ಹೊಸದಿಲ್ಲಿ: ದೇಶದ ವಿವಿಧ ಭಾಗಗಳಿಗೆ ವೈದ್ಯಕೀಯ ಚಿಕಿತ್ಸಾ ಸಲಕರಣೆಗಳನ್ನು ತಲುಪಿಸಲು ಏರ್ ಇಂಡಿಯಾ ಹಾಗೂ ಅಲೈಯನ್ಸ್ ಏರ್ ಸಂಸ್ಥೆಗಳ ಕಾರ್ಗೊ ವಿಮಾನಗಳನ್ನು ಬಳಸಲಾಗುವುದು ಎಂದು ಕೇಂದ್ರ ಸರ್ಕಾರ ಸೋಮವಾರ ತಿಳಿಸಿದೆ.
ಕೋವಿಡ್-19 ಚಿಕಿತ್ಸೆಗೆ ಬೇಕಾಗುವ ವೈದ್ಯಕೀಯ ಸಲಕರಣೆಗಳು ಹಾಗೂ ಅಗತ್ಯ ಚಿಕಿತ್ಸಾ ಉಪಕರಣಗಳ ಪೂರೈಕೆಗಾಗಿ ನಾಗರಿಕ ವಿಮಾನಯಾನ ಸಚಿವಾಲಯ ಎಲ್ಲ ರಾಜ್ಯ ಸರ್ಕಾರಗಳೊಂದಿಗೆ ಈಗಾಗಲೇ ಮಾತುಕತೆ ನಡೆಸಿದೆ.
"ಆಯಾ ರಾಜ್ಯಗಳ ತುರ್ತು ಬೇಡಿಕೆಗಳನ್ನಾಧರಿಸಿ ನಾಗರಿಕ ವಿಮಾನಯಾನ ಖಾತೆಯ ಹಿರಿಯ ಅಧಿಕಾರಿಗಳು ಸಲಕರಣೆಗಳ ಪೂರೈಕೆಗೆ ವ್ಯವಸ್ಥೆ ಮಾಡಲಿದ್ದಾರೆ. ನಂತರ ಈ ಸಲಕರಣೆಗಳನ್ನು ನಿರ್ದಿಷ್ಟ ಸ್ಥಳಗಳಿಗೆ ತಲುಪಿಸುವ ಏರ್ಪಾಟು ಮಾಡಲಾಗುವುದು. ಏರ್ ಇಂಡಿಯಾ ಹಾಗೂ ಅಲೈಯನ್ಸ್ ಏರ್ ವಿಮಾನಗಳ ಮೂಲಕ ಈ ಸಲಕರಣೆಗಳನ್ನು ಸಾಗಿಸಲಾಗುವುದು" ಎಂದು ನಾಗರಿಕ ವಿಮಾನಯಾನ ಖಾತೆಯ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಈಶಾನ್ಯ ರಾಜ್ಯಗಳ ಗುವಾಹಟಿ, ದಿಬ್ರುಗಢ, ಅಗರ್ತಲಾ ಮತ್ತು ಕೋಲ್ಕತ್ತಾಗಳಿಗೆ ಅಗತ್ಯ ಸಲಕರಣೆಗಳನ್ನು ಅಲೈಯನ್ಸ್ ಏರ್ ವಿಮಾನದ ಮೂಲಕ ಮಾ.29 ರಂದು ದೆಹಲಿಯಿಂದ ಕಳುಹಿಸಲಾಗಿದೆ.
"ಮಾಹಿತಿ ವಿನಿಮಯ ಹಾಗೂ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವ ಕಾರ್ಯ ದಿನ 24 ಗಂಟೆಯೂ ನಡೆಯುತ್ತಿದೆ. ಕೋವಿಡ್-19 ವೈರಸ್ ಹರಡುವಿಕೆ ತಡೆಗಟ್ಟಲು ಬೇಕಾದ ಎಲ್ಲ ರೀತಿಯ ವ್ಯವಸ್ಥೆಗಳನ್ನು ಸಮರೋಪಾದಿಯಲ್ಲಿ ಮಾಡಲಾಗುತ್ತಿದೆ." ಎಂದು ವಿಮಾನಯಾನ ಸಚಿವಾಲಯ ತಿಳಿಸಿದೆ.
ಪ್ರಸ್ತುತ ದೇಶದಲ್ಲಿ ಸ್ಥಳೀಯ ಹಾಗೂ ಅಂತಾರಾಷ್ಟ್ರೀಯ ಪ್ರಯಾಣಿಕರ ವಿಮಾನಯಾನ ಸ್ಥಗಿತಗೊಳಿಸಲಾಗಿದ್ದು, ಕೇವಲ ಕಾರ್ಗೊ ವಿಮಾನಗಳು ಮಾತ್ರ ಕಾರ್ಯ ನಿರ್ವಹಿಸುತ್ತಿವೆ.
