ನವದೆಹಲಿ: 20 ಸೆಂ.ಮೀಟರ್ ಉದ್ದದ ತರಕಾರಿ ಕತ್ತರಿಸುವ ಚಾಕು ನುಂಗಿದ್ದ ವ್ಯಕ್ತಿಗೆ ಏಮ್ಸ್ ವೈದ್ಯರು ಯಶಸ್ವಿಯಾಗಿ ಶಸ್ತ್ರಚಿಕಿತ್ಸೆ ನಡೆಸಿ, ಚಾಕು ಹೊರಗಡೆ ತೆಗೆದಿರುವ ಘಟನೆ ನಡೆದಿದೆ.
20 ಸೆಂ.ಮೀ. ಉದ್ದದ ಚಾಕು ನುಂಗಿದ ವ್ಯಕ್ತಿ
ಗಾಂಜಾ ಸೇವನೆ ಮಾಡುವ ಚಟ ಬೆಳೆಸಿಕೊಂಡಿದ್ದ ಈ ವ್ಯಕ್ತಿ ಮೂಲತಃ ಹರಿಯಾಣದ ಪಾಲ್ವಾಲ್ ಜಿಲ್ಲೆಯವನು. ಮಾನಸಿಕ ಅಸ್ವಸ್ಥನಾಗಿದ್ದ ಈ ವ್ಯಕ್ತಿ ಒಂದೂವರೆ ತಿಂಗಳ ಹಿಂದೆ ಚಾಕು ನುಂಗಿದ್ದ. ತಿಂಗಳ ಬಳಿಕ ಆತನಿಗೆ ಹೊಟ್ಟೆನೋವು ಮತ್ತು ಹಸಿವು ಆಗದೇ ಇರುವಂತಹ ತೊಂದರೆ ಶುರುವಾಗಿದೆ. ಹೀಗಾಗಿ ಕುಟುಂಬಸ್ಥರು ಆಸ್ಪತ್ರೆಗೆ ಕರೆದುಕೊಂಡು ಹೋದಾಗ ಹೊಟ್ಟೆಯ ಏಕ್ಸ್ರೇ ಮಾಡಿದಾಗ ಚಾಕು ಇರುವ ವಿಷಯ ಗೊತ್ತಾಗಿದೆ.
ಏಮ್ಸ್ ಆಸ್ಪತ್ರೆಯ ಎನ್.ಆರ್.ದಾಸ್ ನೇತೃತ್ವದ ವೈದರ ತಂಡ ಶ್ವಾಸಕೋಶ, ರಕ್ತನಾಳ ಹಾಗೂ ಲಿವರ್ಗೆ ಯಾವುದೇ ರೀತಿಯ ತೊಂದರೆಯಾಗದ ರೀತಿಯಲ್ಲಿ ಶಸ್ತ್ರಚಿಕಿತ್ಸೆ ನಡೆಸಿ, ಚಾಕು ಹೊರ ತೆಗೆದಿದ್ದಾರೆ. ಮೂರು ಗಂಟೆಗಳ ಕಾಲ ಶಸ್ತ್ರಚಿಕಿತ್ಸೆ ನಡೆಸಲಾಗಿದೆ ಎಂದು ಅವರು ಹೇಳಿದ್ದು, ಇದೀಗ ಆತ ಚೇತರಿಸಿಕೊಳ್ಳುತ್ತಿದ್ದಾನೆ ಎಂದು ತಿಳಿಸಿದ್ದಾರೆ.
