ಜೈಪುರ (ರಾಜಸ್ಥಾನ) : ದೇಶದಲ್ಲಿ ನಿರಂತರವಾಗಿ ಅತ್ಯಾಚಾರ ಪ್ರಕರಣಗಳು ವರದಿಯಾಗುತ್ತಲೇ ಇವೆ. ಪುಟ್ಟ ಹೆಣ್ಣು ಮಕ್ಕಳ ಮೇಲೂ ಬಲಾತ್ಕಾರಗಳು ನಡೆಯುತ್ತಿವೆ. ಆದರೆ, ಇಲ್ಲೊಬ್ಬ ಎಂಟು ವರ್ಷದ ಬಾಲಕಿ ಕಾಮುಕನ ಕೈಯಿಂದ ತನ್ನನ್ನು ತಾನು ರಕ್ಷಿಸಿಕೊಂಡು ಸಾಹಸ ಮೆರೆದಿದ್ದಾಳೆ.
ಬಾಲಕಿಯ ಧೈರ್ಯ ಕಂಡು ಕಾಮುಕ ಸ್ಥಳದಿಂದ ಕಾಲ್ಕಿತ್ತಿದ್ದಾನೆ. ತನ್ನ ಮೇಲೆ ಅತ್ಯಾಚಾರ ಎಸಗಿದ ಕಾಮುಕನ ಮುಖ ಮತ್ತು ಕೈಗಳಿಗೆ ಕಚ್ಚಿ, ಉಗುರುಗಳಿಂದ ಪರಚಿ ಅವನನ್ನು ಬಾಲಕಿ ಓಡಿಸಿದ್ದಾಳೆ. ರಾಜಸ್ಥಾನದ ರಾಜಧಾನಿಯ ಜೈಪುರದ ಬಾಲಕಿಯೇ ಈ ಧೈರ್ಯ ಶಾಲಿಯಾಗಿದ್ದಾಳೆ.
ಇಷ್ಟಕ್ಕೂ ನಡೆದಿದ್ದೇನು?: ಪ್ರತಾಪ್ ನಗರ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ 8 ವರ್ಷದ ಬಾಲಕಿಯೊಬ್ಬಳು ಶುಕ್ರವಾರ ಸಂಜೆ ತನ್ನ ಮನೆಯ ಹೊರಗೆ ಆಟವಾಡುತ್ತಿದ್ದಳು. ಆಗ ಪಕ್ಕದ ಮನೆಯ ಗೋವರ್ಧನ್ ಎಂಬ ಕಾಮುಕ ಬಾಲಕಿಗೆ ಏನೋ ಆಮಿಷವೊಡ್ಡಿ ತನ್ನ ಬಳಿಗೆ ಕರೆದಿದ್ದಾನೆ. ಬಳಿಕ ಬಲವಂತವಾಗಿ ಮನೆಗೆ ಎತ್ತಿಕೊಂಡು ಹೋಗಿ ಬಲಾತ್ಕಾರಕ್ಕೆ ಮುಂದಾಗಿದ್ದಾನೆ. ಆಗ ಬಾಲಕಿ ಕೂಡಲೇ ಕಿರುಚಾಡಿದ್ದಾಳೆ.
ಆದರೂ, ಕಾಮುಕ ಬಾಲಕಿಯನ್ನು ಬಿಟ್ಟಲ್ಲ. ಅಲ್ಲದೇ, ಕೈಯಿಂದ ಬಾಯಿ ಮುಚ್ಚಲು ಯತ್ನಿಸಿದ್ದಾನೆ. ಈ ವೇಳೆ ಬಾಲಕಿ ಅವನ ಕೈಗೆ ಕಚ್ಚಿದ್ದಾಳೆ. ಜೊತೆಗೆ ಆರೋಪಿಯ ಮುಖಕ್ಕೇ ಬಾಲಕಿ ಕೈ ಹಾಕಿ ಉಗುರುಗಳಿಂದ ಪರಚಿ ಗಾಯ ಮಾಡಿದ್ದಾಳೆ. ಬಾಲಕಿಯ ಪ್ರತಿ ದಾಳಿಯಿಂದ ಬೆಚ್ಚಿಬಿದ್ದ ಆರೋಪಿಯು ಆಕೆಯನ್ನು ಅಲ್ಲಿಯೇ ಬಿಟ್ಟು ಪರಾರಿಯಾಗಿದ್ದಾನೆ. ನಂತರ ಬಾಲಕಿ ಕಣ್ಣೀರು ಹಾಕುತ್ತಾ ಮನೆಗೆ ಬಂದು ಪೋಷಕರಿಗೆ ವಿಷಯ ತಿಳಿಸಿದ್ದಾರೆ.
ಆಗ ಬಾಲಕಿಯ ಕುಟುಂಬಸ್ಥರು ಮತ್ತು ಸಂಬಂಧಿಕರು ಆರೋಪಿಗಾಗಿ ಹುಡುಕಾಟ ನಡೆಸಿದ್ದಾರೆ. ಆದರೆ, ಆರೋಪಿ ಪತ್ತೆಯಾಗಿಲ್ಲ. ಇದಾದ ಬಳಿಕ ಪೊಲೀಸರಿಗೆ ಮಾಹಿತಿ ನೀಡಿದ್ದು, ವಿಷಯದ ಗಂಭೀರತೆ ಕಂಡು ಪೊಲೀಸರೂ ತಕ್ಷಣ ಕಾರ್ಯಪ್ರವೃತ್ತರಾಗಿ ಆರೋಪಿಯನ್ನು ಬಂಧಿಸಿದ್ದಾರೆ. ಈ ಘಟನೆ ಸಂಬಂಧ ಪೋಕ್ಸೋ ಕಾಯ್ದೆಯಡಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಹೆಚ್ಚಿನ ವಿಚಾರಣೆ ನಡೆಸುತ್ತಿದ್ದಾರೆ.
ಇದನ್ನೂ ಓದಿ: ಬಿಜೆಪಿ ಸಂಸದೆ ಪ್ರಜ್ಞಾ ಠಾಕೂರ್ಗೆ ಕೊಲೆ ಬೆದರಿಕೆ ಕರೆ : ಆಡಿಯೋ ವೈರಲ್
