ಹೈದರಾಬಾದ್: ತಿರುಪತಿ ದೇವಸ್ಥಾನ ಮಂಡಳಿಗೆ ಗುತ್ತಿಗೆ ಆಧಾರದಲ್ಲಿ ಭದ್ರತೆ ನಿಯೋಜಿಸುವ ಕುರಿತು ಒಪ್ಪಂದ ಮಾಡಿಕೊಳ್ಳುವ ಭರವಸೆ ನೀಡಿದ ವಂಚಕರು, 72 ವರ್ಷದ ನಿವೃತ್ತ ಸೇನಾ ಕರ್ನಲ್ ಅವರಿಗೆ ₹ 80 ಲಕ್ಷ ಮೋಸ ಮಾಡಿ ಪರಾರಿಯಾಗಿದ್ದಾರೆ.
ನಿವೃತ್ತ ಸೇನಾ ಕರ್ನಲ್ ಕುಮಾರ್, ಚೆನ್ನೈನ ತಂಬರಂನಲ್ಲಿ ಖಾಸಗಿ ಭದ್ರತಾ ಸಂಸ್ಥೆ ನಡೆಸುತ್ತಿದ್ದಾರೆ. ತಿರುಪತಿ ದೇವಾಲಯದ ಭದ್ರತಾ ಉದ್ದೇಶಕ್ಕಾಗಿ ಗುತ್ತಿಗೆಯಲ್ಲಿ 450 ಮಂದಿ ಬೇಕಾಗಿದ್ದಾರೆ ಎಂದು ಹೇಳಿದ್ದ ಸೆಂಥಿಲ್ ಎಂಬಾತನನ್ನು ನಿವೃತ್ತ ಕರ್ನಲ್ ಸಂಪರ್ಕಿಸಿದ್ದಾರೆ. ನಿವೃತ್ತ ಕರ್ನಲ್ಗೆ ತಾನು ತಿರುಪತಿ ದೇವಸ್ಥಾನ ಮಂಡಳಿ ಸದಸ್ಯ ಎಂದು ಸೆಂಥಿಲ್ ಹೇಳಿಕೊಂಡಿದ್ದನಂತೆ.
ಸೆಂಥಿಲ್ ಜೊತೆಗೆ ಇನ್ನಿಬ್ಬರು ಈ ವಂಚನೆಯಲ್ಲಿ ಭಾಗಿಯಾಗಿದ್ದಾರೆ. ಅದರಲ್ಲಿ ಮಹಿಳೆಯೊಬ್ಬಳು ಸಹ ಇದ್ದಾಳೆ. ದೇವಸ್ಥಾನದಲ್ಲಿ ಪ್ರಮುಖ ವ್ಯಕ್ತಿಗಳೊಂದಿಗೆ ಸೆಂಥಿಲ್ ನಿಕಟ ಸಂಪರ್ಕ ಹೊಂದಿದ್ದ ಎನ್ನಲಾಗಿದೆ. ದೇವಾಲಯದಲ್ಲಿ ಕೆಲಸ ಮಾಡುತ್ತಿದ್ದ ರಮೇಶ್ ನಾಯ್ಡು ಅವರನ್ನು ನಿವೃತ್ತ ಕರ್ನಲ್ಗೆ ಪರಿಚಯಿಸಿದ. ಬಳಿಕ ಕುಮಾರ್ ಮತ್ತು ರಮೇಶ್ ಅವರೊಂದಿಗೆ ಮಾತುಕತೆ ನಡೆಸಿ ಸೆಂಥಿಲ್ ಒಪ್ಪಂದ ಕುದುರಿಸಿದ್ದಾನೆ.
ಕರ್ನಲ್ ಒಪ್ಪಂದದ ಪ್ರಕಾರ ತನ್ನ ಸಿಬ್ಬಂದಿಯನ್ನು ಕೂಡಾ ಒದಗಿಸಿದ್ದಾರೆ. ಆದರೆ, ಎಂಟು ತಿಂಗಳ ಕೆಲಸದ ನಂತರವೂ ಒಪ್ಪಂದದಂತೆ ಕರ್ನಲ್ಗೆ 80 ಲಕ್ಷ ಹಣವನ್ನು ಸೆಂಥಿಲ್ ನೀಡಿರಲಿಲ್ಲ. ಪರಿಣಾಮವಾಗಿ, ಅವರು ತಿರುಪತಿ ದೇವಸ್ಥಾನ ಮಂಡಳಿ ಸಮಿತಿಯನ್ನು ವಿಚಾರಿಸಿದರು. ಅಲ್ಲಿ ಅಂತಹ ಯಾವುದೇ ಒಪ್ಪಂದವನ್ನು ಅಧಿಕೃತವಾಗಿ ಅನುಮೋದಿಸಲಾಗಿಲ್ಲ ಎಂದು ತಿಳಿಸಿದ್ದಾರೆ. ಕರ್ನಲ್ ಈ ಕುರಿತು ಪ್ರಕರಣ ದಾಖಲಿಸಿದ್ದು, ಚೆನ್ನೈ ಕೇಂದ್ರ ಅಪರಾಧ ಶಾಖೆ ವಿಚಾರಣೆ ಆರಂಭಿಸಿದೆ ಮತ್ತು ಅಪರಾಧಿಗಳನ್ನು ಬಂಧಿಸಲು ತನಿಖೆ ನಡೆಯುತ್ತಿದೆ.
