ಆದಿಲಾಬಾದ್ (ತೆಲಂಗಾಣ): ಮಹಿಳೆಯೊಬ್ಬರು ಸಾರಿಗೆ ಸಂಸ್ಥೆಯ ಬಸ್ನಲ್ಲಿ ಮಗುವಿಗೆ ಜನ್ಮ ನೀಡಿದ್ದು, ಆ ಮಗುವಿಗೆ ಜೀವನಪೂರ್ತಿ ಬಸ್ ಸಂಚಾರಕ್ಕೆ ಉಚಿತ ಬಸ್ ಪಾಸ್ ನೀಡಲಾಗಿದೆ. ಇಂಥದೊಂದು ಅಚ್ಚರಿಯ ಘಟನೆ ತೆಲಂಗಾಣದ ಆದಿಲಾಬಾದ್ನಲ್ಲಿ ನಡೆದಿದೆ.
ಮಹಾರಾಷ್ಟ್ರದ ಕಿನ್ವತ್ ತಾಲೂಕಿನ ಸಿಂಗಾರಿವಾಡಾ ನಿವಾಸಿಯಾದ ಮದಾವಿ ರತ್ನಮಾಲಾ ಹೆಸರಿನ ಗರ್ಭಿಣಿ ಇಂದ್ರವೆಲ್ಲಿಯಲ್ಲಿ ವಾಸಿಸುತ್ತಿದ್ದರು. ಅವರು ಭಾನುವಾರದಂದು ತಮ್ಮ ಕುಟುಂಬಸ್ಥರೊಂದಿಗೆ ಇಂದ್ರವೆಲ್ಲಿಯಿಂದ ಆದಿಲಾಬಾದ್ಗೆ ಬಸ್ನಲ್ಲಿ ಪ್ರಯಾಣ ಬೆಳೆಸಿದ್ದರು.
ರತ್ನಮಾಲಾ ಅವರಿಗೆ ಹೆರಿಗೆ ನೋವು ಕಾಣಿಸಿಕೊಂಡಿದ್ದರಿಂದ ಗುಡಿಹಾತನೂರ್ ವಲಯದ ಮಾಣಕಾಪುರ ಎಂಬಲ್ಲಿ ಬಸ್ ನಿಲ್ಲಿಸಲಾಯಿತು. ಆದರೆ, 108 ಆ್ಯಂಬುಲೆನ್ಸ್ ಸಕಾಲಕ್ಕೆ ಬಾರದ ಕಾರಣ ಅವರಿಗೆ ಬಸ್ನಲ್ಲೇ ಹೆರಿಗೆ ಮಾಡಿಸಲಾಯಿತು. ಈ ಸಂದರ್ಭದಲ್ಲಿ ಬಸ್ ಡ್ರೈವರ್ ಸ್ವತಃ ವೈದ್ಯರ ಪಾತ್ರ ನಿರ್ವಹಿಸಿದರು. ನಂತರ ಬಸ್ ಅನ್ನು ತಕ್ಷಣವೇ ಗುಡಿಹಾತನೂರ್ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಕೊಂಡೊಯ್ಯಲಾಯಿತು.
ಆರೋಗ್ಯ ಕೇಂದ್ರಕ್ಕೆ ದಾಖಲಾದ ತಾಯಿ-ಮಗುವನ್ನು ಪರೀಕ್ಷಿಸಿದ ವೈದ್ಯರು, ಇಬ್ಬರೂ ಆರೋಗ್ಯವಾಗಿದ್ದಾರೆ ಎಂದು ತಿಳಿಸಿದ್ದಾರೆ. ತೆಲಂಗಾಣ ಸಾರಿಗೆ ನಿಗಮದ ಡಿವಿಎಂ ಮಧುಸೂದನ್ ಹಾಗೂ ಡಿಎಂ ವಿಜಯ್ ಆಸ್ಪತ್ರೆಗೆ ಆಗಮಿಸಿ ತಾಯಿ - ಮಗುವಿನ ಆರೋಗ್ಯ ವಿಚಾರಿಸಿದ್ದಾರೆ.
ಸಾರಿಗೆ ಸಂಸ್ಥೆಯ ಬಸ್ನಲ್ಲಿ ಜನಿಸಿದ ಮಗುವಿಗೆ ಜೀವನಪೂರ್ತಿ ಉಚಿತ ಬಸ್ ಪಾಸ್ ನೀಡಲಾಗುವುದು ಎಂದು ಸಾರಿಗೆ ಸಂಸ್ಥೆಯ ಎಂಡಿ ಸಜ್ಜನರ್ ಹೇಳಿದ್ದಾರೆ.
ತಾಯಿ ಹಾಗೂ ಮಗುವನ್ನು ಸುರಕ್ಷಿತವಾಗಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಕ್ಕೆ ಬಸ್ ಚಾಲಕಿ ಎಂ. ಅಂಜನಾ ಹಾಗೂ ಕಂಡಕ್ಟರ್ ಸಿಎಚ್ ಗಬ್ಬರ್ ಅವರಿಗೆ ಸಾರಿಗೆ ಸಂಸ್ಥೆಯ ಚೇರಮನ್ ಬಾಜಿರೆಡ್ಡಿ ಗೋವರ್ತನರೆಡ್ಡಿ ಹಾಗೂ ಎಂಡಿ ಸಜ್ಜನರ್ ಧನ್ಯವಾದಗಳನ್ನು ತಿಳಿಸಿದ್ದಾರೆ.
ಇದನ್ನು ಓದಿ:ಬ್ಯುಸಿನೆಸ್ ಇನ್ಕ್ಯುಬೇಟರ್ ಟಿ -ಹಬ್‌ ಉದ್ಘಾಟಿಸಲಿರುವ ಮುಖ್ಯಮಂತ್ರಿ ಕೆಸಿಆರ್
