ನೆಲ್ಲೂರು: ತಂದೆಯೊಬ್ಬ ಕುಡಿದ ಮತ್ತಿನಲ್ಲಿ ಊಟ ಮಾಡುತ್ತಿದ್ದ ಮಗಳನ್ನು ಕೊಲೆ ಮಾಡಿರುವ ಘಟನೆ ಆಂಧ್ರಪ್ರದೇಶದ ನೆಲ್ಲೂರು ಜಿಲ್ಲೆಯಲ್ಲಿ ನಡೆದಿದೆ.
ಇಲ್ಲಿನ ಗೊಟ್ಟಿಗುಂಡಾಲ ಗ್ರಾಮದ ನಿವಾಸಿ ರೋಶಯ್ಯ ನಿತ್ಯ ಕುಡಿದು ಹೆಂಡ್ತಿ ಚೆನ್ನಮ್ಮನ ಜೊತೆ ಜಗಳವಾಡುತ್ತಿದ್ದನು. ಈ ದಂಪತಿಗೆ ಮೂವರು ಹೆಣ್ಮಕ್ಕಳು ಮತ್ತು ಒಂದು ಗಂಡು ಮಗುವಿದೆ.
ಇನ್ನು ಎರಡನೇ ಮಗಳು ಹೇಮಲತಾ ವಿಂಜಮೂರು ತಾಲೂಕಿನ ಖಾಸಗಿ ಕಾಲೇಜ್ನಲ್ಲಿ ಡಿಗ್ರಿ ಎರಡನೇ ವರ್ಷ ವ್ಯಾಸಂಗ ಮಾಡುತ್ತಿದ್ದರು. ತಂದೆ ಜಗಳವಾಡುತ್ತಿದ್ದ ವೇಳೆ ಹೇಮಲತಾ ತನ್ನ ತಾಯಿಗೆ ಬೆಂಬಲ ಸೂಚಿಸುತ್ತಿಳು. ಬುಧವಾರ ಸಹೋದರಿ ಮತ್ತು ತಾಯಿ ಕೆಲಸಕ್ಕಾಗಿ ಹೊಲಕ್ಕೆ ತೆರಳಿದಾಗ ಹೇಮಲತಾ ಮನೆಯಲ್ಲೇ ಇದ್ದಳು.
ಈ ವೇಳೆ ಕುಡಿದ ಮತ್ತಿನಲ್ಲಿ ಮನೆಗೆ ಬಂದ ತಂದೆ ರೋಶಯ್ಯ ಮಗಳು ಹೇಮಲತಾಳೊಂದಿಗೆ ಜಗಳವಾಡಿದ್ದಾನೆ. ಜಗಳ ವಿಕೋಪಕ್ಕೆ ತಿರುಗಿದ್ದು, ವನಕೆಯಿಂದ ಊಟ ಮಾಡುತ್ತಿದ್ದ ಮಗಳ ತಲೆಗೆ ಹೊಡೆದಿದ್ದಾನೆ. ಹೇಮಲತಾ ತಲೆಗೆ ಬಲವಾಗಿ ಪೆಟ್ಟು ಬಿದ್ದಿದ್ದರಿಂದ ರಕ್ತಸ್ರಾವವಾಗಿ ಮೃತಪಟ್ಟಳು.
ಈ ಘಟನೆ ಕುರಿತು ಪ್ರಕರಣ ದಾಖಲಾಗಿದ್ದು, ಪೊಲೀಸರು ಆರೋಪಿ ತಂದೆಯನ್ನು ಬಂಧಿಸಿ ಮುಂದಿನ ಕ್ರಮ ಕೈಗೊಂಡಿದ್ದಾರೆ.
