ಪ್ರಯಾಗರಾಜ್ : ರೈಲ್ವೆ ನಿಲ್ದಾಣದಲ್ಲಿ ಸಂಪರ್ಕ ರಹಿತ ಟಿಕೇಟಿಂಗ್ಗಾಗಿ ಪ್ರಯಾಗರಾಜ್ ರೈಲು ನಿಲ್ದಾಣದಲ್ಲಿ ಏರ್ಪೋರ್ಟ್ ಮಾದರಿಯ ಬೋರ್ಡಿಂಗ್ ವ್ಯವಸ್ಥೆ ಮಾಡಲಾಗುತ್ತಿದೆ ಎಂದು ಉತ್ತರ ಮಧ್ಯ ರೈಲ್ವೆಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಹೊಸ ವ್ಯವಸ್ಥೆಯ ಕುರಿತು ಉತ್ತರ ಮಧ್ಯ ರೈಲ್ವೆಯ ಸಿಪಿಆರ್ಒ ಅಜಿತ್ ಕುಮಾರ್‌ಸಿಂಗ್ ಮಾಹಿತಿ ನೀಡಿದರು. ನಿಲ್ದಾಣಕ್ಕೆ ಬರುವ ಪ್ರಯಾಣಿಕರು ಮೊದಲಿಗೆ 4 ಚೆಕ್ ಇನ್ ಕೌಂಟರ್‌ಗಳಿರುವ ಬೋರ್ಡಿಂಗ್ ಹಾಲ್ಗೆ ಪ್ರವೇಶಿಸುತ್ತಾರೆ. ಕೊರೊನಾ ವೈರಸ್ ಹರಡದಂತೆ ಮುನ್ನೆಚ್ಚರಿಕೆಯಾಗಿ ಈ ಎಲ್ಲ ಕೌಂಟರ್ಗಳು ಸಂಪೂರ್ಣ ಕಾಂಟ್ಯಾಕ್ಟ್‌ಲೆಸ್ ಮಾದರಿ ಕಾರ್ಯನಿರ್ವಹಿಸುತ್ತವೆ. ಕೌಂಟರ್ನಲ್ಲಿ ಅಳವಡಿಸಿರುವ ಸ್ಕ್ಯಾನರ್ ಟಿಕೇಟ್ ಸ್ಕ್ಯಾನ್ ಮಾಡುತ್ತದೆ ಹಾಗೂ ಅಲ್ಲಿಯೇ ಇರುವ ವೆಬ್ಕ್ಯಾಮ್ ಪ್ರಯಾಣಿಕರ ಚಿತ್ರ ಸೆರೆಹಿಡಿಯುತ್ತದೆ.
ಈ ಎಲ್ಲ ಮಾಹಿತಿಗಳು ಕೌಂಟರ್ ಒಳಗಡೆ ಇರುವ ಸ್ಟಾಫ್ ಕಂಪ್ಯೂಟರ್ಗೆ ರವಾನಿಸಲ್ಪಡುತ್ತವೆ ಎಂದು ಅಜಿತ್ ಕುಮಾರ್‌ ಸಿಂಗ್ ಹೇಳಿದರು. ಪ್ರಯಾಣಿಕರು ನಿಲ್ಲುವ ಸ್ಥಳ ಮತ್ತು ಕೌಂಟರ್ ನಡುವೆ ಗಾಜಿನ ಪರದೆ ಅಳವಡಿಸಲಾಗಿದೆ. ಎರಡೂ ಬದಿಯಲ್ಲಿ ಇರುವ ಮೈಕ್ರೊಫೋನ್ ಮೂಲಕ ಪ್ರಯಾಣಿಕರು ಕೌಂಟರ್ ಸಿಬ್ಬಂದಿಯೊಂದಿಗೆ ಮಾತನಾಡಬಹುದು. ಈ ವ್ಯವಸ್ಥೆಯಿಂದ ಟಿಕೆಟ್ ನೀಡುವ ಹಾಗೂ ಪ್ರಯಾಣಿಕರು ರೈಲು ಹತ್ತುವ ಪ್ರಕ್ರಿಯೆ ಸಂಪೂರ್ಣ ಭೌತಿಕ ಸಂಪರ್ಕರಹಿತವಾಗಲಿದೆ. ಇದೇ ಸ್ಥಳದಲ್ಲಿ ಥರ್ಮಲ್ ಸ್ಕ್ಯಾನಿಂಗ್ ಸಹ ಅಳವಡಿಸಲಾಗುತ್ತಿದೆ.
ಒಂದೇ ಸ್ಥಳದಲ್ಲಿ ಎಲ್ಲ ಅಗತ್ಯ ಪರೀಕ್ಷೆಗಳನ್ನು ಮುಗಿಸಿ ಪ್ರಯಾಣಿಕರು ನಿಲ್ದಾಣದೊಳಗೆ ತೆರಳಬಹುದು. ಪ್ರಯಾಗರಾಜ್ ನಿಲ್ದಾಣದ ಒಂದು ಕೌಂಟರ್ನಲ್ಲಿ ಈಗಾಗಲೇ ಕ್ಯೂಆರ್ ಕೋಡ್ ಆಧಾರಿತ ಟಿಕೇಟ್ ಸ್ಕ್ಯಾನಿಂಗ್ ವ್ಯವಸ್ಥೆಯನ್ನು ಯಶಸ್ವಿಯಾಗಿ ಅಳವಡಿಸಲಾಗಿದೆ ಎಂದು ಅವರು ಹೇಳಿದರು.
