ನವದೆಹಲಿ: ದೇಶಾದ್ಯಂತ ಕೊರೊನಾ ಅಬ್ಬರ ಜೋರಾಗಿದೆ. ಇಲ್ಲಿಯವರೆಗೆ ಯಾವುದೇ ರೀತಿಯ ಲಸಿಕೆ ಕೋವಿಡ್-19ಗಾಗಿ ಕಂಡು ಹಿಡಿದಿಲ್ಲ. ಆದರೆ ಅನೇಕ ಔಷಧಿಗಳ ಪ್ರಯೋಗ ನಡೆಸಲಾಗುತ್ತಿದ್ದು, ಐಸಿಎಂಆರ್ ತಿಳಿಸಿರುವ ಪ್ರಕಾರ, ಇದೀಗ ಮತ್ತೆರಡು ಲಸಿಕೆಗಳ ಮಾನವ ಪ್ರಯೋಗಕ್ಕೆ ಅನುಮತಿ ನೀಡಲಾಗಿದೆ.
ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್) ನಿರ್ದೇಶಕ ಬಲರಾಂ ಭಾರ್ಗವ್ ಹೇಳುವಂತೆ, ಭಾರತದ ಎರಡು ಲಸಿಕೆಗಳು ಯಶಸ್ವಿಯಾಗಿ ಸಂಶೋಧನೆಯಾಗಿದ್ದು, ಈಗಾಗಲೇ ಇಲಿ, ಮೊಲದ ಮೇಲೆ ಪ್ರಯೋಗ ನಡೆಸಲಾಗಿದೆ. ಇದರ ಡೇಟಾವನ್ನು ಸಲ್ಲಿಸಲಾಗಿದ್ದು ಇದರ ಮಾನವ ಪ್ರಯೋಗ ಪ್ರಾರಂಭಿಸಲು ಅನುಮತಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.
ರಷ್ಯಾ ಕೂಡ ಕೋವಿಡ್ ವಿರುದ್ಧ ಲಸಿಕೆ ಸಂಶೋಧನೆ ಮಾಡುತ್ತಿದೆ. ಆ ದೇಶ ಈ ನಿಟ್ಟಿನಲ್ಲಿ ಆರಂಭಿಕ ಯಶ ಕಂಡಿದೆ ಎಂದು ಭಾರ್ಗವ್ ವಿವರಿಸಿದರು.
ಕೋವಿಡ್-19 ಕೆಮ್ಮಿದಾಗ, ಸೀನಿದಾಗ ಚಿಕ್ಕ ಚಿಕ್ಕ ಮೈಕ್ರೋ ಡ್ರಾಪ್ಲೆಟ್ಗಳೊಂದಿಗೆ (5 ಮೈಕ್ರಾನ್ಗಳಿಗಿಂತ ಕಡಿಮೆ ಗಾತ್ರ) ಹಾಗೂ ಕೆಲವೊಮ್ಮೆ ವೈರಾಣು ಗಾಳಿಯಲ್ಲಿ ಹರಡುವ ಸಾಧ್ಯತೆ ಇದೆ ಎಂದು ವಿಜ್ಞಾನಿಗಳು ಅಭಿಪ್ರಾಯ ಪಟ್ಟಿದ್ದು, ಮಾಸ್ಕ್ ಹಾಕಿಕೊಳ್ಳುವುದು ಅತ್ಯಂತ ಮುಖ್ಯ ಎಂದು ಅವರು ಎಚ್ಚರಿಸಿದ್ದಾರೆ.
ಈಗಾಗಲೇ ಭಾರತದಲ್ಲಿ ಕೋವಿಡ್ ವಿರುದ್ಧ ದೇಶೀಯ ಲಸಿಕೆ ಕೊವಾಕ್ಸಿನ್ ಮೊದಲ ಹಾಗೂ ಎರಡನೇ ಹಂತದ ಮಾನವ ಪ್ರಯೋಗ ಕಾರ್ಯಕ್ಕೆ ಹೈದರಾಬಾದ್ ಮೂಲದ ಲಸಿಕೆ ತಯಾರಿಕ ಕಂಪನಿ ಭಾರತ್ ಬಯೋಟೆಕ್‌ಗೆ ಡ್ರಗ್ ಕಂಟ್ರೋಲರ್ ಜನರಲ್ ಆಫ್ ಇಂಡಿಯಾ ( ಡಿಸಿಜಿಐ) ಅನುಮೋದನೆ ನೀಡಿದೆ.
