ಕೊಚ್ಚಿ (ಕೇರಳ) : ಕೇರಳ ದೇವರ ಸ್ವಂತ ನಾಡು ಎಂದು ಪ್ರಸಿದ್ಧಿ ಪಡೆದಿದೆ. ನೂರಾರು ಇತಿಹಾಸ ಪ್ರಸಿದ್ಧ ತೀರ್ಥ ಕ್ಷೇತ್ರಗಳು ಇಲ್ಲಿವೆ. ಅಪಾರ ಸಂಖ್ಯೆಯಲ್ಲಿ ದೇಶ ವಿವಿಧೆಡೆಯಿಂದ ಇಲ್ಲಿನ ದೇವಾಲಯಕ್ಕೆ ಭಕ್ತರು ಆಗಮಿಸುತ್ತಾರೆ. ಈ ದೇವಾಲಯಗಳು ಇಂದಿಗೂ ತನ್ನ ನಂಬಿಕೆ, ವಿಶಿಷ್ಟ ಆಚರಣೆಗಳನ್ನು ಉಳಿಸಿಕೊಂಡು ಬಂದಿದೆ. ಕೇರಳದ ಕೊಚ್ಚಿಯ ಅತಿ ಪ್ರಾಚೀನ ಆವನಂಕೋಡ್ ಸರಸ್ವತಿ ದೇವಾಲಯ ಇದೀಗ ಎಲ್ಲರ ಕೇಂದ್ರ ಬಿಂದುವಾಗಿದೆ. ಈ ದೇವಾಲಯವನ್ನು ಪಾಸ್ಪೋರ್ಟ್ ದೇವಾಲಯ ಎಂದು ಕರೆಯಲಾಗುತ್ತದೆ.
ಇಲ್ಲಿನ ನಡುಂಬಸ್ಸೇರಿ ವಿಮಾನ ನಿಲ್ದಾಣದ ಬಳಿ ಇರುವ ಆವನಂಕೋಡ್ ಸರಸ್ವತಿ ದೇವಾಲಯಕ್ಕೆ ಪ್ರತಿನಿತ್ಯ ಅಪಾರ ಸಂಖ್ಯೆಯಲ್ಲಿ ಭಕ್ತರು ಆಗಮಿಸುತ್ತಾರೆ. ಇಲ್ಲಿ ಭೇಟಿ ವಿಶೇಷ ಪೂಜೆಗಳನ್ನು ಕೈಗೊಳ್ಳುತ್ತಾರೆ. ಸರಸ್ವತಿಯು ವಿದ್ಯಾದೇವತೆ ಆಗಿರುವುದರಿಂದ ಇಲ್ಲಿ ಮಕ್ಕಳಿಗೆ ವಿದ್ಯಾರಂಭವನ್ನು ಮಾಡಿಸಲಾಗುತ್ತದೆ. ಸಾಮಾನ್ಯವಾಗಿ ನವರಾತ್ರಿ ಸಂದರ್ಭಗಳಲ್ಲಿ ಮಕ್ಕಳಿಗೆ ವಿದ್ಯಾರಂಭ ಮಾಡಿಸಲಾಗುತ್ತದೆ. ಆದರೆ ಈ ದೇವಾಲಯದಲ್ಲಿ ಎಲ್ಲಾ ದಿನಗಳಲ್ಲಿ ವಿದ್ಯಾರಂಭ ಮಾಡಲಾಗುತ್ತದೆ.
ಪಾಸ್ಪೋರ್ಟ್ ದೇವಾಲಯ : ಈ ದೇವಾಲಯವು ವಿಮಾನ ನಿಲ್ದಾಣದ ಪಕ್ಕದಲ್ಲೇ ಇರುವುದರಿಂದ ನೂರಾರು ಜನ ವಿಮಾನದಲ್ಲಿ ಪ್ರಯಾಣಿಸುವವರು ಇಲ್ಲಿಗೆ ಬಂದು ಪೂಜೆ ಸಲ್ಲಿಸಿಹೋಗುತ್ತಾರೆ. ವಿದೇಶಗಳಿಗೆ ತೆರಳುವವರು ಮೊದಲು ಇಲ್ಲಿಗೆ ಆಗಮಿಸಿ ತಮ್ಮ ಪಾಸ್ಪೋರ್ಟ್ಗೆ ಪೂಜೆ ಸಲ್ಲಿಸಿದ ಬಳಿಕ ತೆರಳುತ್ತಾರೆ. ಇಲ್ಲಿ ಪೂಜೆ ಸಲ್ಲಿಸಿ ವಿದೇಶಕ್ಕೆ ತೆರಳಿದರೆ ಜೀವನದಲ್ಲಿ ಸಮೃದ್ಧಿಯಾಗುತ್ತದೆ ಎಂಬ ನಂಬಿಕೆ ಇವರದ್ದಾಗಿದೆ. ಇದರಿಂದಾಗಿ ಆವನಂಕೋಡ್ ಸರಸ್ವತಿ ದೇವಾಲಯವು ಪಾಸ್ಪೋರ್ಟ್ ದೇವಾಲಯ ಎಂದು ಖ್ಯಾತಿ ಪಡೆದಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿದ ಕೇರಳ ಕ್ಷೇತ್ರ ಸೇವಾ ಟ್ರಸ್ಟ್ ಖಜಾಂಜಿ ಸಜೀಶ್ ಕೆ ಆರ್ ಮಾತನಾಡಿ, ಆವನಂಕೋಡ್ ಸರಸ್ವತಿ ದೇವಾಲಯಕ್ಕೆ ವಿದೇಶಿ ಪ್ರವಾಸಿಗರು ಸಹ ಆಗಮಿಸಿ ವಿಶೇಷ ಪೂಜೆಯನ್ನು ಕೈಗೊಳ್ಳುತ್ತಾರೆ. ಪೋಷಕರು ತಮ್ಮ ಮಕ್ಕಳಿಗೆ ಇಲ್ಲಿ ವಿದ್ಯಾರಂಭ ಮಾಡಿಸುತ್ತಾರೆ. ಆದಿ ಶಂಕರಾಚಾರ್ಯರು ಇದೇ ದೇವಾಲಯದಲ್ಲಿ ವಿದ್ಯಾರಂಭ ಮಾಡಿದ್ದರು ಎಂದು ಹೇಳಲಾಗಿದೆ. ಪ್ರತಿನಿತ್ಯ ವಿದ್ಯಾರಂಭ ಸೇವೆ ನಡೆಸುವ ಕೆಲವೇ ಕೆಲವು ದೇವಾಲಯಗಳಲ್ಲಿ ಈ ಆವನಂಕೋಡ್ ಸರಸ್ವತಿ ದೇವಾಲಯವೂ ಒಂದು ಎಂದು ಹೇಳಿದ್ದಾರೆ.
ವಿದ್ಯಾರಂಭವನ್ನು ದೇವಾಲಯದ 'ವಲಿಯಾ ಅಂಬಲಂ'ನಲ್ಲಿ ನಡೆಸಲಾಗುತ್ತದೆ. ಈ ದೇವಾಲಯದಲ್ಲಿ ಸರಸ್ವತಿ ದೇವಿಗೆ ವಿಶೇಷ ನಾವು - ಮಣಿ- ನಾರಾಯಂ (ಬಲಿವಾಡು)ಸೇವೆಯನ್ನು ಅರ್ಪಿಸಲಾಗುತ್ತದೆ. ಈ ಸೇವೆಯನ್ನು ದೇವಿಗೆ ಅರ್ಪಿಸುವುದರಿಂದ ಮಕ್ಕಳಿಗೆ ಸುಲಲಿತವಾಗಿ ಮಾತನಾಡಲು, ಉತ್ತಮ ವಿದ್ಯಾಭ್ಯಾಸ ಹಾಗೂ ಒಳ್ಳೆಯ ಹಸ್ತ ಬರಹವನ್ನು ಹೊಂದುತ್ತಾರೆ. ದೇವಿಗೆ ನೈವೇದ್ಯ ಇರಿಸಿದ ತುಪ್ಪವನ್ನು ಮಕ್ಕಳಿಗೆ ನೀಡುವುದರಿಂದ ಮಕ್ಕಳ ವಿದ್ಯಾಭ್ಯಾಸದಲ್ಲಿ ಅಭಿವೃದ್ಧಿ, ಪರೀಕ್ಷೆಯಲ್ಲಿ ಉತ್ತಮ ಅಂಕಗಳನ್ನು ಗಳಿಸುತ್ತಾರೆ ಎಂಬ ನಂಬಿಕೆ ಇಲ್ಲಿನ ಜನರದ್ದಾಗಿದೆ.
ವಿಮಾನ ನಿಲ್ದಾಣದಲ್ಲಿ ಟ್ಯಾಕ್ಸ್ ಚಾಲಕನಾಗಿ ಕೆಲಸ ಮಾಡುವ ರಾಧಾಕೃಷ್ಣನ್ ಮಾತನಾಡಿ, ನಡುಂಬಸ್ಸೇರಿ ವಿಮಾನ ನಿಲ್ದಾಣಕ್ಕೆ ಆಗಮಿಸುವ ವಿದೇಶಿ ಪ್ರಯಾಣಿಕರು ಇಲ್ಲಿನ ಸರಸ್ವತಿ ದೇವಾಲಯಕ್ಕೆ ಭೇಟಿ ನೀಡುತ್ತಾರೆ. ನಿತ್ಯ ನೂರಾರು ಜನ ಇಲ್ಲಿಗೆ ಭೇಟಿ ನೀಡಿ ಪೂಜೆ ಸಲ್ಲಿಸುತ್ತಾರೆ ಎಂದು ಹೇಳಿದರು.
ಶತಮಾನದಷ್ಟು ಹಳೆಯದಾದ ಈ ದೇವಾಲಯದಲ್ಲಿ ದೇವರ ಮೂರ್ತಿ ಇಲ್ಲ. ಬದಲಾಗಿ ದೈವಿಕ ಚೈತನ್ಯ ಹೊಂದಿರುವ ಕಲ್ಲನ್ನು ಇಲ್ಲಿ ಪೂಜಿಸಲಾಗುತ್ತದೆ. ಈ ದೇವಾಲಯವು ಬೆಳಿಗ್ಗೆ 5.30ಕ್ಕೆ ತೆರೆದು 10ಗಂಟೆ ವರೆಗೆ ಮತ್ತು ಸಂಜೆ 5.30ರಿಂದ 7.30ರವರೆಗೆ ತೆರೆದಿರುತ್ತದೆ. ಇದಕ್ಕೂ ಮೊದಲು ಈ ದೇವಾಲಯವು ಮುತ್ತಮನ್ ಕುಟುಂಬಸ್ಥರಿಗೆ ಸೇರಿತ್ತು. ಇದೀಗ ಕೇರಳ ಕ್ಷೇತ್ರ ಸೇವಾ ಟ್ರಸ್ಟ್ ನಿರ್ವಹಣೆ ಮಾಡುತ್ತಿದೆ.
ಇದನ್ನೂ ಓದಿ : ಪರ್ವತಗಳ ನಾಡಿನಲ್ಲಿ ವಿಶೇಷ ದೇವಾಲಯ.. ನ್ಯಾಯಕ್ಕಾಗಿ ಪತ್ರ, ಗಂಟೆಗಳನ್ನು ಕಟ್ಟುತ್ತಾರೆ ಭಕ್ತರು!
