಪತಿ ನಡೆಸಿರುವ ಫೋಟೋಶೂಟ್ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗುತ್ತಿದೆ.
