ಹೈದರಾಬಾದ್: ಮಾನವರ ಮೇಲೆ ಕೋವಿಡ್ ಲಸಿಕೆ 'ಕೊವಾಕ್ಸಿನ್' ಪ್ರಯೋಗ ಆರಂಭಿಸಿರುವ ಭಾರತ್ ಬಯೋಟೆಕ್, ಈಗಾಗಲೇ 375 ಸ್ವಯಂ ಸೇವಕರ ಮೇಲೆ ಪ್ರಯೋಗ ಮಾಡಿದೆ ಎಂದು ಕಂಪನಿಯ ಮೂಲಗಳು ತಿಳಿಸಿವೆ.
ಭಾರತದ ಮೊದಲ ದೇಶೀಯ ಲಸಿಕೆಯಾಗಿರುವ ಕೊವಾಕ್ಸಿನ್ನ ಕ್ಲಿನಿಕಲ್ ಪ್ರಯೋಗದ ಮೊದಲನೇ ಹಂತ ದೇಶಾದ್ಯಂತ ಜುಲೈ 15 ರಿಂದ ಪ್ರಾರಂಭವಾಗಿದೆ. ಇದು ದೇಶದ 375 ಸ್ವಯಂಸೇವಕರ ಮೇಲೆ ನಡೆಸಿರುವ ರ್ಯಾಂಡಮೈಸ್ಡ್, ಡಬಲ್-ಬ್ಲೈಂಡ್, ಪ್ಲಸೀಬೊ - ನಿಯಂತ್ರಿತ ಕ್ಲಿನಿಕಲ್ ಪ್ರಯೋಗವಾಗಿದೆ. ಈ ಪ್ರಕ್ರಿಯೆಯಲ್ಲಿ ಪ್ಲೇಸಿಬೊ (ಒಂದು ಚಿಕಿತ್ಸೆ) ವನ್ನು ಯಾರು ಪಡೆಯುತ್ತಿದ್ದಾರೆ ಎನ್ನುವುದು ರೋಗಿಗಳಿಗಾಗಲಿ ಅಥವಾ ಸಂಶೋಧಕರಿಗಾಗಲಿ ತಿಳಿಯುವುದಿಲ್ಲ.
ಭಾರತದ ಅತ್ಯುನ್ನತ ವೈದ್ಯಕೀಯ ಸಂಶೋಧನಾ ಸಂಸ್ಥೆಯಾದ ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್ (ಐಸಿಎಂಆರ್) ಹೈದರಾಬಾದ್ ಮೂಲದ ಭಾರತ್ ಬಯೋಟೆಕ್ ಇಂಟರ್ನ್ಯಾಷನಲ್ ಲಿಮಿಟೆಡ್ (ಬಿಬಿಐಎಲ್) ಹಾಗೂ ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ವೈರಾಲಜಿ ಸಹಭಾಗಿತ್ವದಲ್ಲಿ 'ಕೊವಾಕ್ಸಿನ್' ಹೆಸರಿನ ಕೊರೊನಾ ವೈರಸ್ ಲಸಿಕೆ ಕಂಡು ಹಿಡಿದಿದೆ. ಆಗಸ್ಟ್ 15ರ ಒಳಗೆ ಮಾನವನ ಮೇಲೆ ಈ ಲಸಿಕೆಯ ಕ್ಲಿನಿಕಲ್ ಪ್ರಯೋಗದ ಫಲಿತಾಂಶವನ್ನು ಬಿಡುಗಡೆ ಮಾಡುವ ಗುರಿ ಹೊಂದಿದೆ.
ಕೋವಿಡ್ -19 ಲಸಿಕೆಗಾಗಿ ಮಾನವರ ಮೇಲೆ ಮೊದಲನೇ ಹಾಗೂ ಎರಡನೇ ಹಂತದ ಕ್ಲಿನಿಕಲ್ ಪ್ರಯೋಗ ನಡೆಸಲು ಡ್ರಗ್ಸ್ ಕಂಟ್ರೋಲರ್ ಜನರಲ್ ಆಫ್ ಇಂಡಿಯಾ (ಡಿಸಿಜಿಐ) ಎರಡು ಕಂಪನಿಗಳಿಗೆ ಅನುಮತಿ ನೀಡಿದೆ. ಒಂದು ಭಾರತ್ ಬಯೋಟೆಕ್. ಇನ್ನೊಂದು ಝ್ಯಾಡಸ್ ಕ್ಯಾಡಿಲಾ ಕಂಪನಿ.
