ನವದೆಹಲಿ: ಕಾಬೂಲ್ನಲ್ಲಿ ತಾಲಿಬಾನ್ ಅಧಿಕಾರಕ್ಕೆ ಬಂದಾಗ, ಈ ಹಿಂದೆ ಆಫ್ಘನ್ನಲ್ಲಿದ್ದ ವಿದೇಶಿ ಭಯೋತ್ಪಾದಕರು ಜಮ್ಮುಕಾಶ್ಮೀರಕ್ಕೆ ನುಸುಳುವ ಸಾಧ್ಯತೆಯಿದೆ ಎಂದು ಸೇನಾ ಮುಖ್ಯಸ್ಥ ಎಂಎಂ ನರವಣೆ ಅಭಿಪ್ರಾಯಪಟ್ಟಿದ್ದಾರೆ.
ಒಂದು ವೇಳೆ ಭಯೋತ್ಪಾದಕರು ಗಡಿ ಪ್ರವೇಶಿಸಲು ಯತ್ನಿಸಿದರೆ ಅವರನ್ನು ನಿಗ್ರಹಿಸಲು ಭಾರತೀಯ ಸಶಸ್ತ್ರ ಪಡೆಗಳು ಸಿದ್ಧವಾಗಿವೆ ಎಂದೂ ಅವರು ಹೇಳಿದ್ದಾರೆ. ಕಾಶ್ಮೀರದಲ್ಲಿ ಇತ್ತೀಚೆಗೆ ನಡೆದ ನಾಗರಿಕ ಹತ್ಯೆಗಳು ಮತ್ತು ಆಫ್ಘನ್ನಲ್ಲಿ ತಾಲಿಬಾನ್ ಅಧಿಕಾರವನ್ನು ವಶಪಡಿಸಿಕೊಂಡಿದ್ದರ ನಡುವೆ ಸಂಬಂಧವಿದೆ ಎಂದು ಹೇಳಲು ಸಾಧ್ಯವಿಲ್ಲ. ಜಮ್ಮುಕಾಶ್ಮೀರದಲ್ಲಿ ಈ ಮೊದಲಿಗಿಂತಲೂ ಹೆಚ್ಚಾಗಿ ಭಯೋತ್ಪಾದನಾ ಚಟುವಟಿಕೆಗಳು ಉಲ್ಬಣಗೊಂಡಿವೆ. ಆದರೆ, ಇದಕ್ಕೂ ಆಫ್ಘನ್ಗೂ ಸಂಬಂಧ ಕಲ್ಪಿಸಲು ಸಾಧ್ಯವಿಲ್ಲ ಎಂದರು.
ಎರಡು ದಶಕಗಳ ಹಿಂದೆ ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ ಆಳ್ವಿಕೆ ನಡೆಸುವಾಗ ವಿದೇಶಿ ಭಯೋತ್ಪಾದಕರು ಕಣಿವೆ ರಾಜ್ಯಕ್ಕೆ ಬಂದಿದ್ದಾರೆ. ಅವರು ಈಗಲೂ ಕಾಶ್ಮೀರದಲ್ಲಿ ಸಕ್ರಿಯರಾಗಿರಬಹುದು ಎಂದರು. ಆದರೆ, ಈಗ ಏನಾದ್ರೂ, ಭಯೋತ್ಪಾದಕರು ಭಾರತದ ಗಡಿ ಪ್ರವೇಶಿಸಲು ಯತ್ನಿಸಿದರೆ, ನಮ್ಮ ಸೇನೆ ಅವರನ್ನು ಎದುರಿಸಲು ಸಿದ್ಧವಾಗಿದೆ ಎಂದು ನರವಣೆ ಸ್ಪಷ್ಟಪಡಿಸಿದ್ದಾರೆ. ಅಫ್ಘಾನಿಸ್ತಾನದಿಂದ ಪಾಕಿಸ್ತಾನದ ಮೂಲಕ ಜಮ್ಮು ಮತ್ತು ಕಾಶ್ಮೀರಕ್ಕೆ ಭಯೋತ್ಪಾದನೆ ಹರಡುವ ಸಾಧ್ಯತೆ ದಟ್ಟವಾಗಿವೆ.
ನೌಕಾಪಡೆಯ 21 ಸಿಬ್ಬಂದಿಗೆ ಪ್ರಶಸ್ತಿ ಪ್ರದಾನ
ಇಂದು ನವದೆಹಲಿಯಲ್ಲಿ ನಡೆದ ಹೂಡಿಕೆ ಸಮಾರಂಭದಲ್ಲಿ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಭಾರತೀಯ ಕೋಸ್ಟ್ ಗಾರ್ಡ್ (ಐಸಿಜಿ) ಸಿಬ್ಬಂದಿಗೆ ಶೌರ್ಯ ಮತ್ತು ಅರ್ಹ ಸೇವಾ ಪದಕಗಳನ್ನು ನೀಡಿ ಗೌರವಿಸಿದರು.
ವಿಶಿಷ್ಟ ಸೇವೆಗಾಗಿ ಮೂರು ರಾಷ್ಟ್ರಪತಿಗಳ ಪದಕಗಳು, ಎಂಟು ಶೌರ್ಯ ಮತ್ತು 10 ಸೇವಾ ಪ್ರಶಸ್ತಿಗಳು ನೀಡಲಾಯಿತು. ನಿಸ್ವಾರ್ಥ ಭಕ್ತಿ, ಧೈರ್ಯ ಮತ್ತು ತೀವ್ರತರವಾದ ಪರಿಸ್ಥಿತಿಗಳಲ್ಲಿ ಐಸಿಜಿ ಸಿಬ್ಬಂದಿಯ ಶೌರ್ಯದ ಕಾರ್ಯಗಳನ್ನು ಗುರುತಿಸಿ ಪದಕಗಳನ್ನು ಪ್ರದಾನ ಮಾಡಲಾಯಿತು.
ಈ ಸಂದರ್ಭದಲ್ಲಿ ಮಾತನಾಡಿದ ರಾಜನಾಥ್ ಸಿಂಗ್, ಕೇವಲ 4-6 ದೋಣಿಗಳೊಂದಿಗೆ ದೇಶ ಸೇವೆ ಆರಂಭಿಸಿದ ಐಸಿಜಿ, ಈಗ 150 ಹಡಗುಗಳು ಮತ್ತು 66 ವಿಮಾನಗಳನ್ನು ಹೊಂದಿರುವ ವಿಶ್ವದ ಅತ್ಯುತ್ತಮ ಕಡಲ ಪಡೆಗಳಲ್ಲಿ ಒಂದಾಗಿದೆ ಎಂದರು. ಇದು ಸಮಗ್ರ ಆಂತರಿಕ ಮತ್ತು ಬಾಹ್ಯ ಭದ್ರತಾ ಚೌಕಟ್ಟಿನ ನಿರ್ಣಾಯಕ ಅಂಶವಾಗಿದೆ. "ಭಾರತದ ಕಡಲ ವಲಯಗಳು ಸುರಕ್ಷಿತ ಮತ್ತು ಮಾಲಿನ್ಯ ರಹಿತವಾಗಿರಬೇಕು. ಇದು ನಮ್ಮ ಭದ್ರತಾ ಅಗತ್ಯಗಳನ್ನು ಪೂರೈಸುತ್ತದೆ. ಪರಿಸರ ಆರೋಗ್ಯ ಮತ್ತು ಆರ್ಥಿಕ ಅಭಿವೃದ್ಧಿಯನ್ನು ಖಚಿತಪಡಿಸುತ್ತದೆ ಎಂದು ಅವರು ಹೇಳಿದರು.
