ಬುರ್ಹಾನ್ಪುರ (ಮಧ್ಯಪ್ರದೇಶ): ಮಧ್ಯಪ್ರದೇಶದ ಬುರ್ಹಾನ್ಪುರ ಜಿಲ್ಲೆಯಲ್ಲಿ ವಿಚಿತ್ರ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಜಿಲ್ಲೆಯ ಡೆಡ್ತಲೈ ಗ್ರಾಮದಲ್ಲಿ 3 ವರ್ಷದ ಬಾಲಕಿ ತನ್ನ ತಂದೆಯೊಂದಿಗೆ ಪೊಲೀಸ್ ಠಾಣೆಗೆ ದೂರು ನೀಡಲು ಬಂದಿದ್ದಾಳೆ. ಅತ್ಯಂತ ಕುತೂಹಲಕಾರಿ ಸಂಗತಿಯೆಂದರೆ, ಬಾಲಕಿಯು ಬೇರೆಯವರ ವಿರುದ್ಧ ದೂರು ದಾಖಲಿಸಿಲ್ಲ. ಬದಲಾಗಿ ತನ್ನ ತಾಯಿಯನ್ನೇ ಜೈಲಿಗೆ ಹಾಕುವಂತೆ ಪೊಲೀಸರಿಗೆ ಮನವಿ ಮಾಡಿದ್ದಾಳೆ.
ತಾಯಿ ವಿರುದ್ದ ದೂರು: ಭಾನುವಾರ ಮಧ್ಯಾಹ್ನ ಮಗಳಿಗೆ ಸ್ನಾನ ಮಾಡಿಸಿದ ತಾಯಿ ಮಗಳಿಗೆ ಕಾಡಿಗೆ ಹಚ್ಚುವಂತೆ ಪತಿಗೆ ಹೇಳಿದ್ದಾರೆ. ಕಾಡಿಗೆ ಹಾಕಿಸಿಕೊಳ್ಳಲು ಮಗಳು ಒಪ್ಪುತ್ತಿಲ್ಲ ಎಂದು ಪತಿ ಹೇಳಿದ್ದಾರೆ. ಆಗ ತಾಯಿ ಮಗುವಿಗೆ ಪ್ರೀತಿಯಿಂದ ಕಪಾಳಮೋಕ್ಷ ಮಾಡಿದ್ದಾರೆ. ಇದಾದ ಬಳಿಕ ಬಾಲಕಿ ಅಳಲಾರಂಬಿಸಿದ್ದಾಳೆ. ಕಷ್ಟಪಟ್ಟು ಸಮಾಧಾನಪಡಿಸಲು ಮುಂದಾದಾಗ ಅಪ್ಪಾ ಪೊಲೀಸ್ ಠಾಣೆಗೆ ದೂರು ಕೊಡೋಣಾ ಬಾ. ಇಲ್ಲದಿದ್ರೆ ಅಮ್ಮ ಕೊಲ್ಲುತ್ತಾಳೆ. ಅವಳನ್ನು ಕೂಡಲೇ ಜೈಲಿಗೆ ಹಾಕಬೇಕು ಎಂದು ಹೇಳತೊಡಗಿದ್ದಾಳೆ. ಇದನ್ನು ಕೇಳಿ ಇಬ್ಬರೂ ನಕ್ಕಿದ್ದಾರೆ. ಆದರೆ ಬಾಲಕಿ ಒಪ್ಪದ ಕಾರಣ ಠಾಣೆಗೆ ಕರೆತಂದಿದ್ದಾರೆ.
ನಂತರ ಮಗಳ ಅಸಮಾಧಾನವನ್ನು ಕಡಿಮೆ ಮಾಡುವ ಉದ್ದೇಶಕ್ಕೆ ಸಬ್ಇನ್ಸ್ಪೆಕ್ಟರ್ ಪ್ರಿಯಾಂಕಾ ನಾಯಕ್ ಅವರು ತಾಯಿಯ ಕೋರಿಕೆ ಮೇರೆಗೆ ದೂರು ಬರೆದಿದ್ದಾರೆ. ತನ್ನ ತಾಯಿಯ ವಿರುದ್ಧವೇ ದೂರು ನೀಡಲು ಬಂದಿದ್ದ ಬಾಲಕಿಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗುತ್ತಿದೆ.
ಮಮ್ಮಿಯೂ ಚಾಕಲೇಟ್ ಕದಿಯುತ್ತಾಳೆ: ತನ್ನ ತಾಯಿಯೂ ಚಾಕಲೇಟ್ ಕದಿಯುತ್ತಾರೆ ಎಂದು ಬಾಲಕಿ ಹೇಳಿದ್ದಾಳೆ. ಪೊಲೀಸ್ ಠಾಣೆ ಪ್ರಭಾರಿ ಪ್ರಿಯಾಂಕಾರನ್ನು ಕಂಡ ಬಾಲಕಿ ತಕ್ಷಣ ಹೋಗಿ ಅವರ ಕೈ ಹಿಡಿದು ಅಮ್ಮಳನ್ನು ಜೈಲಿಗೆ ಹಾಕಿ, ಇಲ್ಲದಿದ್ರೆ ನನ್ನನ್ನು ಕೊಲ್ಲುತ್ತಾರೆ ಎಂದು ಹೇಳತೊಡಗಿದೆ. ನಂತರ ಮಗುವಿನ ಮುಗ್ಧತೆಯ ಮುಂದೆ ಪೊಲೀಸ್ ಸಬ್ಇನ್ಸ್ಪೆಕ್ಟರ್ ಮನಸೋತಿದ್ದಾರೆ. ನಂತರ ದೂರು ಬರೆದುಕೊಂಡು ಮನೆಗೆ ಮರಳಿ ಕಳಿಸಿದ್ದಾರೆ.
ಓದಿ: ಹೆಂಡ್ತಿ-ಮಕ್ಕಳನ್ನು ಕತ್ತರಿಯಿಂದ ಕೊಲೆ ಮಾಡಿ ಆತ್ಮಹತ್ಯೆಗೆ ಶರಣಾದ ವ್ಯಕ್ತಿ
