ನವದೆಹಲಿ: ಆದಾರ್ ಪೂನಾವಾಲಾ ಅವರ ಸೆರಮ್ ಇನ್ಸಿಟ್ಯೂಟ್ ಆಫ್ ಇಂಡಿಯಾ(ಎಸ್ಐಐ)ಗೆ ಆಸ್ಟ್ರಾಜೆನಿಕಾ ನೋಟಿಸ್ ನೀಡಿದೆ. ಕೋವಿಡ್ ವ್ಯಾಕ್ಸಿನ್ ಪೂರೈಕೆಯಲ್ಲಿ ವಿಳಂಬವನ್ನು ಪ್ರಶ್ನಿಸಿ ಆಸ್ಟ್ರಾಜೆನಿಕಾ ಸಿರಮ್ ಇನ್ಸಿಟ್ಯೂಟ್ಗೆ ಈ ನೋಟಿಸ್ ಜಾರಿ ಮಾಡಿದೆ.
ಭಾರತದಲ್ಲಿ ಕೋವಿಶೀಲ್ಡ್ಗೆ ಹೆಚ್ಚುತ್ತಿರುವ ಬೇಡಿಕೆ ಹಿನ್ನೆಲೆಯಲ್ಲಿ ಲಸಿಕೆ ತಯಾರಿಕೆ ಮೇಲೆ ಭಾರಿ ಒತ್ತಡ ಇರುವ ಕಾರಣ ಪೂರೈಕೆಯಲ್ಲಿ ತಡವಾಗುತ್ತಿದೆ ಎಂದು ಪೂನಾವಾಲಾ ಆಸ್ಟ್ರಾಜೆನಿಕಾ ನೋಟಿಸ್ಗೆ ನೀಡಿರುವ ಉತ್ತರದಲ್ಲಿ ತಿಳಿಸಿದ್ದಾರೆ. ಇನ್ನೊಂದು ಅಂಶವನ್ನು ಉತ್ತರದಲ್ಲಿ ಹೇಳಿರುವ ಪೂನಾವಾಲಾ, ಇತರ ದೇಶಗಳಿಗೆ ಕೋವಿಶೀಲ್ಡ್ ರಫ್ತನ್ನು ತಾತ್ಕಾಲಿಕ ನಿಲುಗಡೆ ಮಾಡಿ ದೇಶದಲ್ಲಿ ಹೆಚ್ಚುತ್ತಿರುವ ಬೇಡಿಕೆ ಪೂರೈಕೆ ಮಾಡುವಂತೆ ಭಾರತ ಸರ್ಕಾರ ಹೇಳಿದೆ. ಹೀಗಾಗಿ ಬೇಡಿಕೆ ಈಡೇರಿಕೆ ಮತ್ತು ಪೂರೈಕೆಯಲ್ಲಿ ವಿಳಂಬವಾಗುತ್ತಿದೆ ಎಂದು ಸ್ಪಷ್ಟಪಡಿಸಲಾಗಿದೆ.
ಇದನ್ನೂ ಓದಿ: ಉತ್ತರಾಖಂಡ: ಐಐಟಿ ರೂರ್ಕಿಯ 88 ವಿದ್ಯಾರ್ಥಿಗಳಿಗೆ ಕೊರೊನಾ ದೃಢ
ಕಳೆದ ಮಾರ್ಚ್ನಲ್ಲಿ ಅಸ್ಟ್ರಾಜೆನಿಕ 142 ರಾಷ್ಟ್ರಗಳಿಗೆ ಕೋವಿಶೀಲ್ಡ್ ಪೂರೈಕೆ ಮಾಡುವುದಾಗಿ ಘೋಷಣೆ ಮಾಡಿತ್ತು. ಅದರಂತೆ ಲಸಿಕೆ ಉತ್ಪಾದನೆ ಮಾಡಿ ಪೂರೈಕೆ ಮಾಡಲಾಗುತ್ತಿದೆ. ಆಸ್ಟ್ರಾಜೆನಿಕಾ ಭಾರತದ ಸೆರಮ್ ಇನ್ಸಿಟ್ಯೂಟ್ ಆಫ್ ಇಂಡಿಯಾ ಜತೆ ಲಸಿಕಾ ಉತ್ಪಾದನೆಯ ಒಪ್ಪಂದ ಮಾಡಿಕೊಂಡಿದೆ. ಸೆರಮ್ ಇನ್ಸಿಟ್ಯೂಟ್ ಕೋವಾಕ್ಸ್ ಲಸಿಕೆ ಪೂರೈಸುವ ಅತಿದೊಡ್ಡ ಕಂಪನಿಯಾಗಿದೆ. ಹಲವು ಮಿಲಿಯನ್ ಕೋವ್ಯಾಕ್ಸ್ ಬಡ ಮತ್ತು ಮಧ್ಯಮ ಆದಾಯದ ರಾಷ್ಟ್ರಗಳಿಗೆ ಪೂರೈಕೆ ಮಾಡಲಾಗಿದೆ ಎಂದು ಆಸ್ಟ್ರಾಜೆನಿಕಾ ಹೇಳಿದೆ.
