ವಾಷಿಂಗ್ಟನ್(ಅಮೆರಿಕ): ರಾಷ್ಟ್ರದಲ್ಲಿ ಈವರೆಗೂ 1.6 ಮಿಲಿಯನ್ ಮಂದಿಗೆ ಕೊರೊನಾ ಸೋಂಕಿನ ಪತ್ತೆ ಪರೀಕ್ಷೆ ಮಾಡಲಾಗಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ.
ಶ್ವೇತಭವನದ ಕೊರೊನಾ ವೈರಸ್ ಟಾಸ್ಕ್ ಫೋರ್ಸ್ನಲ್ಲಿ ಮಾತನಾಡಿದ ಅವರು ದೇಶಾದ್ಯಂತ ಮೂರು ಸಾವಿರ ಮಂದಿ ಸೇನಾ ಸಿಬ್ಬಂದಿ ಹಾಗೂ ವೈದ್ಯಕೀಯ ಸಿಬ್ಬಂದಿಯ ತಂಡವನ್ನು ಕೊರೊನಾ ವಿರುದ್ಧದ ಕಾರ್ಯಾಚರಣೆಗೆ ನಿಯೋಜಿಸಲಾಗಿದೆ ಎಂದರು.
ಫೆಡರಲ್ ಎಮರ್ಜೆನ್ಸಿ ಮ್ಯಾನೇಜ್ಮೆಂಟ್ ಏಜೆನ್ಸಿ ಮೂಲಕ ನ್ಯೂಜೆರ್ಸಿಗೆ 500, ಲೂಸಿಯಾನಾಗೆ 200, ಇಲಿನಾಯ್ಸ್ಗೆ 600, ಮೆಸ್ಸಾಚುಸೆಟ್ಸ್ಗೆ 100, ಮಿಚಿಗನ್ಗೆ 300 ಸೇರಿದಂತೆ ಒಟ್ಟು 1700 ವೆಂಟಿಲೇಟರ್ಗಳನ್ನು ವಿವಿಧ ರಾಜ್ಯಗಳಿಗೆ ಹಸ್ತಾಂತರಿಸೋದಾಗಿ ಸ್ಪಷ್ಟಪಡಿಸಿದ್ದಾರೆ. ಜೊತೆಗೆ ನ್ಯೂಯಾರ್ಕ್ ಹಾಗೂ ಲಾಂಗ್ ಐಲ್ಯಾಂಡ್ಗಳಿಗೆ ಮಾಸ್ಕ್ಗಳನ್ನು ನೀಡುವುದಾಗಿ ಭರವಸೆ ನೀಡಿದರು.
ಮುಂದಿನ ದಿನಗಳಲ್ಲಿ ಅಮೆರಿಕನ್ನರ ಜೀವನ ಮತ್ತಷ್ಟು ಗಂಭೀರವಾಗಲಿದೆ ಎಂದು ಆತಂಕ ವ್ಯಕ್ತಪಡಿಸಿದ ಟ್ರಂಪ್ ''ಈ ವಾರ ಹಾಗೂ ಮುಂದಿನ ವಾರ ಕಠಿಣವಾಗಿದ್ದು, ಮರಣ ಪ್ರಮಾಣ ದುರಾದೃಷ್ಟವಶಾತ್ ಹೆಚ್ಚಾಗಿದೆ'' ಎಂದಿದ್ದಾರೆ.
ಈ ಸದ್ಯಕ್ಕೆ ಅಮೆರಿಕದಲ್ಲಿ 3,37,620 ಮಂದಿಯಲ್ಲಿ ಸೋಂಕು ದೃಢಪಟ್ಟಿದ್ದು, 9,643 ಮಂದಿ ಸೋಂಕಿನ ಕಾರಣಕ್ಕೆ ಮೃತಪಟ್ಟಿದ್ದಾರೆ.
