ನವದೆಹಲಿ: ಅಯೋಧ್ಯೆ ಭೂವಿವಾದದ ಕೊನೆಯ ದಿನದ ವಿಚಾರಣೆ ನಾಟಕೀಯ ಬೆಳವಣಿಗೆಯೊಂದಕ್ಕೆ ಸಾಕ್ಷಿಯಾಗಿದೆ.
ವಿಚಾರಣೆ ಸಂದರ್ಭದಲ್ಲಿ ವಾದ ಮಂಡಿಸುವ ವೇಳೆ ಹಿಂದೂ ಮಹಾಸಭಾ ಪರ ವಕೀಲ ವಿಕಾಸ್ ಸಿಂಗ್, ರಾಮಜನ್ಮ ಭೂಮಿ ಬಗೆಗಿನ ಪುಸ್ತಕ(ಅಯೋಧ್ಯ ರಿವಿಸಿಟೆಡ್) ಉಲ್ಲೇಖ ಮಾಡಿದ್ದಲ್ಲದೆ, ಸ್ಥಳದ ನಕ್ಷೆಯನ್ನು ಕೋರ್ಟ್ ಮುಂದಿಟ್ಟರು. ಈ ವೇಳೆ ಏಕಾಏಕಿ ಸುನ್ನಿ ವಕ್ಫ್ಬೋರ್ಡ್ ಪರ ವಕೀಲ ರಾಜೀವ್ ಧವನ್ ಮಧ್ಯಪ್ರವೇಶಿಸಿ ನಕ್ಷೆಯನ್ನು ಹರಿದು ಹಾಕಿದ್ದಾರೆ.
ಅಯೋಧ್ಯೆ ವಿಚಾರಣೆ: "ಸಂಜೆ 5 ಗಂಟೆಗೆ ಎಲ್ಲವೂ ಮುಕ್ತಾಯವಾಗಬೇಕು"- ಸುಪ್ರೀಂ
ನಕ್ಷೆ ಪ್ರದರ್ಶನಕ್ಕೆ ತೀವ್ರ ವಿರೋಧ ವ್ಯಕ್ತಪಡಿಸಿದ ರಾಜೀವ್ ಧವನ್ ಅದನ್ನು ಹರಿದು ಹಾಕಿದ್ದಾರೆ. ಈ ವೇಳೆ ಮುಖ್ಯ ನ್ಯಾಯಮೂರ್ತಿ ರಂಜನ್ ಗೊಗೊಯಿ ಕುಪಿತರಾಗಿ, ನೀವು ಏನು ಬೇಕಿದ್ದರೂ ಮಾಡಿ, ಇನ್ನಷ್ಟು ಹರಿಯಿರಿ ಎಂದು ಆಕ್ರೋಶ ಭರಿತರಾಗಿ ಹೇಳಿದ್ದಾರೆ.
ನಿತ್ಯ ವಿಚಾರಣೆಯ 40ನೇ ದಿನವಾದ ಇಂದು ಈ ನಾಟಕೀಯ ಬೆಳವಣಿಗೆ ಸಾಕಷ್ಟು ಅಚ್ಚರಿಗೂ ಕಾರಣವಾಗಿದೆ. ಇಂದು ಸಂಜೆ 5 ಗಂಟೆಗೆ ವಿಚಾರಣೆ ಮುಕ್ತಾಯವಾಗಲಿದೆ.
